Zacarías 8
8
Oj Ẍaꞌ Watxꞌcꞌulal Jerusalén Junelxa
1Jaꞌ Jehová, Naj Miman Yeoc Yipalil jaꞌ jix alon jun kꞌane tiꞌ ey jin jaxca tiꞌ: 2Caw ey sjowal jin cꞌul yu tzet chi yun yetnele Sión. 3Oj jin meltzo bꞌey Jerusalén, catuꞌ chin caey tituꞌ junelxa. Ta jaxca tuꞌ, jaꞌ Jerusalén tiꞌ oj yij Conobꞌ Jijem, junelxa. Jaxa jin wonan jain Jehová jin tiꞌ, oj yij sbꞌi jun Wonan Asanne jin ey wet jin txꞌojli. 4Ebꞌ icham winaj, cꞌal ebꞌ ixnamil ix, oj ey chotan ebꞌ junelxa bꞌey txombꞌal bꞌey Jerusalén. Yin xacꞌal kꞌojoche oj ecꞌ ebꞌ, yutol caw icham ánima xa ebꞌ. 5Jaꞌ txombꞌal, nonaj xacꞌal el yu ebꞌ winaj unin, cꞌal ebꞌ ix unin chi sajchi tituꞌ. 6Jaꞌ yet tuꞌ, jaꞌ ebꞌ ánima ey can bꞌey yul jun conobꞌ tuꞌ, tuxa cꞌal oj qꞌueya scꞌul ebꞌ yilon jun tuꞌ. Jal pax jin jain tiꞌ, man oj qꞌueya jin cꞌul wiloni. Jain ton Jehová jin chi wal wan tiꞌ. 7Jain oj jin colel ebꞌ jin conobꞌ bꞌey yul skꞌabꞌ wan nación ey yetcꞌulal bꞌey chi aol cꞌu, cꞌal bꞌey chi too cꞌu. 8Oj lawoj tuꞌ, oj wiꞌontej caey ebꞌ bꞌey Jerusalén tiꞌ junelxa. Jaꞌ ebꞌ oj oc jin conobꞌoj, jain xa oj jin oc sDiosaloj ebꞌ. Oj wakꞌ yaawil xol ebꞌ yin sjichanil, jaxca jix yun waloni, ẍi Dios. 9Jaꞌ Jehová, Naj Miman yeoc Yipalil, chi alon jaxca tiꞌ: Tecꞌan che yute je bꞌa, jaex tol lalan je yabꞌen wan kꞌane jix yalel ebꞌ jin chejabꞌ yet tax cꞌal jix ey yich scaꞌ waꞌnele a jin templo, jain Jehová, yaaw jin tiꞌ. 10Jaꞌ yet yalantoj jun cꞌual tuꞌ, cꞌam bꞌey chi tit stool ebꞌ naj mulnawom, cꞌal stool noꞌ che chi mulnai. Yu cꞌal ebꞌ chi jowi oc kin, yuxan cꞌam watxꞌcꞌulal xol ebꞌ chi eltoj ecꞌabꞌ niꞌoj, yutol jain jix waoc wan scajat ebꞌ yin wanxa ebꞌ. 11Yuxan jaꞌ tinaniꞌ, jain caw Jehová Yaaw jin chi walaꞌ, tol manxa oj wun yin ebꞌ chi cancan bꞌey jun conobꞌ tiꞌ, jaxca jix wun yet yalantoj. 12Yin xacꞌal watxꞌcꞌulal oj caey ecꞌ ebꞌ. Jaꞌ sat yuva ebꞌ, caw oj yakꞌ sat. Jaꞌ xꞌotxꞌ ebꞌ, yel xacꞌal oj yakꞌ sat yawo ebꞌ, jaꞌ satcan oj eytej yal akꞌbꞌal. Jain xa oj wakꞌ masanil wan tuꞌ tet ebꞌ ánima chi to cancan bꞌey jun conobꞌ tiꞌ. 13Jaxca jix yun je bꞌina jaex Judá jex tiꞌ, cꞌal jaex Israel jex tiꞌ, yet jix yalon can el syaꞌtajilal ebꞌ conobꞌlaj, jaꞌ tinaniꞌ xin, oj jex jin coleloj, catuꞌ oj jex bꞌina yin swatxꞌilal. Cꞌam ojabꞌ cꞌal chex xiwi, asan tol che tecꞌbꞌa je bꞌa, ẍi Dios.
14Jain ton Jehová, yaaw jin chi walaꞌ: Jix jin naꞌ tol chi waoc syaꞌilal ebꞌ je mam icham yet jix xꞌemontej jin jowal ebꞌ. Jaꞌ tzet jix jin naꞌ tuꞌ, jix wunne. 15Quey pax tuꞌ tinaniꞌ xin, jix jin naꞌ tol jaꞌ swatxꞌilal oj wun bꞌey Jerusalén cꞌal bꞌey Judá. Yu jun tuꞌ, yuxan cꞌam ojabꞌ chex xiwi. 16Jaꞌton wan tiꞌ sowalil oj je yun jaex tiꞌ. Asanne ojabꞌ cꞌal tzetyetal yel che yal ey jex junjun jex. Watxꞌ cꞌal chi yun je waꞌnen yeoc junoj jowal, yet watxꞌ ey watxꞌcꞌulal je xol. 17Cꞌam ojabꞌ che yun spenail ey jex junjun jex, cꞌam ojabꞌ che yakꞌ je tiꞌ yin lekꞌtiꞌal ey jex junjun jex. Jain caw Jehová jin chi walaꞌ, tol cꞌam chi woche masanil wan bꞌeybꞌale tuꞌ, ẍi Dios. 18Jix kꞌanabꞌ Jehová, Naj Miman Yeoc Yipalil ey jin jaxca tiꞌ: 19Qꞌueynaj jex che yijle nocha je bꞌa yet scan xꞌaaw, cꞌal yet sjoꞌ, yet sjuj, cꞌal yet slaonebꞌ xꞌaaw, jal tinaniꞌ yin tzalacꞌulal oj yun yoc kꞌin je yu jaex yicꞌaal Judá. Yu jun tuꞌ, camcꞌulnewej sjichanil cꞌal watxꞌcꞌulal, ẍi Dios. 20Jaꞌ Jehová, Naj ey Yipalil chi alon jaxca tiꞌ: Eyto cꞌal ebꞌ ánima oj tit bꞌey wanxa mimej conobꞌlaj, yet oj jul ebꞌ bꞌey Jerusalén. 21Jaꞌ ebꞌ caan bꞌey jun conobꞌ tuꞌ, oj yal ebꞌ tet junojxa conobꞌ jaxca tiꞌ: Toonwej, oj cu kꞌanwej tet Jehová, Naj Yaaw Miman yeoc Yipalil, yet chi yakꞌ swatxꞌcꞌulal ey jon, ẍi ebꞌ. Jal wanxa ebꞌ oj yal ebꞌ jaxca tiꞌ: Oj jon toj cꞌal pax jaon tiꞌ, ẍi ebꞌ. 22Catuꞌ caw ecꞌal conobꞌlaj, cꞌal nacionlaj caw ey yipalil oj jul bꞌey Jerusalén, yet chi jul ebꞌ yin eyilal bꞌey Jehová, yu skꞌanon swatxꞌcꞌulal Naj ebꞌ. 23Jaꞌ yet tuꞌ, laonwan ebꞌ txꞌoj conobꞌal oj oc nicꞌan yin spichil junoj Israel, catuꞌ oj yalon ebꞌ jaxca tiꞌ: Chi koche chi cu oc je yetoj, yutol jix kabꞌe tol jaꞌ Dios eyoc je yetoj jaex tiꞌ, ẍi ebꞌ, ẍi Jehová.
Currently Selected:
Zacarías 8: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
