Levítico 21
21
Wan Chejbꞌanile Tet Ebꞌ Yakꞌomal Xaambꞌal
1Jix yalon Jehová tet naj Moisés jaxca tiꞌ:
Al tet ebꞌ yakꞌomal xaambꞌal, jaꞌton ebꞌ yicꞌaal naj Aarón, tol cꞌam ojabꞌ chi yetnetoj sbꞌa ebꞌ jin sattaj jaxca yalon jin ley, cꞌam ojabꞌ chi skeꞌ yoc mitxꞌan ebꞌ yin junoj smimanil junoj camom, caxcꞌal mi tol yican to sbꞌa ebꞌ yetoj. 2Asan ta tol xutx, ma tol smam, ma junoj scꞌaal, ma junoj scutzꞌin, ma junoj yuẍtaj, 3ma junoj yanabꞌ tol cꞌamto yichamil, tol junne to caan ecꞌ yetoj yul sna, jaꞌ yu wan tuꞌ, chi skeꞌ stzꞌilnentoj sbꞌa sattaj jin ley. 4Ta tol smimanil yistil junoj yican xin, caw cꞌam chi skeꞌ yoc mitxꞌan ebꞌ yin jun camom tuꞌ.
5Cꞌam ojabꞌ chi stzujle el xil sjolom ebꞌ, cꞌam cꞌal pax chi stzujel xil stiꞌ ebꞌ, cꞌam ojabꞌ chi smakꞌ yasoj smimanil ebꞌ yu scamichal jun ánima tuꞌ. 6Watxꞌ ojabꞌ cꞌal chi yute sbꞌa ebꞌ jin sattaj jain sDiosal jin ebꞌ tiꞌ, man ojabꞌ penaoj chi yun sbꞌina jin bꞌi yu ebꞌ, yutol jaꞌ ebꞌ chi akꞌon tzꞌaꞌ xaambꞌal, cꞌal yakꞌon ixim pan ebꞌ yin ofrendail ey jin an, yuxan sowalil tol watxꞌ ojabꞌ cꞌal chi yute sbꞌa ebꞌ.
7Cꞌam cꞌal chi skeꞌ yiꞌon junoj amul ix ebꞌ yin yistiloj, tam wal junoj ix ix tol xax kꞌanabꞌ yetoj winaj, ma junoj ix ix tol spoꞌolenaj sbꞌa yetoj yichamil, yutol sicꞌbꞌil el ebꞌ yu yoc can ebꞌ wetoj. 8Ey ojabꞌ sqꞌuexanil ebꞌ yul je sat, yutol jaꞌ ebꞌ tuꞌ chi akꞌon ixim pan yin ofrendail jin sattaj. Qꞌuexan ojabꞌ yel ebꞌ yul je sat, yutol jain Jehová jin tiꞌ watxꞌ jin cꞌal, jain jix jin sicꞌ can el ebꞌ, yet watxꞌ chi yun ebꞌ jaxca chi woche.
9Ta jaꞌ junoj scutzꞌin junoj ebꞌ yakꞌomal xaambꞌal tuꞌ chi yetnetoj sbꞌa, ta chi too yin amul ixal, jaꞌ jun tuꞌ chi yiꞌel sqꞌuixwil smam, sowalil chi nusle tzꞌaꞌoj.
10Jaꞌ junoj sat yakꞌomal xaambꞌal sowalil chi yaoc spichil chi skꞌan yin yopiso, tol txequel ojabꞌ yili ocoj, yutol xax ale atoj aceite olivo yibꞌan sjolom yet jix sicꞌle can eloj, yuxan cꞌam chi skeꞌ tol tuxa cꞌal chi too txian xil sjolom, tam wal stzilontoj stiꞌ spichil yu xꞌoxon el junoj scuscꞌulal. 11Cꞌam cꞌal pax chi skeꞌ yoctoj ebꞌ bꞌey eyecꞌ smimanil junoj camom, caxcꞌal smam ma xutx, yutol caw yaabꞌetaj yul jin sat. 12Jain Jehová jin chi walaꞌ. Cꞌam chi skeꞌ yeltej ebꞌ yul snail bꞌey chin chaꞌle jin bꞌa je yetoj, syaꞌiloj junoj camom, ma skeꞌ tol cꞌam yeloc apnoj snail jin calubꞌal yul sat ebꞌ, yutol jix ale atoj aceite olivo yin sjolom ebꞌ, yet jix sicꞌle el yu yoc can ebꞌ wetoj.
13Yu tuꞌ xin, jaꞌ ojabꞌ junoj ix kꞌopo ix tol cꞌamto winaj chi kꞌanabꞌ yetoj, jaꞌ smoo chi oc yistiloj ebꞌ. 14Cꞌam chi skeꞌ yiꞌon ebꞌ junoj ix ix camnajxa yichamil, tam wal junoj ix ix tol spoꞌolenaj sbꞌa yetoj yichamil, tam wal junoj amul ix. Yu tuꞌ xin, jaꞌ ojabꞌ junoj ix caw kꞌopo ix chi oc yistiloj ebꞌ, junoj ix tol yet conobꞌ sbꞌa yetoj, jaꞌton smoo yoc yistiloj, 15yet watxꞌ man yintajil animaoj chi yun yeloc yuninal ebꞌ xol ebꞌ yet conobꞌ, yutol jain Jehová jin tiꞌ, jain jix jin sicꞌ can el ebꞌ, ẍi Dios.
16Jix yalon Jehová tet naj Moisés jaxca tiꞌ:
17Al jun tiꞌ tet naj Aarón: Tinaniꞌ cꞌal yet bꞌakꞌin, cꞌam ojabꞌ junoj ebꞌ je yicꞌaal, tol man tzꞌajanoj smimanil oj skeꞌ yakꞌon ixim pan yin ofrendail ey jin an. 18Yu tuꞌ xin, cꞌam ojabꞌ junoj ebꞌ tol man tzꞌajanoj smimanil oj skeꞌ yoc yin jun opiso tuꞌ: Jaꞌton ebꞌ cꞌam chi skeꞌ yilwani, ebꞌ coxoꞌ, ebꞌ man watxꞌoj yili xaam ma xiquin, 19ebꞌ tol kꞌanajtoj skꞌabꞌ ma yajan, 20ebꞌ noan ey yet chi bꞌeyi, ebꞌ txenne steel yutol kꞌotxan skꞌabꞌ ebꞌ ma kꞌotxan yajan, ebꞌ eyoctoj saj yul sat, ebꞌ eyoc yaꞌbꞌil yin smimanil, ebꞌ eeltej kocꞌ yaꞌbꞌil yinlaj smimanil, tam wal junoj makꞌbꞌil poꞌo sbꞌakꞌ swinajil. 21Cꞌam ojabꞌ junoj ebꞌ tuꞌ chi skeꞌ yakꞌon tzꞌaꞌ noꞌ xaambꞌal jin sattaj jain Jehová jin tiꞌ. Ta tol man tzꞌajanoj smimanil ebꞌ tuꞌ, cꞌam chi skeꞌ yakꞌon ixim pan yin ofrendail jin sattaj. 22Jaꞌ ebꞌ eyoc syaꞌbꞌil tuꞌ, chi skeꞌ sloꞌon wan ofrenda ebꞌ tuꞌ, yetoj cꞌal masanil wan tzetyetal tol wet yeocoj, 23cꞌam cꞌal chi skeꞌ yoctej ebꞌ scꞌatan an scortinail bꞌey yul snail jin calubꞌal, cꞌal bꞌey jun yet xaambꞌal tuꞌ, yet watxꞌ man comonoj xacꞌal chi yute snail jin calubꞌal ebꞌ tuꞌ, yutol jain Jehová jin tiꞌ ey wet, ẍi Dios.
24Yuxan jix yal naj Moisés wan tiꞌ tet naj Aarón, yetoj cꞌal tet ebꞌ scꞌaal, cꞌal yetoj tet masanil ebꞌ yet Israelal tuꞌ.
Currently Selected:
Levítico 21: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
