1 Samwele 11
11
Saulu afungulula vaAmoni
1Omo yahwile ngonde, Nahashe kaAmoni waile nakulwisa limbo lya Njembeshe mu lifuti lya Ngilyande. Co vanalume va ku Njembeshe vendekele kuli Nahashe ngwavo, “Linga lizivasano netu, co ukatushwana.”
2Nahashe wavakumbulwile ngwendi, “Njikalinga neni lizivasano nga njikativa lisho lya ku cilyo lya munu na munu ngeci cipwe ca shwamwa kuli Isalele yoshe.”
3Co vantwama va ku Njembeshe vendekele ngwavo, “Twane matangwa atanu na avali tutume miluwa mu lifuti lyoshe lya Isalele. Nga kukwesi umo wakutukwasa, asinoni tukafungulukila kuli yove.”
4Co miluwa vetele ku Ngimbeya, kuje kwakele Saulu, co omo vambulwile muzimbu, vanu vashangumukile kulila. 5Saulu aceta vene ngacije kutunda ku mahya na vingombe vendi vakulimisa, co wehwile ngwendi, “Vika vyaviyako? Omwo vika vanu voshe valinakulila?” Co vamulekele vije vambulwile miluwa vaje vatundile ku Njembeshe. 6Omo Saulu wavizivile, co Munzinzime wa Njambi wezile na nzili ali ikeye, co waluvalele manene. 7Wambatele vingombe vavali vakulimisa, wavavatozwele vipuka-vipuka, co wavyanene kuli vaje miluwa vavitwale mu lifuti lyoshe lya Isalele nakuvanangula ngwendi, “Woshe uje kakava Saulu na Samwele ku nzita vakalinga ngacije ku vingombe vendi vakulimisa!”
Co vanu va Isalele vakele na lyova a vije vyalingile Shukulu Kalunga, co voshe vezile, na mbunge imolika. 8Co Saulu wavalavele ku Mbezeke, vanu va Isalele vapwile 300,000, co vanu va Yunda vapwile 30,000. 9Asinoni vendekele kuli miluwa vatundile ku Njembeshe ngwavo, “Mukaleka vanalume va Njembeshe ngweni imene, omo litangwa kanda lyete akati ka mutwe, vakapatuka.” Omo vanu va ku Njembeshe vatambwile majwi awa, vajolelele manene, 10co vendekele kuli Nahashe ngwavo, “Imene ukatufungulula, ukalinga netu vyoshe viwukashaka kulinga.”
11Co alikaki, mutondo-tondo, Saulu waangunwine vanu vendi mu vimbunga vitatu, co a mungulungengu, vashatukilile mu cilombo ca vitozi, valwisile vaAmoni. Co omo kwakile vavatsiile. Co vaje vasaleleo valishandokele, munu na munu watewelele kwendi.
12Asinoni vanu va Isalele vendekele kuli Samwele ngwavo, “Vali kulijo vaje vanu vendekele ngwavo, ‘Saulu kapandele kupwa mwene yetu?’ Twanenivo tuvatsiye.”
13Oloni Saulu wendekele ngwendi, “Naumo wai ivakatsiya ku litangwa lya lelo, omwo litangwa lya lelo Shukulu Kalunga namena Isalele.” 14Co Samwele wendekele kuli vakevo ngwendi, “Yetu voshe tuyeni ku Ngilingale tukambulule ngwetu Saulu ololo napu mwene yetu.” 15Ngecivene, voshe vaile ku Ngilingale, co kuje ku mwela wakujela vambulwile Saulu ngwavo napu mwene yavo. Vakombelelele vin̄ombelo vya kulitombola, co Saulu na vanu voshe va Isalele valisambele.
The Bible in Mbunda ©The Bible Society of Zambia, 2006