1 Samwele 23
23
Ndaviti amena nganda ya Keila
1Ndaviti vamulekele ngwavo, “VaFilisitiya valinakulwa na nganda ya Keila, co valinakwiva vimbuto vyavo vyaviha vivanateje.” 2Ngecivene, Ndaviti wehwile Shukulu Kalunga ngwendi, “Njinapande kuya mukulwisa vaFilisitiya ndi?”
Shukulu Kalunga wamukumbulwile ngwendi, “Eyo, ya ukavalwise ngeci ukamene Keila.”
3Oloni vanu va Ndaviti vendekele kuli ikeye ngwavo, “Kenga, inonwa muno mu Yunda tuziva lyova, indi cikapwa vati nga tuya nakulwisa vaFilisitiya ku Keila?” 4Ngecivene, Ndaviti wehwile lalo Shukulu Kalunga. Co Shukulu Kalunga wamulekele ngwendi, “Katuka, ya ukalwise Keila, omwo njikakundika vaFilisitiya mu livoko lyove.” 5Co Ndaviti na vanu vendi vaile ku Keila nakulwisa vaFilisitiya, vatsiile vavangi, co vambatele vimuna vavo. Omu mukemwo Ndaviti mwamenenene ije nganda.
6Omo Aviyatale muna Ahimeleki watewelele kuli Ndaviti ku Keila, wambatele kangamuna.
7Ngecivene, valekele Saulu ngwavo Ndaviti nai ku Keila, co Saulu wendekele ngwendi, “Njambi nanjanaye. Omwo Ndaviti nalitela nganjo ikeye vavenya akukovela mu nganda ya civumbe ya vikolo vyakukola.” 8Ngecivene, Saulu wasanene mashwalale vendi va nzita vaye nakulwisa Keila ngeci vakazengeleke Ndaviti na vanu vendi. 9Omo Ndaviti wazivile ngeci Saulu ali na vutumbe vwakumulwisa, wendekele kuli Aviyatale muka-kukombelela ngwendi, “Nena kangamuna kuno.” 10Co Ndaviti wendekele ngwendi, “Yove Shukulu Kalunga, Njambi ya Isalele, njazivi ngeci Saulu ali na vutumbe vwakwija ku Keila nakuyinyongesa omwo yange, ngamba yove. 11Kuma vandambo va ku Keila vakanjana kuli Saulu ndi? Kuma cili vene Saulu akaija, ngwe omo njazivi ndi? Shukulu Kalunga, Njambi ya Isalele, njakulombo, njikumbulule!”
Shukulu Kalunga wamukumbulwile ngwendi, “Saulu akaija.”
12Co Ndaviti wehwile lalo ngwendi, “Kuma cili vene vandambo va ku Keila vakakwasa Saulu ngeci anjikwate amo na vanu vange ndi?”
Co Shukulu Kalunga wamukumbulwile ngwendi, “Eyo, vakakwana kuli Saulu.”
13Ngecivene, Ndaviti na vanu vendi, vaje vapwile kuyehi na 600, vatundile ku Keila, vaile kweka. Omo Saulu wazivile ngeci Ndaviti natewa natundu ku Keila, co walikelele kaileko.
Ndaviti mu lifuti lya malundu
14Ndaviti wavandele mu lifuti lya malundu, mu mambo kuyehi na Zife. Simbu yoshe Saulu wesekele manene ngeci awane Ndaviti, oloni Njambi kakundikile Ndaviti mu mavoko a Saulu. 15Ndaviti wamwene ngeci Saulu alinakumuyomba ngeci amutsiye.
Ndaviti wakele ku Holeshe, mu mambo kuyehi na Zife. 16Co Yonatana waile kuli Ndaviti nakumusimpisa mbunge ngeci Njambi akamunyunga, 17wendekele kuli ikeye ngwendi, “Kesi ukale na lyova. Tate Saulu kakasa kukuvulumuna embwe. Ikeye nazivuka mwamuvwa yove ukapwa mwene mu Isalele, co yange njikapwa wakukwata.” 18#1 Sam 18:3 Co muvuvali vwavo valikumiiye cikumiiyo cakujela ku mesho a Shukulu Kalunga. Co Ndaviti welukile ku Holeshe, Yonatana welukile kwimbo.
19 #
Mya 54 (Mutwe wa n̄anda) Vanu vamo vatundile ku Zife, vaile ku Ngimbeya kuli Saulu, vamulekele ngwavo, “Ndaviti navanda mu lifuti lyetu ku Holeshe a Munkinda wa Hakila, ku mutambela wa mu mbwela mu mambo ya Yundeya. 20Twazivuka, shukulu, ushaka manene kumukwata, ngecivene, ija ku lifuti lyetu, co tukakukwasa ngeci umukwate.” 21Saulu wavakumbulwile ngwendi, “Shukulu Kalunga amivezikise omwo munanjizivila ngozi! 22Yeni mukawane mwamuvwa ngila, mukatondesese mwamuvwa, co mukazivuka naa akala, nou namumono iya, omwo njinazivi ngwavo ikeye nanyanyama manene. 23Mukawane mwamuvwa ku mwela kuje kwakavanda, co mwa vushunga vene ilwiseni vukaleo vwavuvwa kuli yange. Asinoni njakuye amo neni, co nga ikeye acili mu lifuti lije, co njikamushakezeka, nameme akati ka vaYunda 1,000.”
24Ngecivene, vasezele Saulu velukile ku Zife. Ndaviti na vanu vendi vakele mu mambo ya Mayone, mu cana cangoco ku mutambela wa mu mbwela ya mambo ya Yundeya. 25Saulu na vanu vendi vakatukile vaile nakusetela Ndaviti, oloni Ndaviti te nazivi laja a evi, co waile ku lilundu lya limanya mu mambo ya Mayone nakukakalako. Omo Saulu wazivileko, co wakavele Ndaviti. 26Saulu na vanu vendi vakele ku mutambela umo wa lilundu, co Ndaviti lalo na vanu vendi vakele ku mutambela ukwavo. Vazambwile kutewela kweka kutunda kuli Saulu na vanu vendi, vaje vashakele kuvazengeleka ngeci vavakwate. 27Co aje vene kanganda wezile kuli Saulu wendekele ngwendi, “Iluka vwasi! VaFilisitiya vanakovela mu lifuti!” 28Ngecivene, Saulu walikelele kusheka Ndaviti, co waile nakulwisa vaFilisitiya. Omu mukemwo vatumbwile mwela uje ngwavo Lilundu Lyakulitepesa. 29Ndaviti watundile kuje, waile ku lifuti lya Engendi, kwakavandele.
The Bible in Mbunda ©The Bible Society of Zambia, 2006