Mateo 19

Scuybꞌanil Ebꞌ Chi Spoꞌole Sbꞌa Yetoj Yetbꞌi

(Marcos 10:1-12; Lucas 16:18)

1Jix lawi yalon wan tuꞌ Jesús xin, catuꞌ jix el bꞌey Galilea tuꞌ, catuꞌ jix too yul-laj yet Judea, bꞌey skꞌaxepal ecꞌ jaꞌ miman Jordán. 2Caw ecꞌal ebꞌ ánima jix tzajlo yintaj. Jix yakꞌon can waꞌxoj scꞌul jantaj ebꞌ yaꞌey. 3Ey wan ebꞌ Fariseo jix apni scꞌatan Jesús yu yakꞌle yijbꞌan Naj ebꞌ yin spenailal. Jix yakꞌon skꞌanlebꞌal ebꞌ tet Jesús, jix yal ebꞌ jaxca tiꞌ:

—¿Ey mi sleyal chi skeꞌ spoꞌolen sbꞌa winaj yetoj yistil yu yal cꞌal tzetyetal? ẍi ebꞌ tet Jesús. 4Catuꞌ jix takꞌwi Jesús tet ebꞌ jaxca tiꞌ:

—¿Tumi cꞌamto che yil yul An Juun Tzꞌibꞌebꞌilcanoj,* tol jaꞌ tax yet jix swaꞌnen yul yibꞌankꞌinal tiꞌ Dios, jix waꞌnele naj winaj cꞌal ix ix?#Génesis 1:27. 5Catuꞌ jix yalon pax can jaxca tiꞌ: “Yuxan jaꞌ ebꞌ winaj, oj sbꞌejcan smam cꞌal xutx catuꞌ oj sjunbꞌane ey sbꞌa ebꞌ yetoj yistil, yuxan jaxca tol junxane animail chi yun can el ebꞌ,” ẍi Dios yul An Juun.#Génesis 2:24. 6Yuxan, manxa cawanoj ebꞌ, tol junxane chi yun can el ebꞌ. Yuxan jaꞌ ebꞌ junbꞌanebꞌilxa yu Dios, manche poꞌole ey ebꞌ yu ánima, ẍi Jesús tet ebꞌ. 7Catuꞌ jix skꞌanlen pax ebꞌ tet Jesús jaxca tiꞌ:

—¿Ta jaxca tuꞌ, tzet yuxan albꞌil pax can yu naj Moisés tol chi skeꞌ yakꞌon junoj an yuunal poꞌolebꞌail junoj winaj tet yistil, catuꞌ chi spoꞌolen sbꞌa ebꞌ? ẍi ebꞌ tet Jesús.#Deuteronomio 24:1.

8—Yutol caw caw je naꞌbꞌal, yuxan jix ẍaꞌ naj Moisés je poꞌolen je bꞌa yetoj je yistil. Jaꞌ tax yet jix waꞌxi yul yibꞌankꞌinal yu Dios, man jaxca tuꞌ jix yute. 9Yuxan chi wal ey jex, yal cꞌal mactxequel chi yujtetoj pax yistil, ta cꞌam pax smul ix chi yaoc yul skꞌabꞌ naj, catuꞌ chi yiꞌon junojxa ix naj, mul chi yun naj tuꞌ. /Jaꞌ naj chi iꞌon ix spoꞌolenaj sbꞌa yetoj yichamil tuꞌ, mul pax chi yun naj tuꞌ, ẍi Jesús tet ebꞌ./ 10Catuꞌ jix yalon ebꞌ scuywom tuꞌ tet naj jaxca tiꞌ:

—Ta junelne cꞌam chi skeꞌ spoꞌolen sbꞌa naj yetoj yistil xin, yel mi watxꞌ cꞌam chi oc kistil, ẍi ebꞌ. 11Yuxan jix yal Naj tet ebꞌ jaxca tiꞌ:

—Man masaniloj ánima chi techa yu wan che yal tiꞌ. Asanne ebꞌ chi oc Dios yetoj chi techa yu. 12Ey mac man tzꞌajanoj ye smimanil yin tax yalubꞌal. Yuxan cꞌam chi oc yetbꞌi ebꞌ. Ey mac xin, jaꞌ yet animail chi uten yin tol cꞌamxa chi skeꞌ yoc yetbꞌi. Ey mac xin, cꞌam chi oc yistil yutol asanne naj Yaawil ey satcan chi yoche chi yakꞌ servil. Jaꞌ ebꞌ chi techa yu jaxca tuꞌ, techa ojabꞌ yu ebꞌ xin, ẍi Jesús tet ebꞌ.

Jix Yal Watxꞌ Kꞌane Jesús Yibꞌan Ebꞌ Unin

(Marcos 10:13-16; Lucas 18:15-17)

13Jix lawi jun tuꞌ xin, catuꞌ ey wan unin jix iꞌletej scꞌatan Jesús yu ánima, yu sbꞌatxbꞌan oc skꞌabꞌ Naj yibꞌan ebꞌ cꞌal yu chi txali yu ebꞌ. Jaꞌ ebꞌ scuywom jix tenle oc tucan sjul ebꞌ unin scꞌatan Naj. 14Catuꞌ jix yalon Jesús tet ebꞌ scuywom tuꞌ jaxca tiꞌ:

—Chaꞌwej jul ebꞌ unin ey jin an. Manche je tenoc tucan ebꞌ, yutol asan ebꞌ eyoc snaꞌbꞌal yin Dios jaxca ebꞌ unin eyoc snaꞌbꞌal yin smam xutx, asan ebꞌ ey yalon yet yoc Naj a satcan Yaawiloj, ẍi Jesús tet ebꞌ. 15Catuꞌ jix yaon atoj skꞌabꞌ Naj yibꞌan sjolom ebꞌ. Jix lawi jun tuꞌ xin, catuꞌ jix toi.

Jun Bꞌeom Jix Kꞌanabꞌ Yetoj Jesús

(Marcos 10:17-31; Lucas 18:18-30)

16Jaꞌ yet junel, ey jun achꞌe jix apni scꞌatan Jesús. Jix skꞌanlen tet Naj jaxca tiꞌ:

—Mamin, caw watxꞌ jaach, yuxan chin kꞌanle ey jaach an, ¿tzetyetal sowalil chi wun an, catuꞌ chi wiꞌon kꞌinale tol ey cꞌal yin tobꞌalkꞌinal an? ẍi naj tet Jesús.

17—¿Tzet yuxan chin ja wal watxꞌil an? Cꞌam junoj mactxequel watxꞌ, asan Dios watxꞌ. Ta cha woche cha chaꞌ jun kꞌinale tol ey cꞌal yin tobꞌalkꞌinal tuꞌ, jije ẍejbꞌanil Dios, ẍi Jesús tet naj achꞌe tuꞌ.

18¿Bꞌeytet wan chejbꞌanile tuꞌ chin jije an xin? ẍi naj tet Jesús.

—Manche jaach makꞌwi cam ánima. Manche oc ja mul yul skꞌabꞌ ja wistil. Manche jaach elkꞌanwi. Manche ja naꞌa kꞌane yin ja wet animail. 19Ey ojabꞌ yeloc apnoj ja mam ja txutx yul ja sat.#Éxodo 20:12-16; Deuteronomio 5:16-20. Camcꞌulne ebꞌ ja wet animail jaxca cha wute ja camcꞌulnen ja bꞌa, ẍi Jesús tet naj.#Levítico 19:18.

20—Yin tax jin yaliẍal jix cꞌoli cꞌal jin jijen masanil wan chejbꞌanil tiꞌ. ¿Tumi cꞌam niꞌojxa sowalil chin jije, chi yal tuꞌ? ẍi naj tet Jesús.

21—Ta cha woche tol tzꞌajan cha jije masanil, asiꞌ, txon can el masanil ja tzetyetal, catuꞌ cha poꞌontoj stool tuꞌ xol ebꞌ mebꞌa, catuꞌ oj ja chaꞌon ja bꞌeomal bꞌey satcan. Chi lawi tuꞌ xin, catuꞌ chach ecꞌ cꞌal cuywoj wintaj an, ẍi Jesús tet naj. 22Jaꞌ yet jix yabꞌen naj achꞌe wan tuꞌ, catuꞌ jix paxtoj naj yin cuscꞌulalil, yutol caw bꞌeom naj sicꞌlebꞌil. 23Jix lawi tuꞌ xin, catuꞌ jix yalon Jesús tet ebꞌ scuywom jaxca tiꞌ:

—Caw yel chi wal ey jex, tol jaꞌ ebꞌ bꞌeom, caw yaꞌtaj yoc Naj a Satcan Yaawiloj ebꞌ. 24Chi wal pax ey jex, kꞌinaloj junoj noꞌ camello, ¿tumi taꞌ chi skeꞌ yecꞌ el noꞌ yul yixal junoj acuẍa? Yel xacꞌal subꞌotaj jun tuꞌ yintaj chi oc Naj a Satcan Yaawiloj ebꞌ bꞌeom, ẍi Jesús tet ebꞌ. 25Jaꞌ yet jix yabꞌen ebꞌ scuywom jun tuꞌ, caw jix qꞌueya scꞌul ebꞌ. Catuꞌ jix yalon ebꞌ tuꞌ jaxca tiꞌ:

—Ta queytuꞌ jaxca tuꞌ xin, ¿mac mi txequel oj skeꞌ scolchai? ẍi ebꞌ tet Jesús. 26Yuxan jix oc tꞌanan Jesús yin ebꞌ, catuꞌ jix yalon jaxca tiꞌ:

—Jaꞌ jun tiꞌ, cꞌam ton chi skeꞌ yu junoj ánima. Jal pax Dios xin, masanil chi cꞌal skeꞌ yu, ẍi Jesús tet ebꞌ. 27Catuꞌ jix yalon naj Pedro tuꞌ tet Jesús jaxca tiꞌ:

—Jaon tiꞌ, jix cu bꞌejcan masanil cu tzettaj yetal, catuꞌ jix cu ecꞌ cꞌal cuywoj ja wintaj, ¿tzet oj yun keloc apnoj jaon tiꞌ? ẍi naj Pedro tuꞌ tet Jesús. 28Jix yalon Jesús tet ebꞌ tuꞌ jaxca tiꞌ:

—Caw yel chi wal ey jex, jaꞌ yet oj acꞌbꞌoj masanil tzettaj yetal, catuꞌ oj je chaꞌon spaj je yet tuꞌ. Jaꞌ jain Akꞌbꞌil Wopiso yu Dios xol ebꞌ ket animail tiꞌ an,* oj jin ey chotan bꞌey jin despacho an, bꞌey oj txeclo el jin watxꞌilal cꞌal jin tzejejial. Jaꞌ jaex je lacawanil jix jex ecꞌ cꞌal cuywoj wintaj tiꞌ an, oj jex ey chotan junjun jex bꞌey junjun je despacho. Oj je naꞌon oc yin ebꞌ ket Israelal, ebꞌ lacawebꞌ bꞌulan. 29Yal cꞌal mac chi sbꞌejcan sna, yuẍtaj, yanabꞌ, smam, xutx, yetbꞌi, yuninal, cꞌal xꞌotxꞌ jin yaꞌiloj, jaꞌton ebꞌ tuꞌ, caw miman sqꞌuexel oj ẍaꞌ ebꞌ. Yetoj pax oj, oj ẍaꞌ pax kꞌinale tol ey cꞌal yin tobꞌalkꞌinal. 30Ey ebꞌ miman yeloc apnoj cu xol tinaniꞌ, jal pax yet jun tiempoal chi wal tuꞌ, cꞌamxa niꞌoj yeloc apnoj ebꞌ. Ey pax ebꞌ xin, cꞌam niꞌoj yeloc apnoj cu xol tinaniꞌ, jal pax yet tuꞌ, caw mimanxa yeloc apnoj ebꞌ, ẍi Jesús tet ebꞌ.

Currently Selected:

Mateo 19: knj

Highlight

Compare

Copy