1 Mizimbu 2
2
Vatekulwila va Yunda
1Yakomba wakele na vana vendi likumi na vavali mazina avo, Luvena, na Simyoni, na Levi, na Yunda, na Isakale, na Zembuloni, 2na Ndani, na Yosefa, na Mbenjemani, na Nafetali, na Ngande, na Ashele.
3Yunda wakele na vana vendi vatanu. Co kuli munakazi wendi Mbateshuwa, wa ku Kanana wakitilileko vana vatatu mazina avo, Ele, na Onane, na Shela. Co munendi wa ntwatwa, Ele, walingile vuvi manene ngeci Shukulu Kalunga wamutsiile. 4Co Yunda wakitile vana vavali kuli vainamweno Tamale mazina avo, Peleze, na Zela.
5Co Peleze wakele na vana vavali, Hezelone, na Hamule. 6Co ndolome yendi Zela wakele na vana vatanu mazina avo, Zimeli, na Etane, na Hemane, na Kalekole, na Ndalenda. 7#Yos 7:1 Kalemi wakitile Akane, umo wa vatekulwila va Zela, uje wanenele vukalu ali vanu va Isalele akunyunga vyakupukula vije vivakundikile kuli Njambi.
8Etane wakele na mwana umolika lizina lyendi, Azaliya.
Naanga ya Mwene Ndaviti
9Hezelone wakele na vana vatatu mazina avo, Njelahamele, na Lama, na Kalembi.
10Naanga kutunda kuli Lama nakweta kuli Njesi yapwile eyi. Lama wakitile Avinandave, co Avinandave wakitile Nashone ntwatwa wa ku muyati wa Yunda, 11co Nashone wakitile Salemone, co Salemone wakitile Mbowasi, 12co Mbowasi wakitile Ovende, co Ovende wakitile Njesi.
13Njesi wakele na vana va vanalume vatanu na vavali. Ntwatwa wapwile, Elyave, wamucivali Avinandave, wamucitatu Shama, 14wamuciwana Netanela, wamucitanu Landai, 15wamucitanu na umo Ozema, wamucitanu na vavali Ndaviti. 16Co wakele lalo na vana vendi va vanakazi vavali, mazina avo, Zeluya, na Avingaile.
Muna Njesi Zeluya wakele na vana vatatu va vanalume mazina avo, Avishai, na Yowave, na Ashahele. 17Co munendi mukwavo wa munakazi Avingaile washombokele kuli Njetele, mutekulwila wa Ishimela, co vakele na mwana wa munalume lizina lyendi Amasa.
Vatekulwila va Hezelone
18Co Kalembi muna Hezelone wambatele Azuva, co vakele na mwana wa munakazi lizina lyendi Njelyote. Co Njelyote wakele na vana vatatu mazina avo, Njeshele, na Shombambe, na Alendone. 19Omo Azuva watsile, co Kalembi wambatele Efaleta, vakele na mwana lizina lyendi Hule. 20Hule wakitile munendi wa munalume lizina lyendi Uli, co mutekulyendi wapwile Mbezalele.
21Omo Hezelone wakele na myaka makumi atanu na limo, co wambatele muna Makile, ndokazi ya Ngilyande. Vakele na mwana wa munalume lizina lyendi Senguve, 22co Senguve wakele na mwana lizina lyendi Njaile. Co Njaile washwanene vinganda makumi avali na vitatu mu lifuti lya Ngilyande. 23Oloni vumwene vwa Ngeshule na Alama vwahyanene vinganda makumi atanu na limo muje, kuwezelelako membo a Njaile, na Kenate, na vinganda vije vyakele kuyehi. Co vanu voshe vaje vakele muje vapwile vatekulwila va Makile, ishe ya Ngilyande. 24Omo Hezelone watsile, co munendi Kalembi wambatele Efaleta, fwile ya ishe. Co vakele na mwana lizina lyendi Ashehule, uje wawanene limbo lya Tekowa.
Vatekulwila va Njelahamele
25Njelahamele, mwana wa ntwatwa wa Hezelone, wakele na vana vatanu mazina avo, Lama ikeye ntwatwa, na Mbuna, na Olene, na Ozema, na Ahiya. 26Njelahamele wakele lalo na munakazi wendi mukwavo lizina lyendi Atala, ikeye wapwile vaina ya Oname. 27Vana va Hama ntwatwa ya Njelahamele vapwile, Maze, na Njamine, na Ekele. 28Co Oname wakele na vana vavali mazina avo, Shamai, na Njanda, co Shamai lalo wakele na vana vavali mazina avo, Nandave, na Avishule.
29Co Avishule wambatele munakazi lizina lyendi Avihaile, vakevo vakele lalo na vana va vanalume mazina avo, Ahavani, na Molende. 30Co Nandave ndolome ya Avishule wakele na vana vavali mazina avo, Selende, na Apaime, oloni Selende watsile, kakele na vana. 31Apaime wapwile ishe ya Ishi, co Ishi wapwile ishe ya Sheshane, co Sheshane wapwile ishe ya Ahelai.
32Njanda, ndolome ya Shamai, wakele na vana vavali mazina avo, Njetele, na Yonatana, oloni Njetele watsile kwakujeneka vana. 33Yonatana wakele na vana vavali mazina avo. Pelete, na Zaza. Voshe ava vapwile vatekulwila va Njelahamele.
34Sheshane kakele na vana va vanalume, kuvanga lika vana va vanakazi. Wakele na ngamba wa kaIngito, lizina lyendi Njaleha, 35co Sheshane washombwesele munendi umo kuli Njaleha. Co vakele na mwana lizina lyendi Atai.
36Ou ukewo mukana wa naanga yakutunda kuli Atai kweta kuli Elishama. Atai wakitile Natane, Natane wakitile Zavande, 37Zavande wakitile Efelale, Efelale wakitile Ovende, 38Ovende wakitile Yehu, Yehu wakitile Azaliya, 39Azaliya wakitile Heleze, Heleze wakitile Eleyasa, 40Eleyasa wakitile Sisemai, Sisemai wakitile Shalume, Shalume wakitile Yekamiya, 41Yekamiya wakitile Elishama.
Vatekulwila va Kalembi vakwavo
42Vana va Kalembi ndolome ya Njelahamele, vapwile Mesha munendi wa ntwatwa. Co Mesha wapwile ishe ya Zife, Zife wapwile ishe ya Malesha, Malesha wapwile ishe ya Hevelone. 43Co Hevelone wakele na vana vawana mazina avo, Kola, na Tapuwa, na Lekeme, na Shema. 44Shema ikeye wapwile ishe ya Lahame na mutekulu wa Njolekeyame. Lekeme, ndolome ya Shema, ikeye wapwile ishe ya Shamai, 45Shamai wapwile ishe ya Maone, Maone wapwile ishe ya Mbetezule.
46Kalembi wakele na lishano lyendi lya mbanja lizina lyendi Efa, co wakitilileko vana vatatu mazina avo, Moza, na Ngazeze. Co Halane lalo wakele na mwana lizina lyendi Ngazeze.
47Vana va Njehendai vapwile vatanu na umo mazina avo, Lengeme, na Yotame, na Ngeshane, na Pelete, na Efa, na Shafe.
48Co Kalembi wakele lalo na lishano lyendi lya mbanja lizina lyendi Maka, co wakitilileko vana vavali mazina avo, Shevele, na Tilehana. 49Co lalo wakele na vana vavali mazina avo, Shafe, uje washimbikile limbo lya Mandemana. Na munendi Sheva, uje washimbikile membo a Makevena na Ngimbeya.
Co lalo Kalembi wakele na mwana wa munakazi lizina lyendi Akesa.
50Ava vakevo vapwile vatekulwila va Kalembi. Hule ikeye mwana wa ntwatwa wa Kalembi kuli munakazi wendi Efaleta.
Co muna Hule Shombale ikeye watungile limbo lya Kilyate Njelime, 51munendi wamucivali Salema ikeye watungile limbo lya Mbetelehema, co munendi wamucitatu Halefe ikeye watungile limbo lya Mbetengandele.
52Shombale, uje watungile limbo lya Kilyate Njelime, ikeye wapwile kukulwila ya vanu va ku Haloye, vapwile litambelo lya vaje vatungile ku Menuhote, 53co cikota ca vaje vakele mu Kilyate Njelime vapwile, vaItele, vaPute, na vaShuma, na vaMishela. (Co vanu va mu vinganda vya Zola na Eshetawole vapwile va ku cikota eci.)
54Salema ikeye watungile limbo lya Mbetelehema, wapwile kukulwila wa vaNetofate, na vaAtelote Mbete Yowave, na vaZoli, vaje vapwile vikota vivali vya vaManahete.
55Vikota vya vaka-vutongwe vwakusoneka nakunungulula mikanda vaje vakele muje mwimbo lya Njaveze vapwile, vaTilate, na vaShimeya, na vaSukati. Ava vapwile vaKeni vaje valyambatelele na vaLekave.
The Bible in Mbunda ©The Bible Society of Zambia, 2006