1 Petulu 2
2
Limanya lyakuyoya na muyati wakujela
1Ngecivene, umbileni kuti vyuma vyoshe vyavivi, kesi mwendeke makuli lalo, nambe kulinga civembulu, nambe lifuwa, nambe vyendeka vyakushaula. 2Pweni ngwe vimbututu vanasemuka ololo, simbu yoshe kaleni na lihwila lya mavele akujela a munzinzime, ngecivene, akunwako mukakola nakwovokelao. 3#Mya 34:8 Ngwe muvyendeka visoneka ngwavyo, “Omwo munamakela ku ngozi.”
4Ijeni kuli Mwene, limanya lyakuyoya lije vavyanene vanu ngwe lyangoco oloni Njambi walyangwile kupwa lya seo. 5Co akupwa ngwe mamanya akuyoya, vamitunge mupwe njuvo ya munzinzime, kuje mukapange ngwe vaka-kukombelela vakujela mukukombelela vin̄ombelo vya munzinzime vije vyatambula Njambi ali Yesu Kilistu. 6#Isa 28:16 Omwo visoneka vyendeka ngwavyo,
“Njinaangula limanya lya seo yakama,
limanya lya mu mbango mu Siyone,
co woshe uje akulaela kuli ikeye kakazivi shwamwa.”
7 #
Mya 118:22
Eli linapu limanya lya seo yakama manene kuli yeni vaje vanakulaela, oloni kuli vaje kuvakulaelele,
“Limanya lije vavyanene vaka-kutunga
likelyo ololo linapu lya seo kuli voshe.”
8 #
Isa 8:14-15
Co visoneka vikwavo vyendeka ngwavyo,
“Eli linapu limanya lyakutanukisa vanu,
likelyo limanya lije likavawisa.”
Vatanukile omwo kuvakulaelele ku lijwi, eci capwile cizango ca Njambi kuli vakevo.
9 #
Kut 19:5-6; Isa 43:20,21; Kwi 4:20; 7:6; 14:2; Tit 2:14; Isa 9:2 Oloni yeni munapu muyati wakwangula, vaka-kukombelela va Mwene, muyati wakujela, vanu va Njambi vavenya, vanamyangula mukwambulula vikomokeso vya vilinga vya Njambi, uje wamisanene kumitundisa mu lisusulungu kuminena ku ceke cendi cakukomokesa. 10#Hoz 2:23 A simbu imo kumwapwile vanu va Njambi, oloni ololo munapu mu vanu vendi, a simbu imo kumwazivukile mema ku mbunge ya Njambi, oloni ololo munawana kumizivila mema ku mbunge.
Vindungo va Njambi
11Vasamba vange, njilinakumilambelela, ngwe vangenzi na vaka-kwendangana mu kaye kano! Kesi mutave ku mashungu a ku muvila, aje simbu yoshe alinakulwa nzita na myonyo yeni. 12Futisi yeni akati ka vaka-kujeneka kukulaela inapande kupwa yaivwa ngeci omo vamyana mulonga wakupanga vuvi, vakevo vakamona vilinga vyeni vyavivwa, co vakashangazala Njambi a Litangwa lyendi lyakwija.
13Omwo a lizina lya Mwene, kaleni mwisi ya vanu vaje vali na moko, mwisi ya mwene, uje napu mutwe mukushika, 14na mwisi ya vanguvulu lalo, vaje vaanemika mwene mukunyanyamesa vaka-kulinga vuvi nakushangala vaka-kulinga mwamuvwa. 15Omwo Njambi ashaka ngeci muvindike nzimba ya vanu vakweva a vyuma vyavivwa vije mulinakulinga. 16Yoyeni ngwe vanu vakupatuka, ngecivene, kesi mupangese kupatuka kweni ngwe cuma cakufwika vuvi embwe, oloni yoyeni ngwe vindungo va Njambi. 17Singimikeni munu woshe, zemeni vasamba veni vaka-kukulaela, komokeni Njambi, co singimikeni vaka-kushwana.
Cimweso cakuyanda kwa Kilistu
18Yeni vangamba munapande kulikeesa kuli vashukulu yeni, co vamweseni kasingimiko, kesi lika kuli vaje vaka-ngozi na vaka-kumizivila mema ku mbunge embwe, oloni na kuli vaje vaka-kuluvala. 19Njambi akamivezikisa a cuma eci, nga mukakateya mukuyanda kuje kukwamipandele omwo munazivuka cizango cendi. 20Vikajo muwanao nga mukakateya mukumipupa omwo munalingi mwamuvi? Oloni nga mukakateya mukuyanda nambe omo munalingi mwamuvwa, Njambi akamivezikisa a cuma eci. 21Omwo eci cikeco camisanenene Njambi, omwo Kilistu vavenya wamiyandelele, co namisezela cimweso, ngeci mukavangeye mu myanja yendi. 22#Isa 53:9 Ikeye kalingile vuvi, co lalo naumo wai wazivile makuli atunda mu kanwa kendi. 23#Isa 53:7 Omo vamushawile, kelwisile lalo vituka, omo wayandele, ikeye kalishungwiiye, oloni waakele cinyangavili cendi muli Njambi, lyaako wa vushunga. 24#Isa 53:5 Kilistu vavenya wambatele vuvi vwetu mu muvila wendi a cilindakano, ngeci tutse ku vuvi, co tukayoyele ku vushunga. A viveve vyendi akeo munawana kukanguka. 25#Isa 53:6 Yeni mwapwile ngwe mu vimanga vanazimbalesa ngila yavo, oloni ololo muneluka kukava Kanyungi na Muka-Kunyunga myonyo yeni.
The Bible in Mbunda ©The Bible Society of Zambia, 2006