Mateo 5
KNJ

Mateo 5

5
Jix Yalel Skꞌane Dios Naj Jesús Tet Ebꞌ Ánima Bꞌey Jun Wonan
(Lucas 6:20-23)
1Jaꞌ yet jix il-le jun miman bꞌulan ebꞌ ánima yu Naj Jesús, catuꞌ jix atoj Naj bꞌey jun wonan. Catuꞌ jix ey chotan Naj tituꞌ. Jix oc joyan ebꞌ scuywom Naj yinlaj. 2Catuꞌ jix cꞌoli scuywa xol ebꞌ jaxca tiꞌ:
3Jaꞌ ebꞌ chi yotajne el sbꞌa tol man watxꞌoj ebꞌ sattaj Dios, caw watxꞌ yet ebꞌ, yutol eyxa oc Naj Syaawil satcan Yaawiloj ebꞌ.
4Jaꞌ ebꞌ chi cus scꞌul yu spenail, caw watxꞌ yet ebꞌ, yutol oj mimancꞌulnele ebꞌ yu Dios.
5Jaꞌ ebꞌ yeynajil chi yute sbꞌa, caw watxꞌ yet ebꞌ, yutol oj yiꞌ ebꞌ jun yul yibꞌankꞌinal tiꞌ.
6Jaꞌ ebꞌ chi yoche chi waꞌxi oc sbꞌeybꞌal yin masanil scꞌul, caw watxꞌ yet ebꞌ, yutol oj oc Dios yetoj ebꞌ yin swaꞌxi oc ebꞌ.
7Jaꞌ ebꞌ chi okꞌ scꞌul yin yet animail, caw watxꞌ yet ebꞌ, yutol oj okꞌ pax scꞌul Dios yin ebꞌ.
8Jaꞌ ebꞌ cꞌam chi ẍaꞌ apnoj niꞌoj spenail bꞌey spixan, caw watxꞌ yet ebꞌ, yutol oj yiloc yin Dios ebꞌ.
9Jaꞌ ebꞌ akꞌom tan jowal, caw watxꞌ yet ebꞌ, yutol oj al-le ebꞌ yuninal oj Dios.
10Jaꞌ ebꞌ chi yil syaꞌilal, yu cꞌal tol watxꞌ sbꞌeybꞌal ebꞌ, caw watxꞌ yet ebꞌ, yutol oj oc Naj Yaaw a satcan, Yaawiloj ebꞌ.
11Jal jex jaex tiꞌ xin, ta jin yaꞌiloj yuxan chex bꞌuchlei, ta jin yaꞌiloj chex etnelei, catuꞌ chi naꞌle a kꞌane je yin, caw watxꞌ je yet.
12Tzalaanwej sicꞌlebꞌil, yutol caw miman swatxꞌilal oj je chaꞌ spaj oj bꞌey satcan. Jaxca chi yun je yilon syaꞌilal tiꞌ, queytuꞌ jix yun yilon syaꞌilal ebꞌ ẍejabꞌ Dios yet peyxa.
Jaxca Atzꞌam Atzꞌam Jon, cꞌal Sajkꞌinal Jon Yul Yibꞌankꞌinal Tiꞌ
(Marcos 9:50; Lucas 14:34-35)
13Jaxca chi yun atzꞌam yin cu loꞌbꞌe, queytuꞌ che yun yul yibꞌankꞌinal tiꞌ. Kꞌinaloj ta chi qꞌuey scꞌachiꞌal niꞌoj atzꞌam, ¿tzet to wal oj yun scꞌachiꞌbꞌi junelxa? Cꞌamxa yopiso, tuxa cꞌal chi kꞌojle eloj catuꞌ chi tecꞌletoj yu ánima. 14Jaxca junoj tzejtebꞌal, quey jex tuꞌ bꞌey yul yibꞌankꞌinal tiꞌ. Kꞌinaloj ta ey junoj conobꞌ eyoc sjolom junoj wonan, caw miman txequel sicꞌlebꞌil, cꞌam chi skeꞌ smajchelei. 15Jaꞌ yet chi cu tzejon cu tzejtebꞌal, tumi taꞌ jaꞌ yalan junoj caanteꞌ chi kaoctoj, cꞌamaj, jaꞌ yibꞌan junoj tzetyetal naat bꞌatxan aoj, jatuꞌ chi kaatoj, yet watxꞌ chi tzejtenele masanil ebꞌ eyecꞌ yul na yu. 16Jaxca junoj tzejtebꞌal tuꞌ, quey jex ojabꞌ tuꞌ xin, txeclo ojabꞌ el je sajkꞌinal sattaj ánima. Chi yal yeloc apnoj, jaꞌton je watxꞌ bꞌeybꞌal, yet watxꞌ chi yal watxꞌ kꞌane ebꞌ yin cu Mam Dios eyecꞌ bꞌey satcan.
Jix Yaltej Jesús Tzet Yopiso Sley Moisés
17Manche je naꞌ tol yu wakꞌon lawoj sley Moisés cꞌal wan cuybꞌanile jix yakꞌ ebꞌ ẍejabꞌ Dios yet peyxa, yuxan jix jin jul an. Cꞌamaj, jix jin jul an, yu jin txꞌoxon tzet yeloc apnoj masanil wan tuꞌ, yuxan jix jin jul an. 18Caw yel chi wal ey jex, tol sowalil oj yun masanil tzetyetal tzꞌibꞌebꞌilcan yul An Ley tuꞌ. Yet eyto cꞌal ecꞌ yul yibꞌankꞌinal tiꞌ cꞌal satcan, cꞌam junoj tzetyetal yul An Juun Tzꞌibꞌebꞌilcan tuꞌ tol man oj yunne. Cꞌam junoj letra, cꞌam junoj punto, tol oj ecꞌ tzet chi yalaꞌ, masantaꞌcꞌal oj yun masanil tzet tzꞌibꞌebꞌilcan tuꞌ. 19Jaꞌ mactxequel tol cꞌam chi sjije wan ley tuꞌ, caxcꞌal junoj chejbꞌanil yul an ley tol caw yeynajil ey yeloc apnoj, catuꞌ chi cuywa pax tet ánima yet watxꞌ cꞌam chi sjije pax ebꞌ. Jaꞌton jun mactxequel tuꞌ, yel xacꞌal yeynajil ey yeloc apnoj xol ebꞌ eyoc Dios Yaawiloj. Jal ebꞌ chi jijen masanil tzet chi yal ley tuꞌ xin, catuꞌ chi cuywa pax tet ebꞌ ánima yet watxꞌ chi sjijen pax ebꞌ, jaꞌton ebꞌ tuꞌ miman yeloc apnoj xol ebꞌ eyoc Dios Yaawiloj. 20Yuxan chi wal ey jex, tol sowalil watxꞌ che yute je bꞌeybꞌal yintaj sbꞌeybꞌal ebꞌ cuywam yin sley Moisés* cꞌal ebꞌ Fariseo.* Ta cꞌamaj ma cꞌaltaꞌ skeꞌ yoc Dios je Yaawiloj.
Jix Yaltej Jesús Yu Chichoncꞌulal
(Lucas 12:57-59)
21Ey bꞌey jix kabꞌ tzet albꞌilcan tet ebꞌ kichmam yet peyxa. Tol chi yal jaxca tiꞌ: “Manche je makꞌ cam je yet animail. Yal cꞌal mactxequel chi smakꞌ cam junoj yet animail, sowalil chi iꞌletoj sattaj ley, catuꞌ chi naꞌle oc yin,” ẍi ley tuꞌ.#Éxodo 20:13. 22Jaxa tinaniꞌ xin, chi wal ey jex an, tol yal cꞌal mactxequel chi chichon oc scꞌul yin junoj yet animail, sowalil oj naꞌle oc yin. Yal cꞌal mactxequel chi bꞌuchon junoj yet animail, oj naꞌle oc yin ebꞌ yu ebꞌ sat yaaw. Yal cꞌal mactxequel chi bꞌawa yin junoj yet animail, ey smey chi toocan bꞌey infierno,* bꞌey xol kꞌakꞌ. 23Yuxan, ta lalan je too je yakꞌon je saꞌbꞌeal tet Dios yet che yakꞌ tzꞌaꞌoj, catuꞌ chi tit yul je cꞌul tol ey junoj mactxequel bꞌey jix oc je penail, 24bꞌatxbꞌawej can ey je saꞌbꞌeal tuꞌ yich yajantaj yet xaambꞌal tuꞌ, catuꞌ chi too je waꞌnen yeoc junoj jowal je xol yetoj jun mactxequel tuꞌ. Chi lawi jun tuꞌ xin, chex juli, catuꞌ che yakꞌon je saꞌbꞌeal tuꞌ tet Dios. 25Kꞌinaloj ta ey junoj mactxequel chex awten sattaj naj yaaw yu junoj kꞌane, akꞌwej je yip je waꞌnen jun kꞌane tuꞌ yul-laj bꞌe yetoj, catuꞌ cꞌam chex iꞌletoj sattaj naj alcal yu. Yutol ta chex apni sattaj naj alcal tuꞌ, jaꞌ naj alcal tuꞌ chex aon oc yul skꞌabꞌ ebꞌ policía, catuꞌ chex yiꞌontoj ebꞌ preso. 26Caw yel chi wal ey jex, ma jex jajle eloj masantaꞌcꞌal tzꞌajan che yakꞌ can masanil je multa.
Jix Yaltej Jesús Yin Mule
27Ey bꞌey jix kabꞌ tzet albꞌilcan yul sley Dios, bꞌey chi yal jaxca tiꞌ: “Manche je oc je mul yul skꞌabꞌ je yichamil cꞌal yul skꞌabꞌ je yistil,” ẍi yul sley Dios.#Éxodo 20:14. 28Asan xin, jain, chi wal ey jex, yal cꞌal mac winajil chi ilon oc junoj ix ix yu yochen ocoj, chi oc smul yin snaꞌbꞌal yetoj ix. 29Kꞌinaloj jaex, ta chex akꞌle eyqꞌuey yu sbꞌakꞌ je sat bꞌey je watxꞌ, catuꞌ chi etex el je naꞌbꞌal yu, yel xacꞌal watxꞌ tol che yiꞌeltej jun sbꞌakꞌ je sat tuꞌ, catuꞌ che kꞌojon eloj. Yutol yel watxꞌ ta jaꞌ junoj tujan je mimanil chi qꞌueyeloj, yintaj pax tol masanil je mimanil chi kꞌojletoj bꞌey infierno.* 30Kꞌinaloj ta jaex, jaꞌ je watxꞌ kꞌabꞌ chex akꞌon eyqꞌueyoj, catuꞌ chi etex el je naꞌbꞌal yu, yel xacꞌal watxꞌ tol che tzokꞌel jun je watxꞌ kꞌabꞌ tuꞌ, catuꞌ che kꞌojon eloj. Yutol yel watxꞌ je yet ta junoj tujan je mimanil chi qꞌueyeloj, yintaj pax tol masanil je mimanil chi kꞌojletoj bꞌey infierno.
Scuybꞌanil Ebꞌ Chi Spoꞌole Sbꞌa Yetoj Yetbꞌi
(Mateo 19:9; Marcos 10:11-12; Lucas 16:18)
31Albꞌil pax can junxa tiꞌ yet peyxa tuꞌ: “Jaꞌ mac chi spoꞌole sbꞌa yetoj yistil, sowalil chi swaꞌne an yuunal poꞌolebꞌail naj, catuꞌ chi yakꞌon can an naj tet ix,” ẍi.#Deuteronomio 24:1. 32Asan xin, jain chi wal ey jex, ta ey junoj mactxequel chi spoꞌole sbꞌa yetoj yistil, ta cꞌam pax smul ix ix tuꞌ chi yaoc yul skꞌabꞌ yichamil tuꞌ, tol jaꞌ naj chi aontoj ix yin amulal tuꞌ bꞌian. Yetoj pax oj, ta ey junoj mactxequel chi iꞌon ix jix spoꞌole sbꞌa yetoj yichamil tuꞌ, mul chi yun naj.
Cꞌam Chi Skeꞌ Comon Cꞌal Chi Cu Loctej Bꞌie
33Ey bꞌey jix kabꞌ tzet jix al-le can tet ebꞌ kichmam yet peyxa, yet jix yal jaxca tiꞌ: “Ta che loctej sbꞌi Naj Kaawil yet che yakꞌon je tiꞌ yin junoj tzetyetal, sowalil che yakꞌ yun tzet che yal tuꞌ,” ẍi. 34Asan xin, jain chi wal ey jex, cꞌam ojabꞌ bꞌakꞌin che loctej junoj yal cꞌal tzet bꞌieal. Ma skeꞌ je locontej sbꞌi satcan, yutol jaꞌ tituꞌ, chotan ey Dios yakꞌon Yaawil, yutol sdespacho yei. 35Yetoj pax sat txꞌotxꞌ tiꞌ, ma skeꞌ je locbꞌan sbꞌi, yutol jaxca tol sbꞌatxlubꞌ yajan Dios yei. Yetoj pax conobꞌ Jerusalén, ma skeꞌ je locbꞌan sbꞌi, yutol sconobꞌ Naj Rey miman yeloc apnoj. 36Yetoj pax je jolom, cꞌam chi skeꞌ che loctej, yutol man je yetoj yul je yet. Ilaꞌ tol cꞌam chi skeꞌ je yu je yakꞌon sajbꞌoj ma je yakꞌon kꞌejbꞌoj junoj xil je yaꞌ. 37Jaꞌ yet chex kꞌanabꞌ xin, “ye,” je chi. “Cꞌamaj,” je chi. Ma skeꞌ je locontej yal cꞌal tzet bꞌieal, yutol jaꞌ bꞌey naj diablo chi tit wan tuꞌ.
Pena Ta Chi Kaecꞌ Spaj
(Lucas 6:29-30)
38Ey bꞌey jix kabꞌ tzet albꞌilcan yet peyxa, yet chi yal jaxca tiꞌ: “Ta ey mac chi smakꞌ poꞌo sbꞌakꞌ sat yet animail, makꞌle ojabꞌ pax poꞌo yet jun tuꞌ. Ta ey mac chi makꞌon eltej yee yet animail, makꞌle ojabꞌ pax eltej yet jun tuꞌ,” ẍi.#Éxodo 21:24; Levítico 24:20; Deuteronomio 19:21. 39Asan xin, jain chi wal ey jex an, Manche je pajtze penacꞌulal tet je yet animail. Jaꞌ tiꞌ je yet, ta ey mac chi makꞌontoj jun pacꞌoj je tiꞌ, che jacbꞌatoj jun pacꞌxa tet ebꞌ. 40Ta ey mac chi yoche chi tokꞌon ecꞌ je camiẍ sattaj ley, jajwej pax cantoj pax je chumpa. 41Yetoj pax oj, ta ey mactxequel chex tenon oc yalan yijatz yu stoo je yakꞌon yul-laj bꞌe nanoj legua, asiꞌ akꞌwej can junoj legua tet.#5:41 Jaꞌ ebꞌ Israel eyoc ebꞌ yalan yaawil ebꞌ yaaw mílitar, yu jun tuꞌ, yuxan jaꞌ ebꞌ yaaw a Roma chi skeꞌ stenon oc ebꞌ yalan ijatz. 42Yal cꞌal mactxequel chi kꞌanon smaane junoj tzetyetal ey jex, akꞌwej tet, manche je bꞌasne.
Cu Camcꞌulne Ebꞌ Chi Chichon Oc Scꞌul Kin
(Lucas 6:27-28, 32-36)
43Ey bꞌey jix kabꞌ tzet albꞌilcan yet peyxa, tol chi yal jaxca tiꞌ: “Jaꞌ ebꞌ watxꞌ je yakꞌon yetoj, camcꞌulnewej ebꞌ. Jal ebꞌ pena je yakꞌon yetoj xin, chichon ojabꞌ oc je cꞌul yin ebꞌ,” ẍi.#Levítico 19:18. 44Asan xin, jain chi wal ey jex an, sowalil che camcꞌulne ebꞌ chi jowi oc je yin. Jaꞌ ebꞌ chi kꞌanontej sjowal scꞌul Dios je yibꞌan, jaꞌ ojabꞌ swatxꞌcꞌulal Dios tuꞌ che kꞌantej yibꞌan ebꞌ. Akꞌwej watxꞌcꞌulal tet ebꞌ chi jowi oc je yin. Txalanwej yu ebꞌ chex bꞌuchoni, cꞌal ebꞌ chex etneni. 45Jaxca ton tiꞌ oj je yute je txꞌoxon eloj tol yuninal jex cu Mam eyecꞌ bꞌey satcan. Yutol jaꞌ cu Mam tuꞌ, chi yakꞌ aol cꞌu yibꞌan ebꞌ pena cꞌal ebꞌ watxꞌ. Yetoj pax oj, chi ey nabꞌ yibꞌan ebꞌ pena snaꞌbꞌal, yetoj pax yibꞌan ebꞌ watxꞌ snaꞌbꞌal. 46Ta asan chꞌan ebꞌ chex camcꞌulneni oj je camcꞌulne pax oj, ¿tumi taꞌ oj je chaꞌ spaj jun je camcꞌulal tuꞌ che naꞌ? Tol jaꞌ ebꞌ tejom el toolabꞌal* queyton tuꞌ chi yun pax ebꞌ. 47Yetoj pax oj, ta asanne yetoj ebꞌ je watxꞌil ánima bꞌey watxꞌ je kꞌanabꞌi. ¿Ta watxꞌ jaxca tuꞌ che naꞌ? Tol jaꞌ ebꞌ man to otajnenoj Dios, quey pax tuꞌ sbꞌeybꞌal ebꞌ. 48Tzꞌajaji ojabꞌ che yun yin masanil tzetyetal watxꞌ xin, jaxca cu Mam eyecꞌ bꞌey satcan, tzꞌajan yin masanil tzetyetal watxꞌ.

© 2016, Wycliffe Bible Translators, Inc. All rights reserved.


Learn More About Jaꞌ An Biblia Yin Akateko

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.