Lucas 3
3
Jaꞌ Naj Juan Bautista Jix Alon El Skꞌane Dios Bꞌey Cusiltaj Txꞌotxꞌ
1Jolajonebꞌxa abꞌil cꞌoli yakꞌon yaawil naj Tiberio bꞌey Roma. Jaxa naj Poncio Pilato eyoc naj yin gobernador bꞌey Judea. Jaxa naj Herodes* eyoc yin gobernador bꞌey Galilea. Jaꞌ naj Felipe, yuẍtaj naj Herodes, eyoc yin gobernadoral bꞌey jun lugar chi yij Iturea cꞌal bꞌey Traconítide. Jaxa naj Lisanias eyoc yin gobernadoral bꞌey Abilene.
2Jaꞌ yet jun tiempoal tuꞌ, jaꞌ naj Anás yetoj naj Caifás eyoc ebꞌ yaawiloj yakꞌomal xaambꞌal ebꞌ Israel tet Dios. Jaxa Juan scꞌaal naj Zacarías xin, jaꞌ bꞌey cusiltaj txꞌotxꞌ eyecꞌoj. Jaꞌ yet chi ecꞌ naj tituꞌ, jix yalon Dios tet naj tzet oj yal tet ebꞌ ánima. 3Yuxan jix ecꞌ naj bꞌey masanil wan lugar scawilal jaꞌ Jordán. Jix ecꞌ yalon el xol-laj ebꞌ ánima, tol sowalil chi yakꞌ bautizar sbꞌa ebꞌ yu xeclo eloj tol jix snaꞌ sbꞌa scꞌul ebꞌ yin spenail, catuꞌ jix akꞌle mimancꞌulal yibꞌan spenail ebꞌ yin junelne yu Dios. 4Jix yun jaxca tzet albꞌilcan yu jun ẍejabꞌ Dios chi yij sbꞌi Isaías, jix yal naj Isaías jaxca tiꞌ:
Ey jun mactxequel bꞌey cusiltaj txꞌotxꞌ. Jaxca tiꞌ oj yute yalon yet oj a yaw yin ipal. “Jaxca che yute je waꞌnen bꞌe yet chi jul junoj yaaw, jaxca tuꞌ che yute je waꞌnen je bꞌeybꞌal, yutol oj jul Naj Kaawil. Je jichlonen el wan bꞌe bꞌey oj ecꞌ Naj yaaw tuꞌ.
5Masanil wan jolquiẍtaj, oj akꞌle no oj, catuꞌ oj pananbꞌoj eloj. Jacꞌalaꞌ junjun tzalan cꞌal junjun wonan, oj kꞌule pananbꞌoj. Masanil bꞌe cotxquiltaj, oj jichlonele eloj. Yetoj wan jomquiẍtaj, oj mujleoj, catuꞌ oj pananbꞌoj.
6Catuꞌ oj yilon masanil ebꞌ, tol ey jun colbꞌanile chi yakꞌ Dios,” ẍi bꞌey jun cusiltaj txꞌotxꞌ tuꞌ, ẍi yul An Juun Tzꞌibꞌebꞌilcan tuꞌ.#Isaías 40:3-5.
7Ey ebꞌ ánima jix apni scꞌatan naj Juan, yu yakꞌon bautizar sbꞌa ebꞌ, jix yalon naj tet ebꞌ jaxca tiꞌ:
—Jaex tiꞌ, caw jelan jex jaxca noꞌ labꞌa. ¿Mac jix alon ey jex, tol chi skeꞌ je colon el je bꞌa tet jun miman syaꞌtajil oj jul je yibꞌan yu sjowal scꞌul Dios? 8Ta oj je naꞌ je bꞌa yin je penail, sowalil watxꞌ che yute je bꞌeybꞌal, yet watxꞌ chi txeclo eloj tol yel jix je naꞌ je bꞌa. Manche je yal jaxca tiꞌ: “Cꞌam tzet che naꞌ, yicꞌaal jon to naj Abraham,” man ojabꞌ je chioj jaxca tuꞌ. Yutol chi wal ey jex an, ta chi yal scꞌul Dios, chi skeꞌ yoc wan chꞌen tiꞌ yicꞌaal oj naj Abraham je qꞌuexeloj. 9Jaꞌ jun miman syaꞌtajil oj juloj, laan jaxca junoj winaj listo xa yei yetoj yeche yich junoj teꞌ. Masanil teꞌ cꞌam swatxꞌil sat chi yakꞌa, chi stzokꞌaoj, catuꞌ chi skꞌojontoj yibꞌan kꞌakꞌ, ẍi naj Juan tet ebꞌ.
10—¿Tzet chi yun cu bꞌeybꞌalnen jon xin? ẍi ebꞌ tet naj.
11—Jaex, ta ey caabꞌoj je camiẍ, che yakꞌ junoj tet junoj mac cꞌam yet, yetoj ta ey tzet che loꞌ, che yakꞌ niꞌoj tet ebꞌ cꞌam yet, ẍi naj tet ebꞌ.
12Ey pax jaywan ebꞌ tejom el toolabꞌal jix apni scꞌatan naj Juan tuꞌ, yu yakꞌon bautizar sbꞌa ebꞌ. Yet jix apni ebꞌ, jix skꞌanlen ebꞌ tet naj jaxca tiꞌ:
—Jaach cuywam, ¿tzet chi yun cu waꞌnen cu bꞌeybꞌal jon xin? ẍi ebꞌ tet naj.
13—Jaꞌ yet che tejon el tumin yin ebꞌ ánima, jatacꞌalaꞌ jantaj yalon ley che tejeloj, ẍi naj tet ebꞌ.
14Ey pax jaywan ebꞌ soldado jix apni skꞌanlen tet naj jaxca tiꞌ:
—Jal pax jaon tiꞌ jon, ¿tzet chi yun cu bꞌeybꞌalnen jon xin? ẍi ebꞌ tet naj.
—Manche je xibꞌte ebꞌ ánima. Manche je naꞌa kꞌane yibꞌan ebꞌ, catuꞌ che yiꞌon ecꞌ tzettaj yetal tet ebꞌ. Akꞌwej tzalabꞌoj je cꞌul yetoj je tool che yiꞌ tuꞌ, ẍi naj tet ebꞌ.
15Jaꞌ ebꞌ ánima eyecꞌ tituꞌ, chi smaj yabꞌ ebꞌ, yutol chi snaꞌ ebꞌ, tejan jaꞌ naj Juan tuꞌ, Cristo.* 16Jix yalon naj tet masanil ebꞌ jaxca tiꞌ:
—Jain tiꞌ, yel chex wakꞌ bautizar yetoj jaꞌ, jal pax jun mactxequel tol to oj juloj. Jaꞌ oj jex akꞌon bautizar yetoj Santo Espíritu, ma yetoj kꞌakꞌ. Jaꞌ jun mactxequel oj jul tuꞌ, yel xacꞌal miman yeloc apnoj wintaj an. Yuxan man jin moo oj woc yakꞌomaloj servil, caxcꞌal yin jin xuyon el xꞌanil xanabꞌ. 17Jaꞌ jun mactxequel chi wal tuꞌ, laan jaxca junoj mactxequel chi xeye stiriw, yu yiꞌon can el skꞌail ixim xol sbꞌakꞌ ixim. Chi lawi xeyeni, catuꞌ chi yiꞌontoj stiriw bꞌey scꞌuanbꞌal, jal skꞌail ixim chi elcan tuꞌ xin, chi slancantoj yibꞌan jun kꞌakꞌ cꞌam bꞌakꞌin chi tani, ẍi naj Juan tet ebꞌ.
18Ecꞌal tocꞌal wanxa cuybꞌanile jaxca wan tiꞌ jix yal naj Juan tet ebꞌ ánima tuꞌ, yu yabꞌen ebꞌ jun watxꞌ kꞌane tiꞌ. 19Yetoj pax oj jix tenchanele naj yaaw Herodes yu naj Juan, yutol jix iꞌle el ix Herodías, yistil yuẍtaj chi yij sbꞌi Felipe yu naj Herodes. Man pax asanne oj jun tuꞌ jix yun naj, tol eyto cꞌal wanxa spenail jix el yuneni. Yuxan jix tenchanele naj yu naj Juan. 20Jal pax naj Herodes tuꞌ, cꞌam niꞌoj jix sjije naj tzet jix yal naj Juan tuꞌ, jix yunen xacꞌal spenail yel miman, jix oc naj Juan tuꞌ preso yu naj.
Jaꞌ Yet Jix Akꞌle Bautizar Jesús
(Mateo 3:13-17; Marcos 1:9-11)
21Jaꞌ yet junel, yet cꞌamto chi oc naj Juan yul preso, lalan yakꞌle bautizar ebꞌ ánima jix apni scꞌatan, catuꞌ jix akꞌle pax bautizar Naj Jesús yu naj. Jaꞌ yet lalan xali Naj Jesús tuꞌ, catuꞌ jix jajcha spuertail satcan. 22Catuꞌ jix eyol Santo Espíritu yibꞌan Naj, jaxca chi yun yeyol junoj noꞌ uch. Jix abꞌle yoc kꞌane jix al-le eytej satcan, ẍi jaxca tiꞌ:
—Jaach ton tiꞌ, jin cꞌaal jaach an, chach jin camcꞌulne an. Caw chin tzala ja wetoj an, ẍi.
Sbꞌi Ebꞌ Yichmam Naj Jesucristo
(Mateo 1:1-7)
23Treinta abꞌil xam Naj Jesús, yet jix cꞌoli ẍaꞌon el yich smulna Naj yin yet Dios. Jaꞌ Naj Jesús tuꞌ, scꞌaal naj José chi snaꞌ ánima. Jaꞌton ebꞌ yichmam Naj Jesús tiꞌ, Elí, 24Matat, Leví, Melquí, Janai, José, 25Matatías, Amós, Nahúm, Eslí, Nagai, 26Máhat, Matatías, Semeí, José, Joiadá, 27Johanán, Resá, Zorobabel, Saltiel, Nerí, 28Melquí, Adí, Cosam, Elmadam, Er, 29Josué, Eliézer, Jorim, Matat, 30Leví, Simeón, Judá, José, Jonam, Eliaquim, 31Meleá, Mená, Matatá, Natán, 32David, Jesé, Obed, Booz, Sélah, Nahasón, 33Aminadab, /Admín,/ Arní, Hesrón, Fares, Judá, 34Jacob, Isaac, Abraham, Térah, Nahor, 35Serug, Ragau, Péleg, Éber, Sélah, 36Cainán, Arfaxad, Sem, Noé, Lámec, 37Matusalén, Enoc, Jéred, Mahalalel, Cainán, 38Enós, Set, Adán. Jaꞌ naj Adán tiꞌ, jaꞌ Dios jix waꞌneni.
Currently Selected:
Lucas 3: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.