Oseas 4
4
Ey Sjowal Scꞌul Jehová Yin Israel
1Jex wet Israelal, abꞌwej yalon skꞌane Jehová.
Tuxa jix tit sjowal Naj yin masanil mactxequel caan bꞌey jun conobꞌ tiꞌ, yutol cꞌamxa swatxꞌil ánima masanil, cꞌamxa junoj mactxequel watxꞌ snaꞌbꞌal, cꞌamxa mac chi naꞌon Dios.
2Tol chi a can ebꞌ yin sqꞌuexon bꞌey yakꞌnaj can stiꞌ yin tzet chi yalaꞌ, cꞌal yalon lekꞌtiꞌal kꞌane ebꞌ. Chi makꞌwi cam ánima ebꞌ, chi elkꞌanwi ebꞌ; asanxane amulal chi yun ebꞌ, cꞌal yetnentoj sbꞌa ebꞌ, catuꞌ kocꞌtaj xacꞌal chi makꞌwi cam ánima ebꞌ.
3Yu jun tuꞌ, yuxan caw chi etex el sat txꞌotxꞌ txꞌotxꞌ tiꞌ yu ebꞌ, yuxan chi cancan je txꞌotxꞌ yin cusiltaj txꞌotxꞌal. Jaꞌ masanil ebꞌ ánima caan tituꞌ, cꞌamxa yip ebꞌ. Oj cam noꞌ xol-laj teꞌal noꞌ, cꞌal noꞌ tzꞌiquin, cꞌal masanil noꞌ pescado ey yul-laj jaꞌ mar.
Jix Yal Jehová Yu Spenail Ebꞌ Yakꞌomal Xaambꞌal
4Jix yalon Jehová ey jin jaxca tiꞌ: Cꞌam ojabꞌ mactxequel comon cꞌal chi steele sbꞌa; cꞌam ojabꞌ mactxequel chi stenchane oc tucan sbꞌa. Yutol jaꞌ yin ebꞌ yakꞌomal xaambꞌal chi wal jun kꞌane tiꞌ.
5Yuxan jaꞌ yet cꞌualil oj jex telcꞌo a jaex tiꞌ. Jal ebꞌ chi yaloc sbꞌa jin chejabꞌoj, jaꞌ yet akꞌbꞌalil oj telcꞌo a ebꞌ je yetoj. Jain oj wakꞌ lawoj ey conobꞌ Israel, tol jaxca je txutx yeocoj.
6Caw cꞌamxa chin naꞌletej yu jun jin conobꞌ tiꞌ, yu jun tuꞌ, yuxan oj jin qꞌueyel ebꞌ. Jal jex yakꞌomal xaambꞌal jex tiꞌ, yel xacꞌal cꞌamxa chin je naꞌtej. Yu jun tuꞌ, yuxan oj jex wiꞌel yin je yopiso tiꞌ. Yutol jix too qꞌueycꞌulal jin chejbꞌanil je yu, yuxan manxa cꞌal oj jin naꞌtej ebꞌ je yicꞌaal yet bꞌakꞌin.
7Yutol jaxca jix yun ẍꞌibꞌ sbꞌisil ebꞌ yakꞌomal xaambꞌal, queytuꞌ jix yun ya can spenail ebꞌ jin sattaj. Yu jun tuꞌ, yuxan jaꞌ smimanbꞌilal ebꞌ tuꞌ, yin xa qꞌuixwiltajil oj wute canoj.
8Jaꞌ yu xaambꞌal chi akꞌle yu spenail ebꞌ jin conobꞌ, yuxan watxꞌ chex lowi, yu jun tuꞌ, yuxan che yoche tol chi oc cꞌal spenail ebꞌ jin conobꞌ tiꞌ.
9Yu jun tuꞌ, jaex yakꞌomal xaambꞌal jex tiꞌ, laan oj yun je yabꞌen syaꞌil yetoj ebꞌ je yet conobꞌ tiꞌ. Jaꞌ yu je bꞌeybꞌal tuꞌ, yuxan oj waoc syaꞌilal je yibꞌan yetoj ebꞌ.
10Yutol cꞌamxa chin yakꞌ servil ebꞌ jin conobꞌ, chi low ebꞌ, cꞌamxa chi no scꞌul ebꞌ chi yabꞌe. Chi yun mul ebꞌ, cꞌam chi chꞌibꞌ sbꞌisil ebꞌ.
Jaꞌ Ebꞌ Israel Chi Oc Yin Eyilal Tet Wan Comon Dios
11Jaꞌ yu amulal, cꞌal yu uqꞌue an, yuxan suc xacꞌal chi yun can el snaꞌbꞌal ebꞌ.
12Jaꞌ ebꞌ jin conobꞌ tiꞌ, jaꞌ tet junoj teꞌ teꞌ chi skꞌanle junoj snaꞌbꞌal ebꞌ. Jaꞌ teꞌ teꞌ tuꞌ chi akꞌon snaꞌbꞌal ebꞌ yaloni. Yu yamulal ebꞌ tuꞌ, yuxan jix etex xacꞌal el ebꞌ. Jaxca chi yun sbꞌejoncan yichamil junoj ix ix, catuꞌ chi mulwi yetoj junojxa winaj, queytuꞌ jix yun jin sbꞌejoncan ebꞌ, catuꞌ chi oc tzajan ebꞌ yintaj comon dios.
13Jaꞌ bꞌey sjolomlaj wonan, cꞌal bꞌey snanlaj tzalan, jaꞌ tituꞌ chi yakꞌ tzꞌaꞌ incienso ebꞌ cꞌal yakꞌon xaambꞌal ebꞌ, catuꞌ chi ẍaꞌ scꞌul ebꞌ yeecꞌ bꞌey yalan yenel xaj teꞌ álamo, teꞌ jii, cꞌal teꞌ maatxꞌ. Yu jun tuꞌ, jaꞌ scutzꞌin ebꞌ, cꞌal ebꞌ ix yalibꞌ ebꞌ, chi oc ebꞌ yin amulal.
14Man oj waoc syaꞌilal ebꞌ ix cutzꞌine, cꞌal ebꞌ ix alibꞌe yu yamulal tuꞌ, yutol jaꞌjun ebꞌ chi unen amulal tuꞌ, catuꞌ chi yakꞌon xaambꞌal ebꞌ yetoj ebꞌ ix ix chi bꞌeybꞌalne amulal. Yu jun tuꞌ, yuxan jaꞌ jun conobꞌ cꞌam snaꞌbꞌal tiꞌ, oj etex eloj.
15Caxcꞌal jix oc spenail conobꞌ Israel, man ojabꞌ laan oj chi yun yoc spenail conobꞌ Judá tiꞌ. Cꞌam ojabꞌ chi too ebꞌ yin eyilal bꞌey Guilgal, tam wal chi atoj ebꞌ bꞌey Bet-avén,#4:15 Jaꞌ titiꞌ chi bꞌina Bet-avén, chi yal yeloc apnoj “snail comon dios” tol cꞌam yeloc apnoj. Jaꞌ jun bꞌie tuꞌ chi al-le yin conobꞌ Betel. Jaꞌ Betel, chi yal yeloc apnoj, “sna Dios”. Jaꞌ bꞌey conobꞌ Betel tuꞌ, jaꞌ naj Jeroboam, jix swaꞌne a stemplo wan comon dios yet chi oc ebꞌ Israel yin eyilal tet. tam wal chi yakꞌ stiꞌ ebꞌ yin jin bꞌi, jain Jehová iquis jin tiꞌ.
16Jaꞌ conobꞌ Israel, caw pit jix yute sbꞌa, laan jaxca junoj noꞌ wacax tol cꞌamto chi sucbꞌanelei. Ta jaxca tuꞌ, ¿tumi wal oj skeꞌ jin teynen low ebꞌ bꞌey ey an yaax cꞌultaj jaxca xacꞌal junoj noꞌ yuneꞌ meꞌ?
17Jal pax conobꞌ Efraín xin, jix too xacꞌal can ebꞌ yintaj yechel comon dios, oj yil xacꞌal sbꞌa ebꞌ.
18Masanil ebꞌ jix eyqꞌueyi; jaxca xacꞌal chi yun yeyqꞌuey ebꞌ uqꞌuem an. Cꞌamxa chi sbꞌej yunen amulal ebꞌ. Jaꞌ ebꞌ syaawil ebꞌ, chi yoche xacꞌal ebꞌ chi yun tzet caw qꞌuixwiltaj.
19Jaxca chi yun yiꞌletoj kꞌalem yu kaꞌeꞌ, queytuꞌ oj yun yiꞌletoj ebꞌ. Tuxa cꞌal oj qꞌuixwoj can a ebꞌ yu xaambꞌal chi yakꞌ tet comon dios tuꞌ.
© 2016, Wycliffe Bible Translators, Inc. All rights reserved.