Proverbios 7
7
Montebꞌal Skꞌane Junoj Ix Amul Ix
1Jaach jin cꞌaal, chaꞌ ja wabꞌ cuybꞌanile chi walaꞌ;
jaꞌ wan jin chejbꞌanil tiꞌ, tol cha cꞌubꞌa yin ja naꞌbꞌal.
2Jije jin chejbꞌanil, cꞌal cuybꞌanile chi walaꞌ; tol cha yaꞌilne jaxca chi yun ja teynen sbꞌakꞌ ja sat, yet watxꞌ oj naatbꞌoj ja kꞌinal.
3Naꞌan ojabꞌ cꞌal ja wu, catuꞌ cha cꞌubꞌan yin ja naꞌbꞌal, jaxca ojabꞌ tol cha mitxꞌ eyoj.
4Camcꞌulne ja jelanilal jaxca junoj ja wanabꞌ, cꞌal ja naꞌbꞌal jaxca yeoc junoj ja watxꞌil ánima.
5Queytuꞌ oj yun ja colcha el yul skꞌabꞌ ebꞌ ix amul ix, jaꞌton ix amul ix tol watxꞌ xacꞌal chi yun skꞌanabꞌ yetoj montebꞌal kꞌane.
6Ey jun cꞌual jix wileltoj bꞌey yul sventanail jin na.
7Ey wan ebꞌ achꞌe tol cꞌam snaꞌbꞌal; jix wilon jun naj tol yel xacꞌal cꞌam snaꞌbꞌal xol ebꞌ tuꞌ.
8-9Jaꞌ yet lalanxa yeycꞌu yet jix kꞌejbꞌi xacꞌal eyoj, jix apni oc naj bꞌey xiquinlaj calle, catuꞌ jix kꞌaxbꞌon ecꞌtoj yul junxa calle, yetcꞌulal bꞌey ey sna jun ix amul ix tuꞌ.
10Jaꞌ yet jix il-letej naj yu ix amul ix tuꞌ, catuꞌ jix jul chaꞌle naj yu ix, eyoc spichil ebꞌ amul ix yu ix, caw pena tzet chi snaꞌ ix.
11Comon cꞌal chi kꞌanabꞌi, cꞌam chi qꞌuixwi niꞌoj, cꞌam chi yal scꞌul chi eecꞌ bꞌey sna.
12Asan cꞌal yul-laj calle chi ecꞌabꞌi, cꞌal bꞌey txombꞌal, cꞌal bꞌey xiquinlaj calle, jaꞌ tituꞌ chi yechbꞌane yecꞌ junoj winaj catuꞌ chi yakꞌon eyqꞌueyoj.
13Jaꞌ jun ix ix tuꞌ, yin eymanil jix oc lakꞌan ix yin jun achꞌe tuꞌ, catuꞌ jix tzꞌubꞌle el stiꞌ naj achꞌe tuꞌ yu ix, cꞌamxa cꞌal chi qꞌuixwi niꞌoj, jix yalon jaxca tiꞌ:
14Jaꞌ tinaniꞌ jix wakꞌ jin xaambꞌal yet watxꞌcꞌulal tet ebꞌ jin diosal, bꞌey wakꞌnaj can jin tiꞌ, yuxan caw ey chiꞌbꞌe bꞌey jin na tinaniꞌ.
15Yu jun tuꞌ, yuxan jix jin eltej yet chach jul jin chaꞌoni; caw chi woche xacꞌal chi wiloc ja win. Tuxa wal jix jaach chaꞌlo el wu tinaniꞌ.
16Jaꞌ bꞌey sat jin txꞌat jix jin waꞌne ey jun an sábana tol lino cꞌal eloj titnaj an bꞌey Egipto.
17Jix waoc perfume yin, tol sukꞌukꞌi xacꞌal yoc sabꞌ. Jaꞌ teꞌ mirra, teꞌ áloe cꞌal teꞌ canela jix waoc yin an.
18Yuxan toon wetoj bꞌey jin na tuꞌ, oj kakꞌ wal tzalabꞌoj cu cꞌul masantaꞌcꞌal oj sajbꞌoj. Oj kakꞌ wal tzalabꞌoj cu cꞌul cu camcꞌulnen cu bꞌa ja wetoj.
19Yutol cꞌam naj wichamil eyecꞌ bꞌey jin na tinaniꞌ; yutol caw naat eytoj naj.
20Jix yiꞌtoj jun txꞌuye chꞌen tumin naj, yuxan ma tocꞌal meltzo naj yin eymanil, masantaꞌcꞌal yet chi nanbꞌi jun xꞌaaw tiꞌ catuꞌ chi jul naj, ẍi ix ix tuꞌ tet naj.
21Jaꞌ yu wan montebꞌal skꞌane jun ix ix tuꞌ, yuxan yin jun txolan jix moncha naj achꞌe tuꞌ yu ix.
22Jix oc tzajan naj yintaj ix ix tuꞌ, laan wal jaxca chi yun yiꞌletoj junoj noꞌ wacax bꞌey chi makꞌle camoj, ma jaxca junoj noꞌ scꞌultajil che chi eyqꞌuey yul junoj txꞌan yaal,
23masantaꞌcꞌal chi ecꞌtoj junoj julbꞌal yul spixan. Ma jaxca junoj noꞌ tzꞌiquin chi oc yul junoj txꞌan yaal, queyton tuꞌ chi eloc ebꞌ achꞌe comon cꞌal chi yun spenail yetoj junoj ix amul ix, cꞌam chi snaꞌ sbꞌa niꞌoj ta jaꞌ tituꞌ oj jul camich yibꞌan.
24Yu jun tuꞌ xin jaach wuninal, abꞌ tzet chi walaꞌ. Aoc ja naꞌbꞌal yin jin kꞌane tiꞌ.
25Cꞌam ojabꞌ cha wetne el ja bꞌeybꞌal yin junoj ix ix pena snaꞌbꞌal; cꞌam ojabꞌ cha wakꞌ qꞌueytoj ja naꞌbꞌal yu ix.
26Yutol ecꞌalxa mactxequel chi cam yu ebꞌ ix ix queytuꞌ sbꞌeybꞌal; cꞌamxa chi bꞌischa jantaj mactxequel xax cam yu ebꞌ ix.
27Ta tol chach too yul sbꞌeal sna ix ix tuꞌ, jaxca wal tol lalanxa ja too yul sbꞌeal camich.
© 2016, Wycliffe Bible Translators, Inc. All rights reserved.