Números 27
27
Smajul Txꞌotxꞌ Ebꞌ Ix Cutzꞌine
1Jaꞌ xol ebꞌ yicꞌaal Manasés ey jowan ebꞌ ix ix sno sbꞌa, jaꞌton: Ix Mahlá, Noá, Hoglá, Milcá cꞌal ix Tirsá; jaꞌ ebꞌ ix tuꞌ scutzꞌin naj Selofhad. Jaꞌ yicꞌaal smam icham ebꞌ, jaꞌton xolilal tiꞌ: Héfer, Galaad, Maquir, Manasés yetoj naj José. 2Jaꞌ jowan ebꞌ ix ix sno cꞌal sbꞌa tiꞌ, jix too ebꞌ bꞌey scalubꞌal Dios, bꞌey chi ẍaꞌle sbꞌa ebꞌ yetoj Jehová. Jix too ebꞌ ix kꞌanabꞌ yetoj naj Moisés cꞌal naj yakꞌomal xaambꞌal jaꞌton, Eleazar, yetoj cꞌal masanil ebꞌ yaaw yeoc yul conobꞌ tuꞌ. Jix yalon ebꞌ ix jaxca tiꞌ: 3Jaꞌ naj cu mam jon, jix cam can naj bꞌey txꞌotxꞌ cusiltaj txꞌotxꞌ, caw cꞌam yoc yin ebꞌ jix sjunbꞌane sbꞌa yetoj naj Coré, naj tol jix tit sjowal yin Jehová cꞌal yin naj Moisés, yu cꞌal wal spenail yul yet yuxan jix cami, cꞌam junoj scꞌaal naj cu mam tuꞌ jon jix ali. 4Yuxan caw man smoo oj tol chi qꞌueycan el sbꞌi naj cu mam xol slistail ebꞌ yicꞌaal, yu cꞌal tol cꞌam junoj scꞌaal jix elcanoj. Yu tuꞌ xin, tol che yakꞌwej junoj tujan cu majul txꞌotxꞌ jon, el ojabꞌ txꞌotxꞌ yin xꞌotxꞌ ebꞌ yuẍtaj naj cu mam tuꞌ jon, ẍi ebꞌ ix.
5Jaxa naj Moisés jix alon wan snaꞌbꞌal ebꞌ ix tiꞌ tet Jehová. 6Catuꞌ jix takꞌwi Jehová tet Moisés: 7Jaꞌ ebꞌ ix scutzꞌin naj Selofhad, yel chi yal ebꞌ ix. Chi skeꞌ ja wiꞌon el junoj tujan xꞌotxꞌ ebꞌ ix yin xꞌotxꞌ ebꞌ yuẍtaj smam ebꞌ ix, yet watxꞌ jaꞌ ebꞌ ix chi iꞌon can oc smajul xꞌotxꞌ smam tuꞌ. 8Chi lawi tuꞌ, cha walon jun tiꞌ tet ebꞌ Israel jaxca tiꞌ: Ta ey mactxequel chi cami yet cꞌam junoj scꞌaal chi ali, jaꞌ smajul xꞌotxꞌ ebꞌ, jaꞌ ebꞌ ix scutzꞌin ebꞌ chi iꞌon can ocoj. 9Ta cꞌam cꞌal junoj scutzꞌin ebꞌ xin, jaꞌ tet ebꞌ yuẍtaj chi cancan smajul txꞌotxꞌ ebꞌ tuꞌ. 10Ta cꞌam pax junoj yuẍtaj naj, jaꞌ tet ebꞌ yuẍtaj smam, chi cancan smajul txꞌotxꞌ tuꞌ. 11Ta cꞌam pax junoj yuẍtaj smam, jaꞌ tet junoj ebꞌ yican tol cawilto xol yetoj, jaꞌ chi iꞌon can oc smajul txꞌotxꞌ tuꞌ. Jaꞌ jun tiꞌ, chejbꞌanile chi yun can xol conobꞌ Israel, jaxca chi yun walon can ey jaach tiꞌ, ẍi Dios.
Jix Ale Can Oc Naj Josué Sqꞌuexeloj Naj Moisés
(Deuteronomio 31:1-8)
12Jix yalon Jehová tet naj Moisés jaxca tiꞌ:
—Aantoj bꞌey sjolom txꞌotxꞌ wonan Abarim, catuꞌ cha wilon cantoj txꞌotxꞌ oj wakꞌ tet ebꞌ conobꞌ Israel. 13Asan chi lawi ja wilon cantoj txꞌotxꞌ txꞌotxꞌ tuꞌ, catuꞌ oj jaach camoj, jaxca wal jix yun scam naj ja wuẍtaj Aarón, 14yutol ma je jije tzet jix walaꞌ, catuꞌ ma jin je camcꞌulne bꞌey txꞌotxꞌ cusiltaj txꞌotxꞌ chi yij Sin, yet jix a yaw ebꞌ ánima cꞌal yet jix tit sjowal ebꞌ win, yet jix skꞌanon jaꞌ ebꞌ yuqꞌueꞌ, ẍi Dios. (Jaꞌ jun tiꞌ, yunnaj bꞌey jaꞌ jaꞌ chi yij Meribá bꞌey yul yet Quedes, bꞌey txꞌotxꞌ cusiltaj txꞌotxꞌ chi yij Sin.)
15Jix yalon naj Moisés tet Jehová jaxca tiꞌ:
16—Jaach Jehová, jaach cha wakꞌ skꞌinal masanil ánima, jaꞌ tinaniꞌ xin, satne oc junoj mactxequel chi oc yaawiloj xol ebꞌ ja conobꞌ tiꞌ, 17yet watxꞌ jaꞌ chi ijbꞌan ebꞌ ja conobꞌ tiꞌ, yal cꞌal bꞌeytuꞌ chi to oc ebꞌ. Yet watxꞌ cꞌam chi qꞌueyecꞌ ebꞌ jaxca noꞌ meꞌ cꞌam yilomal, ẍi naj Moisés.
18Jix takꞌwi Jehová tet naj Moisés jaxca tiꞌ:
—Jaꞌ naj Josué scꞌaal Nun, eyxa oc Wespíritu yin, caw wal jijem naj, yuxan awte naj, catuꞌ cha waon oc ja kꞌabꞌ yibꞌan sjolom naj. 19Catuꞌ cha wiꞌontoj naj sattaj naj yakꞌomal xaambꞌal chi yij Eleazar, cꞌal sattaj masanil ebꞌ conobꞌ Israel, yet cha waon can oc yopiso naj. 20Cha wakꞌon can niꞌoj ja wopiso tet naj, yet watxꞌ oj sjije masanil ebꞌ conobꞌ Israel tzet oj yalaꞌ. 21Jaꞌ tet naj Eleazar tuꞌ cha walaꞌ. Jaxa naj Eleazar tuꞌ oj kꞌanlen ey jin yu naj, jain xa Jehová jin tiꞌ oj wakꞌ yal yin chꞌen Urim tzet oj yunne. Jaxa naj Josué oj alon tzet sowalil oj yun ebꞌ conobꞌ, ẍi Dios.
22Jix sjije naj Moisés yunen tzet jix yal Jehová; jix iꞌletoj naj Josué yu naj Moisés sattaj naj Eleazar, naj yakꞌomal xaambꞌal, cꞌal sattaj masanil ebꞌ conobꞌ Israel. 23Jix lawi tuꞌ xin, catuꞌ jix yaon oc skꞌabꞌ naj Moisés yibꞌan sjolom naj Josué, yet chi ẍaꞌon can yopiso sattaj ebꞌ conobꞌ, jaxca jix yun yalon Jehová tet naj Moisés.
Currently Selected:
Números 27: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
