Romanos 3
3
1Jal ebꞌ wet Israelal, ¿Cꞌam yeloc apnoj yet ebꞌ che naꞌ tinaniꞌ? Yetoj jun yechel chi yij circuncisión tuꞌ, ¿cꞌam yopiso che naꞌ? 2Cꞌamaj, oj waltoj ey jex tzet yuxan miman yeloc apnoj. Jaꞌ tet ebꞌ Israel jix yakꞌ can skꞌane Dios. 3Ey ton ebꞌ man yanaj oj oc scꞌul yin Dios, ¿tumi yuxan, man oj yun tzet yalnaj can Dios? 4Cꞌamaj, caw yel oj yunne. Caxcꞌal cꞌam chi yun tzet chi yal junjun ánima, jaꞌ Dios chi cꞌal yun tzet chi yalaꞌ. Jaꞌ yul An Juun Tzꞌibꞌebꞌilcanoj chi alon jaxca tiꞌ tet Dios:
Yuxan, chi txeclo eloj, tol caw yel jichan jaach, Mamin.
Jaꞌ yet chi yakꞌlen ebꞌ ánima snaꞌon oc ja win, cꞌam niꞌoj ja penail chi ilcha el ja win yu ebꞌ, ẍi yul An Juun.#Salmos 51:4.
5Jaon tiꞌ, man jichanoj jon. Yu man jichanoj jon, yuxan jaꞌ chi akꞌon txeclo eloj, tol asan Dios jichan. ¿Tzet je chi? ¿Tumi man jichanoj Dios tuꞌ yet chi yakꞌon syaꞌtajil kibꞌan yutol man jichanoj jon, caxcꞌal yu man jichanoj jon, yuxan chi txeclo eloj, tol asan Dios jichan? Ey ánima queytuꞌ snaꞌon jaxca tuꞌ. Man jaxca oj tuꞌ chi snaꞌ Dios. 6Caw man pax jaxca oj tuꞌ. Kꞌinaloj ta man jichanoj Dios tinaniꞌ, ma skeꞌ snaꞌon oc yin ánima yul yibꞌankꞌinal tiꞌ.
7Ey ebꞌ chi naꞌon jaxca tiꞌ. Jaꞌ yet chi wakꞌon lekꞌtiꞌal, lalan jin txꞌoxon eloj, tol asan Dios yel, chi yalaꞌ. Ta tol chin txꞌoxel swatxꞌil Dios yu jun lekꞌtiꞌal chi wakꞌ tuꞌ an xin, ¿tzet yuxan jaꞌ yet chi snaꞌon oc Dios win an, chin al-le penawomal an? ẍi ebꞌ. 8Ey ebꞌ chi aloni, tol jaxca tiꞌ chi wal an. Ta tol jaxca tuꞌ xin, “yel watxꞌ chi cu a can yin spenailal, yet watxꞌ chi txeclo eloj tol asan Dios watxꞌ,” jin chi abꞌ yal ebꞌ. Jaꞌ ebꞌ chi alon wan tuꞌ, caw smoo ebꞌ stoo can bꞌey syaꞌtajilal.
Cꞌam Junoj Mac Jichan Sbꞌeybꞌal
9¿Tzet je chi xin? ¿Tumi yel watxꞌ jon jaon Israel jon tiꞌ yintaj ebꞌ man Israeloj? Cꞌamaj, laan jon cꞌal yetoj ebꞌ. Yutol tuxa jix wal an, tol cu masanil, caxcꞌal Israel jon, ma man Israeloj jon, penawom jon. 10Jaꞌ yul An Juun chi alon jaxca tiꞌ:
Cꞌam junoj mactxequel watxꞌ, cꞌam cꞌal junoj.
11Cꞌam junoj mactxequel chi naꞌcha el yu. Cꞌam junoj chi seyon ecꞌ Dios.
12Masanil ebꞌ chi bꞌejon can watxꞌ bꞌeybꞌale. Masanil ebꞌ chi etex el snaꞌbꞌal. Cꞌam junoj ebꞌ chi unen watxꞌilal, cꞌam cꞌal junoj.#Salmos 14:1-3; Salmos 53:1-3; Eclesiastés 7:20.
13Jaxca bꞌey tol to chi muji junoj camom, catuꞌ jajan eloj, caw eyxa sabꞌ, queytuꞌ wan spenail tzet chi yal ánima. Tucꞌal chi xijwi kꞌane yin ebꞌ yet animail.#Salmos 5:9.
Jaxca svenenoal stiꞌ noꞌ labꞌa, queytuꞌ wan spenail tzet chi yal ebꞌ tuꞌ.#Salmos 140:3.
14Asan bꞌawal chi yun ebꞌ, cꞌal pena kꞌane chi yal ebꞌ.#Salmos 10:7.
15Comon cꞌal chi smakꞌ cam junoj yet animail ebꞌ.
16Yal cꞌal bꞌey chi ecꞌ oc ebꞌ, chi etex el wanojxa ánima yu ebꞌ.
Chi tit can cuscꞌulal yu ebꞌ.
17Cꞌam niꞌoj watxꞌcꞌulal yin ebꞌ yetoj yet animail.#Isaías 59:7, 8.
18Cꞌam niꞌoj chi xiw ebꞌ tet Dios, ẍi yul An Juun tuꞌ.#Salmos 36:1.
19Kotaj tol jaꞌ masanil tzet tzꞌibꞌebꞌilcan yul ley, jaꞌ chi alon tet ebꞌ eyoc yalan jun ley tuꞌ, yet watxꞌ cꞌam tzet chi skeꞌ stakꞌwi junoj mactxequel. Yuxan Dios oj naꞌon oc yin masanil ánima yul yibꞌankꞌinal tiꞌ. 20Cꞌam junoj mactxequel watxꞌ yul sat Dios asan yu chi sjije tzet chi yal ley tuꞌ. Yutol jaꞌ ley tuꞌ, asan yopiso yu xꞌoxoni, tol penawom jon cu masanil.
Chi Cu Colchai, Yutol Chi Kaoc Cristo Yin Cu Cꞌul
21Jaꞌ tinaniꞌ, xax txeclo eloj tzet utbꞌil chi yun koc watxꞌil yul sat Dios. Man yu oj cu jijen sley Moisés, yuxan chi cu oc watxꞌil yul sat Dios. Jaꞌ yul An Juun bꞌey tzꞌibꞌebꞌilcan ley tuꞌ, jatuꞌ chi yalaꞌ, tzet chi yun koc watxꞌil. Yalnaj pax can ebꞌ ẍejabꞌ Dios yet peyxa yin jun tiꞌ, jaꞌton ebꞌ profeta. 22Asan yu chi kaoc cu cꞌul yin Jesucristo, yuxan watxꞌ jon yul sat Dios, yutol yal cꞌal mac chi yaoc Cristo yin scꞌul, chi oc ebꞌ watxꞌil yul sat Dios, yutol laan jon cꞌal cu masanil jaon ánima jon tiꞌ yul sat Dios. 23Yutol masanil ánima chi oc spenail, cꞌam junoj watxꞌ chi yute sbꞌa sattaj Dios. 24Tol yu swatxꞌcꞌulal Dios, yuxan chi cu oc yin swatxꞌilal sattaj Dios tinaniꞌ, yutol colbꞌil jon xa yu Cristo Jesús. Tucꞌal chi yakꞌa, cꞌam tzet chi kun yu. 25Jaꞌ Naj Cristo jix oc yin xaambꞌalil yu Dios. Jix el ẍiqꞌuil naj, yu yiꞌon el cu penail yet chi kaon oc cu cꞌul yin naj. Queytuꞌ jix yute Dios xꞌoxoni, tol caw jichan jix yute sbꞌa peyxa tuꞌ, yet miman cꞌal jix yute scꞌul yin ebꞌ jix oc spenail tet Dios, 26yu pax xꞌoxoni, tol jacꞌalaꞌ jichan chi yute sbꞌa tinaniꞌ yet chi cu yaon oc yin swatxꞌilal. Watxꞌ jon yul sat, mac jon chi kaoc cu cꞌul yin Jesús.
27Jaꞌ tinaniꞌ, ¿chim skeꞌ kiꞌon a can cu bꞌa che naꞌ? Caw cꞌam ton chi skeꞌ, yutol man yu oj chi cu jije sley Moisés, yuxan chi cu colchai. Tol asan yu chi kaoc cu cꞌul yin Jesús, yuxan chi cu colcha eloj. Yu tuꞌ xin, cꞌam chi skeꞌ kiꞌon a can cu bꞌa. 28Yuxan, kotaj tol asan yu chi kaoc cu cꞌul yin Jesús, yuxan watxꞌ jon yul sat Dios, man yu oj cu jijen tzet chi yal jun ley tuꞌ.
29Jaꞌ Dios, man sDiosaloj ebꞌ Israel xꞌojli, sDiosal pax ebꞌ man Israeloj. Caw yel cu Diosal cꞌal cu masanil. 30Yutol junne Dios ey jon yet cu masanil. Yal cꞌal mactxequel, caxcꞌal a Israel, caxcꞌal man Israeloj, ta tol chi yaoc scꞌul ebꞌ yin Jesús, watxꞌ ebꞌ yul sat Dios. 31Yel toni, asan yu chi kaoc yin cu cꞌul, yuxan chi cu colchai. ¿Tumi yuxan chi skeꞌ kaloni, tol cꞌamxa yopiso sley Moisés? Cꞌamaj, ma skeꞌ kalon jaxca tuꞌ. Jaꞌ jun tiꞌ ket, tol chi cu txꞌoxel yopiso jun ley tuꞌ.
© 2016, Wycliffe Bible Translators, Inc. All rights reserved.