Lucas 2
2
Jaꞌ Yet Jix Ali Naj Jesús
1Jaꞌ yet jun tiempoal tuꞌ, ey jun naj yaaw a Roma, Augusto sbꞌi naj. Jix yakꞌ jun chejbꞌanil naj tol chi bꞌisle jantaj ánima ey yul yibꞌankꞌinal tiꞌ. 2Jix oc jun bꞌabꞌel bꞌiswal yet eyoc naj Quirinio yaawil bꞌey jun lugar Siria sbꞌi. 3Sowalil chi too masanil ánima bꞌey sconobꞌ yichmam yu jun bꞌiswal tuꞌ. 4Yuxan jix tit naj José bꞌey conobꞌ Nazaret yul yet Galilea. Jix too naj bꞌey conobꞌ Belén yul yet Judea. Jaꞌ naj rey David tuꞌ, ichmame yeoc naj yu naj José. 5Jix too naj José yakꞌ sbꞌi yetoj ix María yul an libro bꞌey conobꞌ Belén. Eyxa swa kꞌane ebꞌ, cꞌamto chi yiꞌle sbꞌa ebꞌ, mimejalxa pax ix. 6Yet eyecꞌ ebꞌ bꞌey conobꞌ Belén jix jul stiempoal yali jun yuneꞌ ix María. 7Jaꞌ tituꞌ jix ali naj bꞌabꞌel unin, catuꞌ jix spichon oc an kꞌap ix yin naj neneꞌ tuꞌ, catuꞌ jix yaon eytoj ix yul jun jucubꞌ bꞌey chi low noꞌ noꞌ, yutol cꞌam bꞌey chi eey ebꞌ bꞌey jun posada tuꞌ.
Jaꞌ Ebꞌ Ángel Jix Xꞌoxa Sbꞌa Tet Ebꞌ Naj Ilom Meꞌ
8Bꞌey scawilal conobꞌ Belén ey wan ebꞌ naj ilom meꞌ. Eyecꞌ ebꞌ bꞌey jun acꞌal yet jun akꞌbꞌal tuꞌ. Tol chi sweyne smeꞌ ebꞌ naj. 9Yin eymanil jix xꞌoxa sbꞌa jun yángel cu Mam Dios tet ebꞌ ilom meꞌ. Jix el stzejejial yinlaj ebꞌ naj yu yipal cu Mam Dios. Caw chi xiw ebꞌ naj ilom meꞌ tuꞌ. 10Jix yal naj ángel tuꞌ tet ebꞌ naj:
—Manche jex xiwi, yutol iꞌbꞌil oc jun caw watxꞌ kꞌane wu an. Yu jun kꞌane tiꞌ oj tzalabꞌoj masanil ebꞌ ánima yin tobꞌalkꞌinal. 11Jaꞌ bꞌey conobꞌ Belén, sconobꞌ naj David, jix ali jun unin, je Colomal, CRISTO* sbꞌi yopiso naj, tol je Yaawil. 12Oj je naꞌtej ta caw yel chi wal ey jex yet che yilon jun unin tuꞌ pichbꞌil oc kꞌap yin, eeytoj yul jun jucubꞌ, ẍi jun ángel tet ebꞌ naj ilom meꞌ tuꞌ.
13Jaꞌ yet lalan yal-le jun tiꞌ tet ebꞌ xin, catuꞌ jix jul wanxa ebꞌ ángel. Jix tit yin eymanil bꞌey satcan. Jix yalon watxꞌ kꞌane ebꞌ tet Dios jaxca tiꞌ:
14¡Kalwej watxꞌ kꞌane tet Dios bꞌey satcan, cꞌal bꞌey yul yibꞌankꞌinal tiꞌ! Yu swatxꞌcꞌulal Dios oj jul watxꞌcꞌulal yin ebꞌ ánima chi tzala yetoj, ẍi wan ángel tuꞌ.
15Xax paxtoj wan ángel bꞌey satcan tuꞌ, catuꞌ jix yal-len wan ilom meꞌ tuꞌ tet junjun. Jix yalon ebꞌ jaxca tiꞌ:
—Toonwej bꞌey Belén tuꞌ, kilwej Naj Kaawil jix al-le ey jon tuꞌ. 16Catuꞌ jix too ebꞌ yin ani. Jix txax eltej ix María yetoj naj José yu ebꞌ naj, catuꞌ jix yilontej jun unin ebꞌ naj tuꞌ, tol telan eytoj yul jun jucubꞌ. 17Yet jix yilontej ebꞌ naj ilom meꞌ tuꞌ, jix yalon ebꞌ naj tet naj José yetoj ix María tzetyetal jix al-le tet ebꞌ naj yu wan ángel yin jun neneꞌ unin tuꞌ. 18Masanil mactxequel jix abꞌen yalon wan ilom meꞌ tuꞌ, jix qꞌueya scꞌul ebꞌ yu tzetyetal chi yal wan ilom meꞌ tuꞌ. 19Jal ix María xin, jix yaoc wan kꞌane tiꞌ yin scꞌul, jix snaꞌon el wan kꞌane tiꞌ ix. 20Jix paxtoj ebꞌ naj ilom meꞌ tuꞌ xin. Jix yalon watxꞌ kꞌane ebꞌ naj tet Dios yu masanil tzetyetal jix yabꞌ ebꞌ naj, jix yil ebꞌ naj. Yutol masanil jix yil ebꞌ naj jaxca tzetyetal jix al-le tet ebꞌ naj yu wan ángel.
Jaꞌ Yet Jix Bꞌet Txꞌoxle Naj Jesús Bꞌey Templo
21Jujubꞌixi tax ali jun unin tuꞌ, jix ale oc jun yechel chi yij sbꞌi circuncisión* yin swinajil. Catuꞌ jix yijon sbꞌi yin Jesús yu ebꞌ. Jaꞌton jun bꞌie tiꞌ jix yal can naj ángel tet María. Yet cꞌamto chi oc jun unin tuꞌ yin.
22Jaꞌ sbꞌeybꞌal ebꞌ Israel, sowalil ey jun tiempoal chi sajbꞌane sbꞌa ebꞌ ix ix yet xax ali yuneꞌ, jaxca yalon sley Moisés. Yuxan, jaꞌ yet jix lawi stiempoal sajbꞌanen sbꞌa ix María,#2:22 Jacꞌal jun cꞌual yet chi akꞌle jun saꞌbꞌeal tet Dios yet sajbꞌanilal jun ix txutxe, jacꞌalaꞌ chi akꞌle jun saꞌbꞌeal tet Dios yet chi manle el jun yuneꞌ ta tol bꞌabꞌel unin. Jaꞌ jun tiꞌ bꞌeybꞌalnebꞌil yu ebꞌ Israel yet chi xꞌoxon el ebꞌ tol jaꞌ jun bꞌabꞌel unin yet ton cu Mam Dios. Éxodo 13:12-15; Levítico 12:6. jix yiꞌontoj ebꞌ jun unin tuꞌ bꞌey Jerusalén. Jix bꞌet akꞌle jun unin tuꞌ yu ebꞌ tet Naj Kaawil. 23Jix yun ebꞌ jaxca tuꞌ, yutol queytuꞌ tzꞌibꞌebꞌilcan yul sley Naj Kaawil, chi yal jaxca tiꞌ: “Jaꞌ jun winaj unin chi bꞌabꞌi ali, chi akꞌle tet Naj Kaawil yu yakꞌon servil,” ẍi yul An Juun Tzꞌibꞌebꞌilcan tuꞌ.#Éxodo 13:2, 12. 24Yu pax yakꞌon xaambꞌal ebꞌ tet Dios, yuxan jix bꞌet ebꞌ, chi yal sleyal xaambꞌal jaxca tiꞌ: “Sowalil cacꞌonoj noꞌ paramuch, ma jobꞌbꞌeal uch ix,” ẍi ley.#2:24 Jaꞌ noꞌ cajmu ma noꞌ cuateꞌ chi oc xaambꞌaloj ebꞌ mebꞌa. Jal ebꞌ bꞌeom xin, jaꞌ noꞌ yuneꞌ meꞌ chi yakꞌ ebꞌ. Levítico 12:6-8. 25Jaꞌ yet jun tiempoal tuꞌ, eyecꞌ jun naj chi yij sbꞌi Simeón bꞌey Jerusalén tuꞌ. Caw watxꞌ sbꞌeybꞌal naj, asan tet Dios chi yiꞌey sbꞌa. Echbꞌanebꞌil cꞌal sjul sColomal ebꞌ yet Israelal yu. Eyoc Santo Espíritu yin naj. 26Jaꞌ tet naj jix akꞌle naꞌcha eloj, tol man to oj cam naj masantaꞌcꞌal oj yiloc yin Cristo* naj, Naj chejbꞌiltej yu Dios. 27Jix ijbꞌaletoj Naj bꞌey stemplo Dios yu Santo Espíritu tuꞌ. Jaꞌ yet jix iꞌletoj Naj neneꞌ Jesús bꞌey stemplo Dios yu naj José cꞌal xutx yu sjijen ebꞌ yunen jaxca yalon can yul ley, 28catuꞌ jix chaꞌle ecꞌ Naj neneꞌ Jesús yu naj Simeón, catuꞌ jix ẍelon a naj, catuꞌ jix yalon watxꞌ kꞌane tet Dios yu jun tuꞌ, jix yalon jaxca tiꞌ:
29—Mamin, jain tiꞌ ja wakꞌomal servil weoc an. Jaꞌ tinaniꞌ, camoj jin yin watxꞌcꞌulalil yutol jix yun tzet albꞌilcan ja wu ey jin an.
30Yutol jix wil yetoj jin sat jun Colwawom an.
31Jaꞌton jun Naj tiꞌ, jix ja wakꞌ yopiso sattaj masanil ánima yul yibꞌankꞌinal tiꞌ.
32Jaꞌton jun tiꞌ, oj akꞌon sajkꞌinal yin spixan ebꞌ man Israeloj. Jaꞌ jaon ja conobꞌ Israel jon tiꞌ, miman oj yun keloc apnoj jon, ẍi naj Simeón tuꞌ.#Isaías 49:6.
33Jaꞌ naj José yetoj xutx Naj Jesús tuꞌ, jix qꞌueya scꞌul ebꞌ yabꞌen tzet jix yal naj Simeón tuꞌ yin Naj unin tuꞌ. 34Catuꞌ jix skꞌanon swatxꞌcꞌulal Dios naj Simeón yibꞌan ebꞌ. Jix yalon tet ix María, xutx Naj Jesús tuꞌ jaxca tiꞌ:
—Ilaꞌla, jaꞌ jun unin tiꞌ, txequelxa yei, tol ecꞌal ebꞌ ket Israelal oj somcha el scꞌul yin. Caw ecꞌal pax ebꞌ oj swaꞌne sbꞌeybꞌal yu. Jaꞌ oj txꞌoxon eloj, tzet utbꞌil chi yun scolcha ebꞌ, ecꞌal pax ebꞌ oj intajnen can el Naj. 35Queytuꞌ oj yun xeclo eloj, tzet chi snaꞌ junjun ánima yin spixan. Jal jaach tiꞌ xin, ey jun cꞌual oj oc pitzꞌan cuscꞌulal yin ja pixan yu, jaxca junoj chꞌen oj tejletoj bꞌey ja pixan queytuꞌ oj yun ja wabꞌen syaꞌil, ẍi naj Simeón tuꞌ tet María.
36Ey pax jun ix ix yalomal el skꞌane Dios eyecꞌ tituꞌ. Ana sbꞌi ix. Scutzꞌin jun naj chi yij sbꞌi Penuel, yicꞌaal naj Aser. Caw ixnamxa ix. Jix ocle yetbꞌi yet caw kꞌopoto ix tuꞌ. Jujebꞌne abꞌil jix yiꞌle sbꞌa ix yetoj yichamil catuꞌ jix cam naj. 37Catuꞌ jix cancan ix xꞌojli, jaꞌ yet tuꞌ eyxa 84 abꞌil xa skꞌinal ix. Jacꞌal bꞌey stemplo Dios ey cꞌal ecꞌ ix, cꞌualil cꞌal akꞌbꞌalil, jacꞌal tituꞌ jix akꞌle servil Kaawil yu ix. Chi yijle nocha sbꞌa catuꞌ chi txali. 38Jix apni ix scꞌatan José yetoj María yet jun txolan tuꞌ, catuꞌ jix yalon yu diosalil ix tet Dios. Catuꞌ jix yalon el skꞌaneal Jesús ix xol jantaj ebꞌ chi echbꞌanen sjul stiempoal oj colcha el ebꞌ conobꞌ Jerusalén tuꞌ.
39Jaꞌ yet jix lawi sjijen ebꞌ jaxca yalon sley Naj Kaawil yu ebꞌ unin chi ali, catuꞌ jix paxtoj ebꞌ bꞌey conobꞌ Nazaret junelxa bꞌey yul yet Galilea. 40Jal jun unin tuꞌ xin, yelcꞌulal jix chꞌibꞌaoj. Jix yiꞌon cꞌal yip, cꞌal sjelanil. Jix yakꞌon cꞌal swatxꞌcꞌulal Dios yibꞌan.
Jaꞌ Yet Jix Kꞌanabꞌ Jesús Yetoj Ebꞌ Cuywam Yin Ley Yul Templo
41Junjun abꞌil chi bꞌetecꞌ smam xutx Jesús bꞌey Jerusalén, jix too ebꞌ yu ilo kꞌin Pascua. 42Lacawebꞌxa abꞌil skꞌinal Jesús tuꞌ yet jix bꞌet yetoj ebꞌ yin sbꞌabꞌelal yu ilo kꞌin jaxca sbꞌeybꞌal ebꞌ. 43Jix lawi cꞌal kꞌin tuꞌ, catuꞌ jix paxtoj ebꞌ. Jal Naj Jesús tuꞌ xin, jix cancan Naj bꞌey Jerusalén tuꞌ, man yotaj oj xutx cꞌal José tuꞌ ta tol jix cancan Naj. 44Jaꞌ snaꞌon ebꞌ tol eyecꞌ Naj yetoj ebꞌ ánima yaman spaxtoj yetoj ebꞌ. Yuxan, jaꞌ yet jix ey cꞌu jix seyle ecꞌ Naj yu ebꞌ xol yican cꞌal xol ebꞌ yamigo. 45Ma pax txax Naj yu ebꞌ. Yuxan jix meltzo pax ebꞌ yintaj junelxa, catuꞌ jix bꞌet seyle ecꞌ Naj yu ebꞌ bꞌey Jerusalén tuꞌ.
46Caabꞌi tax tuꞌ, catuꞌ jix ilcha Naj yu ebꞌ yul stemplo Dios. Chotan ey Naj xol ebꞌ cuywam yin sley Moisés. Chi smaj yabꞌ tzet chi yal ebꞌ, catuꞌ chi yakꞌon pax kꞌanlebꞌal tet ebꞌ. 47Caw chi qꞌueya scꞌul ebꞌ chi abꞌen yin tzet chi yal Jesús tuꞌ, yutol caw yotaj Naj sicꞌlebꞌil. Watxꞌ cꞌal chi yute takꞌwoj sbꞌa tet ebꞌ. 48Jaꞌ yet jix yilon smam xutx tuꞌ, tol jaꞌ tituꞌ eyecꞌoj, caw jix qꞌueya scꞌul ebꞌ yu. Yuxan jix yal xutx tuꞌ tet Naj jaxca tiꞌ:
—Jaach wuneꞌ, ¿tzet yuxan queytuꞌ cha wute ja bꞌa ey jon? Jaꞌ ja mam cꞌal jain tiꞌ, caw chach cu seyecꞌ yin cuscꞌulal, ẍi ix tet Jesús.
49—¿Tzet yuxan chin je seyecꞌoj? ¿Tumi man je yotaj oj tol sowalil chin waꞌne smulnail jin Mam an? ẍi Jesús tet ebꞌ.
50Ma cꞌal naꞌcha el yu ebꞌ tzet jix yal tet ebꞌ tuꞌ.
51Jix lawi tuꞌ xin, catuꞌ jix paxtoj Naj yetoj ebꞌ bꞌey Nazaret tuꞌ. Jijem cꞌal jix yute sbꞌa tet ebꞌ jaxca cꞌaltaꞌ sbꞌeybꞌal. Jix scꞌubꞌa wan tiꞌ ix txutxe yin snaꞌbꞌal, catuꞌ jix snaꞌoꞌtaneni. 52Jal Naj Jesús tuꞌ xin, jacꞌalaꞌ ẍꞌibꞌ Naj, jacꞌalaꞌ ẍꞌibꞌ pax snaꞌbꞌal Naj. Caw chi tzala Dios yetoj, chi tzala pax ebꞌ ánima.
Currently Selected:
Lucas 2: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.