Proverbios 22
22
1Yel xacꞌal watxꞌ ta tol watxꞌ cu bꞌinalei,
yintaj pax tol ey mimanoj chꞌen oro cꞌal chꞌen plata ey yul cu kꞌabꞌ.
2Jaꞌ junoj bꞌeom, cꞌal junoj mebꞌa, laan cꞌal el ebꞌ, jaꞌ ebꞌ cawan tuꞌ, jaꞌ Jehová jix waꞌnen ebꞌ.
3Jaꞌ mactxequel ey snaꞌbꞌal, chi yil tzetyetal ey smey, man comonoj chi yatoj sbꞌa xol; jal pax mactxequel tol cꞌam snaꞌbꞌal xin, comon cꞌal chi yatoj sbꞌa yin junoj tzetyetal, masantaꞌcꞌal chi eyqꞌuey yu syaꞌtajilal tuꞌ.
4Ta yeynajilal chi kute cu bꞌa, ta tol ey yeloc apnoj Jehová yul cu sat, chi kiꞌ cu bꞌeomal, chi cu bꞌinale ecꞌoj, catuꞌ chi naatbꞌi pax cu kꞌinal.
5Jaꞌ yul sbꞌe ebꞌ penawom, jaxca tol ey teꞌ qꞌuix cꞌal txꞌan yaal eey yul sbꞌe ebꞌ; jal pax mactxequel tol chi steyne sbꞌa xin, man oj eyqꞌuey yul jun yaal tuꞌ.
6Akꞌ watxꞌ cuybꞌanile tet ebꞌ unin tinaniꞌ, yet watxꞌ chi sbꞌeybꞌalne watxꞌ bꞌeybꞌale ebꞌ, jaxa yet oj oc ebꞌ icham animail, man oj yiꞌcan el snaꞌbꞌal ebꞌ yin watxꞌ bꞌeybꞌale.
7Jaꞌ ebꞌ bꞌeom, jaxca rey yeoc ebꞌ xol ebꞌ mebꞌa; jaꞌ ebꞌ chi akꞌon tumin yin maanil, yaaw yeoc ebꞌ xol ebꞌ chi oc maan tumin tuꞌ.
8Jaꞌ ebꞌ chi unen cꞌal spenail, asan cꞌal syaꞌtajilal oj jul yibꞌan ebꞌ, jaꞌ Dios oj qꞌueyon el ebꞌ yetoj sjowal scꞌul.
9Jaꞌ mactxequel jobꞌan yel tzetyetal yu, oj ẍaꞌ syaaxilal Dios ebꞌ, yutol bꞌejan scꞌul spoꞌon ecꞌ sloꞌbꞌe xol ebꞌ mebꞌa.
10Jaꞌ yet chi iꞌle eltoj junoj bꞌuchwawom cu xol, chi lawi ey teelebꞌail, jowal, cꞌal cajlebꞌail.
11Jaꞌ junoj rey caw chi tzala yetoj watxꞌ naꞌbꞌale, catuꞌ chi xꞌox swatxꞌcꞌulal tet mactxequel watxꞌ skꞌanabꞌi.
12Jaꞌ Jehová chi teynen ebꞌ watxꞌ snaꞌbꞌal, catuꞌ chi stenon pax ecꞌ tzetyetal chi yal ebꞌ lekꞌtiꞌ.
13Jaꞌ junoj isa, chi yal jaxca tiꞌ: Ey mi jun noꞌ bꞌalam eey yul bꞌe, chim yoche noꞌ chin smakꞌ camoj; chi yal jaxca tuꞌ yet watxꞌ cꞌam chi yoche chi too mulnail.
14Jaꞌ skꞌane junoj ix ix chi mulwi yul skꞌabꞌ yichamil, laan jaxca junoj jolan xabꞌ, jaꞌ tituꞌ chi eyqꞌuey ebꞌ chi intajnele can el yu Jehová.
15Ta jaꞌ ebꞌ unin cꞌam swatxꞌil snaꞌbꞌal, chi el jun tuꞌ yin ebꞌ ta chi akꞌle yij ebꞌ yetoj teꞌ kꞌaaxteꞌ.
16Jaꞌ ebꞌ chi etnen ebꞌ mebꞌa, yu cꞌal tol chi yoche ebꞌ chi oc bꞌeomal, cꞌal ebꞌ chi yakꞌ montebꞌal tumin tet ebꞌ bꞌeom, jaꞌ ebꞌ tuꞌ yin xacꞌal mebꞌail oj yun slawoj can ey ebꞌ.
Wan Treinta Skꞌane Ebꞌ Ey Snaꞌbꞌal
17Abꞌwej xin, oj jex jin cuy yin tzetyetal chi yal ebꞌ ey snaꞌbꞌal, chi cam je yabꞌeni.
18Watxꞌ ta tol cha cꞌubꞌa yin ja naꞌbꞌal, yet watxꞌ chi skeꞌ ja waloꞌtane masanil.
19Jaꞌ tinaniꞌ chi wakꞌ je yotajne eloj, yet watxꞌ che yaoc je cꞌul yin Jehová.
20Chin tzꞌibꞌe wan treinta kꞌane ey jex; jaꞌ wan kꞌane tiꞌ ey naꞌbꞌale cꞌal jelanil iꞌbꞌil oc yu.
21Ta tol che cuyuꞌ, oj je yotajne el tzetyetal watxꞌ cꞌal tzetyetal yel, yutol smoo che yotajne eloj, yet watxꞌ chi skeꞌ je yalon tet ebꞌ chi skꞌanle yabꞌ ey jex.
1
22Cꞌam ojabꞌ che yetne junoj mebꞌa yutol cꞌam chi skeꞌ scolon sbꞌa, tam wal che yetne junoj mactxequel tol cꞌam mactxequel chi colon sattaj ebꞌ yaaw.
23Yutol jaꞌ Jehová oj colon eloj, jaꞌ Naj oj pajtzen ey jex yu tzet che yun tuꞌ.
2
24Man ojabꞌ junne oj chach ecꞌ yetoj ebꞌ ánima pena snaꞌbꞌal, cꞌal yetoj ebꞌ comon cꞌal chi chichon scꞌul,
25jaxa tala chi yunne, cha cuytoj spena sbꞌeybꞌal ebꞌ tuꞌ, catuꞌ cha sutꞌon cam ja bꞌa.
3
26Cꞌam ojabꞌ che yaoc je bꞌa yin fiadoral yin sjec junojxa mactxequel,
27yutol ta cꞌam tzet watxꞌ je yakꞌon stooloj jun maan tumin tuꞌ, ta cꞌamaj chi skeꞌ yiꞌle ecꞌ je txꞌat.
4
28Cꞌam ojabꞌ cha tenecꞌ smoonal txꞌotxꞌ txꞌotxꞌ ey can ey yu ebꞌ cu mam icham.
5
29Jaꞌ mactxequel watxꞌ chi yute mulna sbꞌa, jaꞌton jun tuꞌ oj mulna cꞌal yintaj ebꞌ rey, catuꞌ manaj bꞌey wan ánima tol cꞌam yeloc apnoj oj mulnaoj.
6
© 2016, Wycliffe Bible Translators, Inc. All rights reserved.