Josué 3
3
Jix Kꞌaxbꞌo Ecꞌtoj Ebꞌ Conobꞌ Israel Yul Jaꞌ Jordán
1Jaxa yet junxa cꞌual tuꞌ, caw sebꞌ jix a waan naj Josué, catuꞌ jix bꞌey cꞌaltoj yetoj ebꞌ conobꞌ Israel, jix el ebꞌ bꞌey txꞌotxꞌ Sitim, jix apni oc ebꞌ bꞌey stiꞌ jaꞌ Jordán, ma to ecꞌtoj ebꞌ tituꞌ, oxebꞌ to cꞌu jix cancan ebꞌ bꞌey eyecꞌ tuꞌ. 2Jaxa yet yox cꞌual xin, jix ecꞌ ebꞌ syaawil conobꞌ bꞌey masanil bꞌey bꞌulan ey ebꞌ tuꞌ. 3Jix yalon jun chejbꞌanile ebꞌ tet masanil ebꞌ Israel jaxca tiꞌ: Jaꞌ yet oj je yilon yiꞌontoj teꞌ Scaẍail Swa Kꞌane Jehová cu Diosal ebꞌ yakꞌomal xaambꞌal, jaꞌton ebꞌ yicꞌaal Leví, catuꞌ chex too tzajan yintaj ebꞌ. 4Jaxca tuꞌ oj yun je yotajnen eloj, bꞌeytuꞌ oj kaꞌ je toocoj, yutol cꞌamto junoj jex je yotaj jun bꞌe tuꞌ, asan xin, cꞌam chex oc xacꞌal tzajan yintaj ebꞌ, naat tacꞌal chex can tzajanoj, ey ojabꞌ junoj kilómetro chex can yintaj ebꞌ, ẍi ebꞌ yaaw tuꞌ tet ebꞌ ánima tuꞌ.
5Jix yalon naj Josué tet ebꞌ conobꞌ jaxca tiꞌ: Jaꞌ tinaniꞌ, sajbꞌanewej je bꞌa, yutol jaꞌ yet yecal chi xꞌox yipal Jehová tol caw qꞌueyubꞌtaj xacꞌal yili cu xol tiꞌ, ẍi naj Josué tet ebꞌ. 6Jaꞌ yet jix kꞌinibꞌi a yet junxa cꞌual xin, jix yalon naj Josué tet ebꞌ naj yakꞌomal xaambꞌal jaxca tiꞌ: Iꞌwej a teꞌ Scaẍail Swa Kꞌane Dios, catuꞌ che yiꞌontoj teꞌ sattaj masanil ebꞌ ánima tiꞌ, catuꞌ chex ecꞌtoj yul jaꞌ Jordán, ẍi naj tet ebꞌ.
Catuꞌ jix yiꞌon a teꞌ scaẍail wa kꞌane tuꞌ ebꞌ, catuꞌ jix too ebꞌ sattaj masanil conobꞌ. 7Jix lawi tuꞌ xin, jix yalon Jehová tet naj Josué jaxca tiꞌ: Jaꞌ tinaniꞌ oj jin chaꞌel yich jin txꞌoxoni tol miman ja weloc apnoj sattaj ebꞌ conobꞌ yetoj ja wopiso tiꞌ, yet watxꞌ chi yil ebꞌ tol ey jin cꞌal ecꞌ ja wetoj, jaxca jix wun yetoj naj Moisés. 8Catuꞌ cha walon tet ebꞌ yakꞌomal xaambꞌal chi iꞌontoj teꞌ scaẍail wa kꞌane tiꞌ: Jaꞌ yet oj jex apnoj oc bꞌey jaꞌ Jordán tuꞌ, oj jex oc tucan bꞌey yul jaꞌ tuꞌ, ja chi tet ebꞌ, ẍi Jehová tet naj Josué. 9Jix lawi tuꞌ, jix awtele ebꞌ conobꞌ Israel tuꞌ yu naj Josué, jix yalon naj jaxca tiꞌ: Jitzwejtej je bꞌa, catuꞌ oj je yabꞌen tzet oj yal Jehová cu Diosal. 10Jaꞌ tzet oj xꞌox Dios je yil tinaniꞌ, queytuꞌ oj yun snaꞌcha el je yu, tol eyecꞌ Dios iquis cu xol tiꞌ. Jaꞌton Naj oj iꞌon el ebꞌ Amorreo, ebꞌ Heteo, ebꞌ Heveo, ebꞌ Ferezeo, ebꞌ Gergeseo, ebꞌ Cananeo, yetoj cꞌal ebꞌ Jebuseo cu sattaj. 11Jaꞌ tinaniꞌ xin, jaꞌ teꞌ Scaẍail Swa Kꞌane Naj sDiosal masanil txꞌotxꞌ txꞌotxꞌ tiꞌ, jaꞌ oj bꞌabꞌoj ecꞌtoj yul jaꞌ Jordán cu sattaj. 12Yu tuꞌ xin, che sicꞌwej el lacawanoj ebꞌ winaj yin junjun icꞌaaleal. 13Jaꞌ yet oj yaon eytoj yajan ebꞌ yakꞌomal xaambꞌal bꞌey yul jaꞌ jaꞌ tuꞌ, jaꞌton ebꞌ inen oc teꞌ Scaẍail Swa Kꞌane Jehová, Naj Yaaw yeoc yibꞌan masanil txꞌotxꞌ txꞌotxꞌ tiꞌ, catuꞌ oj spoꞌon sbꞌa jaꞌ jaꞌ chi eyol bꞌey yibꞌan atoj tuꞌ, oj oc tucan jaꞌ sbꞌeyi, jaxca xacꞌal naabꞌ jaꞌ oj yute can sbꞌa jaꞌ, ẍi naj tet ebꞌ.
14Jix lawi tuꞌ xin, jix too masanil ebꞌ Israel yintaj ebꞌ yakꞌomal xaambꞌal tuꞌ, jaꞌ yet jix kꞌaxbꞌo ecꞌtoj ebꞌ yul jaꞌ Jordán tuꞌ, bꞌabꞌel stoo teꞌ Scaẍail Swa Kꞌane Dios iꞌbꞌil oc yu ebꞌ tuꞌ. 15Jaꞌ yet jun tiempoal tuꞌ, jaꞌ jaꞌ miman Jordán tuꞌ, caw wal ey yip jaꞌ, caw chi malel jaꞌ yul sbꞌe, jaꞌton yet stiempoal wal skꞌuple a ixim tiriw. Asanne cꞌal yet jix yaon eytoj yajan ebꞌ yakꞌomal xaambꞌal tuꞌ yul jaꞌ, eyman jix oc tucan jaꞌ yeyoloj, naat tacꞌal jix oc tucan jaꞌ bꞌey yetcꞌulal conobꞌ Adam bꞌey scawilal bꞌey eyoc smuroal conobꞌ Saretán. 16Jal pax jaꞌ bꞌey yalan tuꞌ xin, jix bꞌey cꞌaltoj jaꞌ masantaꞌcꞌal jix lawitoj jaꞌ yul jaꞌ Camnaj Mar, jaxca ton tuꞌ jix yute spoꞌon sbꞌa jaꞌ miman Jordán tuꞌ, catuꞌ jix ecꞌtoj ebꞌ conobꞌ Israel yul jaꞌ jaꞌ tuꞌ, bꞌey sattaj conobꞌ Jericó, jaxca tajin txꞌotxꞌ yili. 17Jal ebꞌ yakꞌomal xaambꞌal inen oc teꞌ Scaẍail Swa Kꞌane Jehová, jix oc can tucan ebꞌ bꞌey snan yul sbꞌe jaꞌ jaꞌ tuꞌ, tajin txꞌotxꞌ xacꞌal yili bꞌey jix oc linan ebꞌ tuꞌ, catuꞌ jix ecꞌtoj masanil ebꞌ conobꞌ Israel.
© 2016, Wycliffe Bible Translators, Inc. All rights reserved.