Proverbios 9
9
Cꞌam Chi Ẍaꞌle Sbꞌa Jelanil Yetoj Comon Naꞌbꞌale
1Jaꞌ jelanil laan jaxca junoj ix ix, tol jix swaꞌne a sna,
watxꞌ xacꞌal jix yun swaꞌneni, jujebꞌ yoyal chi yaocoj.
2Jix lawi tuꞌ, chi smakꞌon cam wan noꞌ noꞌ, jix swaꞌnen jun miman loꞌbꞌe ix, jix swaꞌne vino caw wal watxꞌ, catuꞌ jix swaꞌnen ey smeẍa ix.
3Jix lawi tuꞌ, jix ẍejontoj wan yakꞌomal servil ix, yet chi yalon el ebꞌ bꞌey txꞌotxꞌ tzalquiltaj yinlaj conobꞌ.
4Jix yalon ebꞌ jaxca tiꞌ: Jex achꞌe tol cꞌamto je naꞌbꞌal, titanwej. Jex cꞌamto je jelanil titanwej,
5tol oj jex lowoj cꞌal je yuqꞌuen vino jix jin waꞌne.
6Ta che yoche chex eecꞌ yin tzalacꞌulal, bꞌejwej can je pena naꞌbꞌal tuꞌ, yet watxꞌ chex iquisbꞌi cꞌal ecꞌoj, bꞌeybꞌalnewej sbꞌeybꞌal ebꞌ ey snaꞌbꞌal, ẍi ebꞌ ẍejabꞌ ix tuꞌ. Jaꞌ jun ix jix wil tuꞌ, jaꞌton jelanilal.
7Ta tol cha wakꞌ cuenta ebꞌ bꞌuchwawom, asan cꞌal pena kꞌane oj yal ebꞌ ja win. Ta tol cha wakꞌ cuenta ebꞌ penawom, tucꞌal oj bꞌuchwa ebꞌ ja win.
8Ta tol cha tenchane ebꞌ ánima chꞌaan sjolom, tucꞌal oj tit sjowal ebꞌ ja win. Ta tol cha wakꞌ cuenta ebꞌ ey snaꞌbꞌal, oj tzala ebꞌ ja wetoj. Oj jaach yoche ebꞌ.
9Ta tol cha cuy ebꞌ jelan, yel xacꞌal jelan oj eloc ebꞌ; ta cha cuy ebꞌ ánima watxꞌ snaꞌbꞌal, yel xacꞌal oj jelanbꞌoj el ebꞌ yotajnen el masanil tzetyetal.
10Jaꞌ yichbꞌanil jelanil, tol ey ojabꞌ yeloc apnoj Jehová yul cu sat; cꞌal kotajnen el Naj tol asanxane ocoj, yuxan caw jelan chi eloc cu naꞌbꞌal.
11Jaꞌ yu jelanil tuꞌ; yuxan miman tiempo oj jaach eecꞌ yul yibꞌankꞌinal tiꞌ, caw ecꞌal abꞌil oj jaach ecꞌ bꞌey yul yibꞌankꞌinal tiꞌ.
12Ta jelan jaach, ja wet cꞌal oc swatxꞌilal oj yakꞌ Jehová; ta tol chꞌaan cha wute ja bꞌa xin, junel cꞌal cha loctej ja wibꞌan.
13Jaꞌ junoj ix ix cꞌam snaꞌbꞌal, caw jelan chi yute kꞌanabꞌ sbꞌa, cꞌam chi qꞌuixwi niꞌoj, cꞌam pax niꞌoj tzet yotaj.
14Tucꞌal chi ey chotan yul junoj ẍila stiꞌ sna, bꞌey junoj tzalquiltaj naat yea yul conobꞌ,
15catuꞌ chi yawtentej ebꞌ chi ecꞌabꞌ bꞌey yul-laj bꞌe.
16Chi yalon ix tet ebꞌ achꞌe jaxca tiꞌ: Jex achꞌe tol cꞌam je jelanil, titanwej, ẍi ix. Chi yal cꞌal pax ix tet ebꞌ cꞌamto snaꞌbꞌal:
17Jaꞌ ja jaꞌ tol chi elkꞌanelei, yel xacꞌal chiꞌ yuqꞌui jaꞌ; jaꞌ niꞌoj loꞌbꞌe chi cu loꞌ yin ewantajil, yel xacꞌal watxꞌ,#9:17 Jaꞌ jun tiꞌ, amulal chi yaltej yin qꞌuexan kꞌaneal. ẍi ix.
18Jaꞌ ebꞌ achꞌe cꞌam snaꞌbꞌal tuꞌ, man yotaj oj ebꞌ ta tol jaꞌ yul sbꞌeal camich lalan stoo ebꞌ, yutol camnajxa ebꞌ chi awtele yu ix ix tuꞌ tinaniꞌ.
© 2016, Wycliffe Bible Translators, Inc. All rights reserved.