Números 5
5
Jix Iꞌle Eltoj Ebꞌ Ánima Tzꞌilto Cꞌal Yeoc Jatacꞌalaꞌ Yalon Ley
1Jix yalon pax Jehová tet naj Moisés jaxca tiꞌ:
2Al tet masanil ebꞌ ja wet Israelal tol chi iꞌle eltoj ebꞌ ánima yaꞌey yu lepra, bꞌey yinlaj eltoj bꞌey bꞌulan jex ecꞌ tuꞌ, ebꞌ chi el tzetyetal yin smimanil yu junoj syaꞌilal eyoc yin, ma ebꞌ chi mitxꞌon junoj camom. 3Masanil ebꞌ tuꞌ chi iꞌle eltoj bꞌey yinlaj eltoj bꞌey bꞌulan jex ecꞌ tuꞌ, ebꞌ winaj cꞌal ebꞌ ix ix, yet watxꞌ cꞌam tzetyetal tol tzꞌilto cꞌal eyoctoj je xol bꞌey ey jin ecꞌ je yetoj, ẍi Dios.
4Jix sjije ebꞌ Israel yiꞌon eltoj wan ánima tuꞌ, jaxca jix yun yalon Jehová tet naj Moisés.
Sleyal Yibꞌan Ebꞌ Chi Oc Spenail Yin Junoj Tzetyetal
5Jix yalon pax Jehová tet naj Moisés jaxca tiꞌ:
6Al wan tiꞌ tet ebꞌ ja wet conobꞌ: Ta ey junoj winaj ma junoj ix ix tol cꞌam chi sjije tzet chi walaꞌ, ta chi yetne junoj yet animail, jaꞌ jun mactxequel tuꞌ lalan yoc spenail. 7Sowalil chi yotajne el spenail chi oc tuꞌ. Yetoj cꞌal pax oj, sowalil chi yakꞌ sqꞌuexel tzetyetal chi yetnetoj, catuꞌ chi yakꞌon junxa tujan yibꞌan yet sjoꞌ tujan stzꞌajiloj tuꞌ. 8Ta xax cam jun ánima chi etneletoj stzetyetal tuꞌ, catuꞌ ta cꞌamxa pax junojxa yican tol smoo ẍaꞌon sqꞌuexel jun tzetyetal tuꞌ, jaꞌ jun tuꞌ chi oc can wetoj, jaxa yul skꞌabꞌ ebꞌ yakꞌomal xaambꞌal chi cancanoj. Catuꞌ chi yakꞌon pax junoj noꞌ icham meꞌ yin xaambꞌaloj yet chi akꞌle lawoj spenail jix oc tuꞌ.
9Masanil ofrenda chi yakꞌ ebꞌ ja wet Israelal ey jin, tol chi iꞌletoj sattaj ebꞌ yakꞌomal xaambꞌal, jaꞌ wan tuꞌ yet ebꞌ yakꞌomal xaambꞌal chi yun can ocoj. 10Masanil tzetyetal chi yakꞌ ebꞌ ja wet Israelal tuꞌ ey jin, ta tol chi akꞌle tet junoj ebꞌ yakꞌomal xaambꞌal tuꞌ yet ebꞌ chi yun can ocoj, ẍi Dios.
Ley Yin Junoj Ix Tol Chi Yun Mul Yul Skꞌabꞌ Yichamil
11Jix yalon Jehová tet naj Moisés jaxca tiꞌ: 12Al jun tiꞌ tet ebꞌ ja wet Israelal: Tol jain Jehová jin chi walaꞌ, ta ey junoj winaj chi snaꞌoc yin yistil tol jix yaoc spenail ix yul skꞌabꞌ yichamil tuꞌ, 13ma tol caw jix yaoc spenail ix yetoj junojxa winaj, ma xin cꞌam chi naꞌcha el yu naj yichamil ix tuꞌ, yutol cꞌam chi yalatej ix, cꞌam cꞌal pax junoj mactxequel jix ilon smulwi ix ix tuꞌ. 14Ma xin, ey cꞌal pax junoj winaj tucꞌal chi snaꞌoc yin yistil jaxca tuꞌ, ta cꞌam pax spenail ix chi yaocoj, 15jaꞌ yin caabꞌ tujan kꞌane jaxca tuꞌ, jaꞌ naj winaj tuꞌ chi skeꞌ yiꞌontoj yistil tuꞌ sattaj junoj ebꞌ yakꞌomal xaambꞌal, catuꞌ chi yakꞌon canebꞌoj libra sjarinail ixim cebada ebꞌ yin ofrendail yu ix ix tuꞌ. Cꞌam chi secle ey aceite olivo yibꞌan ixim, cꞌam chi oc pax teꞌ incienso yetoj, yutol jaꞌ jun ofrenda tuꞌ, ofrenda yet chi txeclo eloj ta tol jix yun amulal.
16Jaxa naj yakꞌomal xaambꞌal tuꞌ chi alon tet ix ix tuꞌ tol chi sjitztej sbꞌa ix, catuꞌ chi jul ix jin sattaj an. 17Eyman chi iꞌletej niꞌoj jaꞌ jaꞌ tol wet yeocoj yul junoj txꞌotxꞌ secꞌ yu jun yakꞌomal xaambꞌal tuꞌ, catuꞌ chi yiꞌon cꞌal pax a niꞌoj pojoj eey bꞌey yul snail jin calubꞌal, catuꞌ chi yaon eytoj xol jaꞌ jaꞌ tuꞌ. 18Catuꞌ chi iꞌletej ix ix tuꞌ yu jun yakꞌomal xaambꞌal tuꞌ jin sattaj, chi yiꞌon el skꞌoxil sjolom ix ix tuꞌ, chi ale pax oc jun ofrenda yet kꞌanabꞌcꞌulal tuꞌ yul skꞌabꞌ ix ix tuꞌ. Jaxa naj yakꞌomal xaambꞌal tuꞌ inen a jaꞌ jaꞌ tol kꞌaꞌ yuqꞌui tuꞌ, jaꞌ chi iꞌontej syaꞌilal, 19chi yalon jun yakꞌomal xaambꞌal tuꞌ, yu yakꞌon stiꞌ ix ix tuꞌ. Chi yalon jaxca tiꞌ: Ta yel cꞌam ja mul yul skꞌabꞌ naj ja wichamil tiꞌ, ta yel cꞌam ja mul yetoj junojxa winaj, cꞌam tzet oj jaach iꞌon yet oj ja wuqꞌuen eytoj jun jaꞌ jaꞌ kꞌaꞌ yuqꞌui tiꞌ, jaꞌ tol iꞌbꞌil oc syaꞌilal yu. 20Ta tol jix oc ja mul yetoj junojxa winaj xin, jix ja waoc ja mul yul skꞌabꞌ naj ja wichamil tiꞌ, 21jaꞌ Dios oj jaach aon oc yin txꞌoxbꞌanileal sattaj ebꞌ ja wet conobꞌ, oj jaach yakꞌ bꞌina ebꞌ yu ja penail tiꞌ, tol oj mala ja cꞌul, manxa oj skeꞌ ja wijon oc ja wuneꞌ. 22Jaꞌton jun syaꞌilal tuꞌ oj jul ja wibꞌan yet oj ja wuqꞌuen eytoj jun jaꞌ jaꞌ tiꞌ, yutol iꞌbꞌil oc syaꞌilal yu jun jaꞌ jaꞌ tiꞌ, jaxca ojabꞌ tuꞌ chi yun yalon jun yakꞌomal xaambꞌal tuꞌ tet ix ix tuꞌ. Jaxa stakꞌwi ix ix tuꞌ jaxca tiꞌ: Yun ojabꞌ jaxca tuꞌ xin, ẍi ojabꞌ ix.
23Jaꞌ jun yakꞌomal xaambꞌal tuꞌ, chi tzꞌibꞌen ey yul junoj an juun, chi lawi tuꞌ catuꞌ chi sjoꞌon qꞌuey yetoj jaꞌ jaꞌ tol kꞌaꞌ yuqꞌui tuꞌ. 24Chi lawi tuꞌ xin, chi yuqꞌuen eytoj ix ix jaꞌ jaꞌ tuꞌ, yet chi kꞌaꞌbꞌi el yul scꞌul ix. 25Catuꞌ chi ẍaꞌon ecꞌ jun yakꞌomal xaambꞌal tuꞌ ixim sjarinail cebada tuꞌ yin ofrendail yet kꞌanabꞌcꞌulal tuꞌ yul skꞌabꞌ ix ix tuꞌ. Jaꞌ jun ofrenda tuꞌ chi sbꞌatxbꞌa ey jun yakꞌomal xaambꞌal tuꞌ jin sattaj. 26Catuꞌ chi yiꞌon a jun wotzan ofrenda jun yakꞌomal xaambꞌal tuꞌ, chi yakꞌon tzꞌaꞌ yibꞌan jun yet xaambꞌal yu snaꞌletej masanil jun ofrenda tuꞌ.
Jaꞌ yet xax yucꞌ eytoj ix ix tuꞌ jun jaꞌ jaꞌ kꞌaꞌ yuqꞌui tuꞌ, 27ta tol jaꞌ ix ix tuꞌ ey spenail ix jix yaoc yul skꞌabꞌ yichamil, jaꞌ jun jaꞌ chi yuqꞌueytoj ix tuꞌ, oj kꞌaꞌbꞌoj el yul scꞌul ix yu, catuꞌ oj mala scꞌul ix, jaxa stzꞌonbꞌitoj ix tuꞌ, oj oc can ix yin txꞌoxbꞌanileal, cꞌal sbꞌina spenail ix tuꞌ xol conobꞌ. 28Ta jaꞌ ix ix tuꞌ xin, ta yel cꞌam spenail ix, cꞌam niꞌoj tzet oj iꞌon ix, catuꞌ oj skeꞌ cꞌal yali yuneꞌ ix.
29Jaꞌton jun ley tiꞌ chi oc yibꞌan ebꞌ ix ix chi yaoc spenail yul skꞌabꞌ yichamil, yutol yu ix yuxan chi oc naj yichamil ix tuꞌ yin kꞌanabꞌcꞌulal. 30Ta ey junoj winaj xin, tucꞌal chi jowi oc yin yistil; ta jaxca tuꞌ, jaꞌ naj ichamile tuꞌ sowalil chi yiꞌtej yistil naj tuꞌ jin sattaj, catuꞌ chi yunen junoj yakꞌomal xaambꞌal tuꞌ yin ix masanil tzet chi yal jun ley tiꞌ. 31Cꞌam syaꞌilal chi tit yibꞌan naj winaj tuꞌ. Ta yel jaꞌ ix ix tuꞌ ey spenail, jaꞌ ix oj low junoj syaꞌilal yibꞌan yu spenail tuꞌ, ẍi Dios.
Currently Selected:
Números 5: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
