1 Vimyene 3
3
Solomoni alomba mana
(2 Miz 1:3-12)
1Solomoni walikwatele vusamba na mwene wa ku Ingito akwambata munendi. Wamunenele mu Nganda ya Ndaviti noo wamanesele kutunga lipela lyendi, na Njuvo ya Shukulu Kalunga, na civumbe cakuzengeleka ku Yelusalema. 2Vanu vakele nakukombelela vin̄ombelo a mitula yakuliseza-seza, te kanda vacitungile Shukulu Kalunga Njuvo. 3Solomoni wazemene Shukulu Kalunga, co wakavele mashiko a ishe Ndaviti, oloni watsiile lalo vimuna nakuvakombelela kupwa vin̄ombelo a mitula yakuliseza-seza.
4A simbu imo mwene waile ku Ngimbiyone mukukombelela vin̄ombelo omwo kukekwo kwakele mutula wakutsimana manene. A simbu ya kunima wakombeleleleko vin̄ombelo vya kwenyeka. 5A vutsiki vuje vene Shukulu Kalunga washolokele kuli Solomoni mu njozi nakumwihula ngwendi, “Vikajo ushaka ngeci njikwanevyo?”
6Solomoni wamukumbulwile ngwendi, “Simbu yoshe wamwesele tate Ndaviti ngamba yove, cizemo cakama, ikeye walikongomekele, na kulongwa na kasingimiko mu kulitombola nove. Co yove watwaleleo kumumwesa vukama vwove na cizemo cove cije kucesi kutenguluka akumwana mwana ou ku litangwa lya lelo alinakushwana mu mwela wendi. 7Shukulu Kalunga Njambi, unanjishwanesa mu mwela wa tate kupwa mwene, nameme njicili nji mukwenje oloni kunjizivukamo kushwana. 8Yange uno akati ka vanu vaje yove waangula kupwa vove, vaje vapwa vanu vavangi manene naumo wai asa kuvalava. 9Ngecivene, unjane mana akushwana nawo vanu vove mu vushunga nakuzivuka kwangununa akati ka vuvwa na vuvi. Nga kesi mukemwo ni, co vatijo njasa kushwana vanu vove ava vavangi ngacije?”
10Cavwaelelesele manene Shukulu Kalunga omo Solomoni walombele mana, 11co Njambi wendekele kuli Solomoni ngwendi, “Omwo unalombo mana akushwana mu vushunga, oloni kuwalombele mwonyo wakuyoya simbu yoshe, nambe vufuko nambe kutsa kwa vitozi vove, oloni unalombo mana akusompa mwamuvwa, 12co njikakulingila evi unalombo. Njikakwana mana nakuzivisisa kwakama kutuvakana vaje vakeleko akulivanga, nameme vaje vakaija munima yove. 13Co lalo njikakwana nevi kuwalombele, co mukuyoya kwove kwoshe ukakala na vufuko na kasingimiko kakama manene kutuvakana vimyene voshe. 14Co nga ukanjononoka nakunyunga mashiko ange nakushika kwange, ngwe mwalingile isho Ndaviti, co njikatumisa matangwa akuyoya kwove.”
15Solomoni wakasumukile mu tulo, co wanangukile ngeci kuma Njambi nendeka nendi ku tulo. Co waile ku Yelusalema wakemanene, kulutwe lwa Cikasa ca Cikumiiyo ca Shukulu Kalunga, co wakanene vin̄ombelo vya kwenyeka na milambu ya kulitombola kuli Shukulu Kalunga. Co akumanesa walingilile ciwano vamyata vendi voshe.
Solomoni asompa n̄anda yaikalu
16Litangwa limo vikwizi vavali vezile nakwimana ku mesho a Mwene Solomoni. 17Co umo wavo wendekele ngwendi, “Shukulu, yange nou munakazi twakala mu njuvo imolika, co yange njakitile mwana wa munalume omo ikeye acili muje mu njuvo. 18Co omo kwetile matangwa avali omo njinakiti laja mwana, co na ikeye lalo wakitile mwana wa munalume. Muvuvali vwetu lika twakele muje mu njuvo, kukwakele weka lalo wai. 19Co vutsiki vumo, ou munakazi walalele a mbututu yendi, co wamusindakanene, co watsile. 20Co ku vutsiki vuje vene wendukile, wambatele munange simbu yange njili mu tulo, co wamwakele ku vulili vwendi, co ikeye waakele mwana uje wa kutsa ku vulili vwange. 21Co alikaki, omo njendukile ngeci njijamwese munange, njamwene ngeci munange natsi. Oloni omo njamwilwile mwamuvwa, njamwene ngeci kesi ikeye munange.”
22Oloni uje munakazi mukwavo wendekele ngwendi, “Embwe, ou mwanike ayoya ikeye wange, co ou wa kutsa ikeye wove!”
Uje munakazi wakulivanga wamukumbulwile ngwendi, “Embwe, ou mwanike natsi ikeye wove, co ou ali na mwonyo ikeye wange!”
Co valingile vimata ku mesho a mwene.
23Co Mwene Solomoni wendekele ngwendi, “Ou ngwendi, ‘Ou ayoya ikeye munange, ou wa kutsa ikeye munove,’ co mukwavo ngwendi, ‘Embwe, ou natsi ikeye munove.’ ” 24Co mwene washikile ngeci vamunenele mukwale, co vamunenelelewo. 25Co mwene wendekele ngwendi, “Tavuleni mwana wakuyoya mukati, co aneni mbazuvwila imo kuli munakazi umo, na mbazuvwila ikwavo ku munakazi mukwavo.”
26Co vaina ya uje mwana, vazivile manene mema ku mbunge ali munendi, co wendekele kuli mwene ngwendi, “Shukulu, shukulu, kesi mutsiye mwanike! Mwaneni vene kuli ikeye!”
Oloni uje munakazi mukwavo wendekele ngwendi, “Kesi mumwane kuli umo wetu embwe, mutavuleni vene vimbazuvwila vivali.”
27Co Solomoni wendekele ngwendi, “Kesi mutsiye mwanike! Mwaneni kuli ou munakazi wakulivanga, ikeye vene vaina mwa vushunga.”
28Omo vanu va Isalele vazivile majwi akusompa kwa Solomoni, vakele na kasingimiko kakama manene ali ikeye, omo vazivukile ngeci mwa vushunga vene Njambi namwana mana akusompa vin̄anda mu vushunga.
Currently Selected:
1 Vimyene 3: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006