Números 19
19
Staanil Noꞌ Cajin Wacax
1Jix yalon Jehová tet naj Moisés cꞌal tet naj Aarón jaxca tiꞌ:
2Jain ton jaꞌcaw Jehová jin chi wakꞌcan jun chejbꞌanile tiꞌ: Al tet ebꞌ conobꞌ Israel tol chi yiꞌtej junoj noꞌ kꞌopo cajin wacax ebꞌ, tol cꞌam ojabꞌ bꞌey pena smimanil, tol cꞌam ojabꞌ to bꞌey chi mulna noꞌ yin kꞌuo txꞌotxꞌ. 3Che yakꞌ noꞌ tet naj Eleazar, naj yakꞌomal xaambꞌal, jaꞌ naj chi iꞌon eltoj noꞌ bꞌey stiꞌel bꞌey bꞌulan jex ecꞌ tuꞌ, jaꞌ tituꞌ chi makꞌle cam noꞌ sattaj naj. 4Jaxa naj Eleazar tuꞌ chi yiꞌa niꞌoj ẍiqꞌuil noꞌ yetoj yiximal skꞌabꞌ, catuꞌ chi xiontoj jujeloj bꞌey yetcꞌulal jun Kꞌap Na bꞌey chin chaꞌle jin bꞌa je yetoj. 5Chi lawi tuꞌ, catuꞌ chi akꞌle tzꞌaꞌ noꞌ wacax tuꞌ masanil sattaj naj Eleazar, jaꞌton noꞌ stzꞌuumal, noꞌ ẍiꞌbꞌeal, noꞌ ẍiqꞌuil cꞌal yul scꞌul noꞌ. 6Yet lalan stzꞌaꞌ noꞌ tuꞌ, catuꞌ chi yiꞌontej junoj skꞌabꞌ teꞌ kꞌuteꞌ, yetoj junoj skꞌabꞌ teꞌ hisopo, cꞌal yetoj an cajin kꞌap, naj yakꞌomal xaambꞌal tuꞌ, catuꞌ chi yaon octoj masanil xol kꞌakꞌ bꞌey chi tzꞌaꞌ noꞌ wacax tuꞌ. 7Chi lawi tuꞌ xin, catuꞌ chi xꞌaon el spichil, catuꞌ chi aẍni, chi lawi tuꞌ, chi xa skeꞌ yoctoj xol bꞌey bꞌulan ey ebꞌ conobꞌ tuꞌ, man tocꞌal pax saj yeoc jaxca yalon jin chejbꞌanil masantaꞌcꞌal yet yeycꞌualil. 8Jacꞌalaꞌ pax naj jix nuson tzꞌaꞌ noꞌ wacax tuꞌ, chi xꞌael spichil, catuꞌ chi aẍni, man tocꞌal pax saj yeoc jaxca yalon jin chejbꞌanil masantaꞌcꞌal yet yeycꞌualil. 9Jaꞌ junojxa mactxequel tol saj yeoc jaxca yalon jin chejbꞌanil, jaꞌ chi yambꞌan a staanil noꞌ wacax tuꞌ, caw yakꞌ ilbꞌil chi yute, catuꞌ chi yiꞌon eltoj stiꞌel bꞌey bꞌulan ecꞌ ebꞌ conobꞌ tuꞌ. Jaꞌ wan taan tuꞌ chi skꞌan ebꞌ je yet Israelal yet chi swaꞌnen jaꞌ jaꞌ ebꞌ chi kꞌanle yet chi sajbꞌanele junoj mactxequel jaxca yalon jin chejbꞌanil. Masanil wan tuꞌ, xaambꞌal yeocoj yu yiꞌon el spenail. 10Jaꞌ mactxequel chi yambꞌan a jun taan tuꞌ, sowalil chi xꞌael spichil, man tocꞌal pax saj yeoc jaxca yalon jin chejbꞌanil masantaꞌcꞌal yet yeycꞌualil. Jaꞌ jun chejbꞌanile tiꞌ che jije jaex Israel jex tiꞌ, cꞌal ebꞌ txꞌoj conobꞌal eyecꞌ je xol.
11Jaꞌ mactxequel chi mitxꞌon smimanil junoj ánima camnaj, jaꞌ jun tuꞌ, tzꞌiltaj chi yun can yin jujebꞌoj cꞌual jatacꞌalaꞌ yalon jin chejbꞌanil. 12Jaꞌ yet scaabꞌial smitxꞌon junoj camnaj tuꞌ, chi sajbꞌane sbꞌa yetoj jaꞌ jaꞌ tuꞌ, jaxa yet sjujubꞌixial xin, watxꞌ xa chi yun canoj jaxca yalon jin chejbꞌanil. Ta cꞌam chi sajbꞌane sbꞌa yet scaabꞌial ma yet sjujubꞌixial, man watxꞌoj chi yun canoj. 13Yuxan ta ey junoj mactxequel chi mitxꞌon smimanil junoj camom, ta cꞌam pax chi sajbꞌane sbꞌa, jaꞌ jun tuꞌ chi yetne el snail jin calubꞌal. Yuxan sowalil chi qꞌueyle el je xol, yutol ma sajbꞌane sbꞌa yetoj jaꞌ jaꞌ tuꞌ, yutol man sajoj yeoc jaxca yalon jin chejbꞌanil.
14Jaꞌton jun chejbꞌanile tiꞌ yin junoj mactxequel chi camel yul sna bꞌey bꞌulan jex ecꞌ tuꞌ: Masanil mactxequel eyecꞌ yul skꞌap na, cꞌal ebꞌ chi octoj yiloni, man sajoj chi yun can ebꞌ yin jujebꞌoj cꞌual. 15Masanil neet tol man sajoj yeoc smajil, manxa sajoj chi yun canoj.
16Jaꞌ mactxequel chi mitxꞌon smimanil junoj camnaj bꞌey stiꞌel conobꞌ, ta tucꞌal makꞌbꞌil camoj ma tucꞌal chi cam jaxca cꞌaltaꞌ chi yun scam ánima, ma tol chi smitxꞌ sbꞌajil junoj camom, ma bꞌey mujan junoj camom, jaꞌ jun tuꞌ man sajoj chi yun can yin jujebꞌoj cꞌual.
17Jaꞌ yu masanil wan tuꞌ, chi iꞌletej niꞌoj staanil noꞌ wacax tzꞌaꞌnaj yu yiꞌon el spenail, chi ale eytoj yul junoj neet, catuꞌ chi ale eytoj jaꞌ yibꞌan, jaꞌ tol chi bꞌet tit bꞌey junoj jaꞌ snukꞌ jaꞌ. 18Chi lawi tuꞌ, jaxa junoj naj tol saj yeoc jaxca yalon sleyal, jaꞌ chi iꞌon a junoj skꞌabꞌ teꞌ hisopo, chi slaon eytoj xol jaꞌ jaꞌ tuꞌ, catuꞌ chi xiontoj yibꞌan jun kꞌap na tuꞌ, yetoj cꞌal wan yibꞌan wan neet cꞌal yibꞌan jantaj ebꞌ ánima eyecꞌ tituꞌ, jacꞌalaꞌ cꞌal pax yibꞌan jun jix mitxꞌon sbꞌajil camom tuꞌ, ma bꞌey mujan junoj camom, ma smimanil junoj ánima tol makꞌbꞌil camoj, ma junoj tucꞌal chi cam jaxca cꞌaltaꞌ chi yun scam ánima. 19Jaꞌ junoj mactxequel tol saj yeocoj, jaꞌ chi txion oc jaꞌ jaꞌ yin ebꞌ yet scaabꞌial cꞌal yet sjujubꞌixial. Jaxa yet xax txile oc jaꞌ jaꞌ tuꞌ yin ebꞌ, catuꞌ chi xꞌaon el spichil ebꞌ, catuꞌ chi aẍni ebꞌ, yet chi waꞌxi can el ebꞌ. Asan xin, man tocꞌal sajoj yeoc ebꞌ masantaꞌcꞌal yet yeycꞌualil. 20Ta ey junoj ánima cꞌam chi sajbꞌane sbꞌa jatacꞌalaꞌ yalon jin chejbꞌanil, sowalil chi qꞌueyle el je xol yutol chi yetnetoj snail jin calubꞌal. Yutol ma sajbꞌane sbꞌa yetoj jaꞌ jaꞌ yet chi sajbꞌanele el junoj mactxequel, yuxan man cꞌal sajoj yeocoj. 21Jaꞌ jun chejbꞌanile tiꞌ chi cancan yin junelne: Jaꞌ mactxequel chi txion oc jaꞌ jaꞌ yin junojxa, sowalil chi xꞌael spichil. Jaꞌ mactxequel chi mitxꞌon jaꞌ jaꞌ yet sajbꞌanilal, man sajoj chi yun canoj masantaꞌcꞌal yet chi ey can cꞌu. 22Masanil tzetyetal bꞌey chi oc mitxꞌan junoj mactxequel tol man sajoj yeocoj, man pax sajoj chi yun canoj, ma junoj chi mitxꞌon junoj ánima tol man saj yeocoj, jaꞌ jun tuꞌ chi cancan yin man sajoj jatacꞌalaꞌ yalon chejbꞌanile masantaꞌcꞌal yet yeycꞌualil, ẍi Dios.
Currently Selected:
Números 19: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
