Oseas 2
2
1Al tet ebꞌ ja wet conobꞌ jaxca tiꞌ:
Sconobꞌ Dios keocoj, eyxa scamcꞌulal Naj kin, ja chi, ẍi Jehová.
Jaꞌ Scamcꞌulal Dios Yin Ebꞌ Sconobꞌ Tol Amul
2Jix yalon Jehová ey jin, tol jain Oseas jin tiꞌ, jaꞌ tet Israel chi waoc jin bꞌa yin txꞌoxbꞌanilal yetoj ebꞌ wuninal cꞌal xutx ebꞌ, yuxan jix wal tet ebꞌ wuninal jaxca tiꞌ: Jaꞌ ix je txutx tuꞌ manxa wistiloj ix, manxa pax yichamiloj jin ix, yuxan alwej tet ix, tol cꞌam ojabꞌxa chi yatoj sbꞌa ix yin amulal, tol ojabꞌ chi sbꞌejcan ix junoj winaj chi yoche tuꞌ, je chi tet.
3Ta man oj yun jaxca tuꞌ, oj wiꞌel sqꞌuixwil ix, oj jin tꞌirbꞌa eloj, jaxca yel tꞌiran yet jix ali. Jaxca wal tajin txꞌotxꞌ bꞌey cusiltaj txꞌotxꞌ oj wute canoj, catuꞌ oj cam yu tajin tiꞌal.
4Man cꞌal oj okꞌ jin cꞌul je yin, yutol yuneꞌ jex amul ix.
5Jaꞌ ix je txutx tuꞌ, jix oc ix yin amulal. Jix etex el swatxꞌilal yet jix yalon ix jaxca tiꞌ: Oj toj jin sey mac ey jin camcꞌulal yin, mac ebꞌ chi akꞌon jin loꞌbꞌe cꞌal jaꞌ jaꞌ chi wuqꞌue, mac chi akꞌon jin lana, cꞌal jin lino, waceite cꞌal jin vino, ẍi ix.
6Yu jun tuꞌ, yuxan oj jin majche el sbꞌe ix yetoj qꞌuix, oj waon oc scolalil yinlaj, yuxan manxa oj ilcha sbꞌe ix bꞌey oj toj.
7Oj toj cꞌal tzajan ix yintaj mac chi yoche tuꞌ, manxa oj michꞌcha ebꞌ yu ix. Oj seyecꞌoj, manxa oj ilcha yu, catuꞌ oj yalon jaxca tiꞌ: Oj jin meltzo bꞌey naj wichamil yet sbꞌabꞌelal. Watxꞌtaꞌ wei yetoj naj, yintaj pax tinaniꞌ, ẍi ix, oj yaloni.
8Ma yotajne eloj, ta tol jain chi wakꞌ stiriw, svino, cꞌal yaceite olivo; tol jain chi wiꞌa can chꞌen plata cꞌal oro chi yakꞌ tet jun comon dios Baal.
9Yu jun tuꞌ, yuxan oj wiꞌa jin tiriw yet stiempoal skꞌuple a ixim, cꞌal jin vino, catuꞌ oj wiꞌon cꞌal pax ecꞌ jin lana cꞌal jin lino chi oc spichiloj.
10Sattaj wal ebꞌ jix yochele sbꞌa yetoj tuꞌ, catuꞌ oj jin tꞌirbꞌan eloj yu xꞌoxle el sqꞌuixwilal. Cꞌamxa mac oj colon el yul jin kꞌabꞌ.
11Oj wakꞌ lawoj ey stzalacꞌulal, cꞌal skꞌin yet chi ali xꞌaaw, cꞌal yet scꞌual xewilal, yetoj cꞌal masanil wan kꞌin chi ya cꞌaltaꞌ ocoj.
12Catuꞌ oj wakꞌon lawoj ey an yuva cꞌal teꞌ higo, jaꞌton yin wan chi yal jaxca tiꞌ: Jaꞌton wal jin tool jix yakꞌ mac chin camcꞌulne jin bꞌa yetoj, ẍi. Jaꞌ wan tuꞌ oj jin kꞌojcantoj xol-laj cꞌultaj, jaxa cꞌal noꞌ xol-laj teꞌal noꞌ oj loꞌon sat awo tuꞌ.
13Jain Jehová jin chi walaꞌ, tol oj waoc syaꞌilal yibꞌan ebꞌ, yutol miman tiempo jix sbꞌatxbꞌa oc incienso sattaj jun comon dios Baal. Catuꞌ jix swaꞌne el sbꞌa jaxca junoj ix chi yaoc ue cꞌal chꞌen ome yin xiquin, catuꞌ chi tocꞌal tzajan yintaj mactxequel chi camcꞌulnen tuꞌ, catuꞌ cꞌamxa chin naꞌletej yu.
Ey Scamcꞌulal Dios Yin Sconobꞌ Israel
14Caxcꞌal jaxca tuꞌ jix yute sbꞌa, oj jin monte junelxa, catuꞌ oj wiꞌontoj bꞌey txꞌotxꞌ cusiltaj txꞌotxꞌ junelxa. Jaꞌ tituꞌ oj wal watxꞌ kꞌane tet.
15Oj wakꞌon txꞌotxꞌ txꞌotxꞌ bꞌey chi yaw uva junelxa. Jaꞌ txꞌotxꞌ spananil Acor, manxa spananiloj bꞌiscꞌulal oj yunne; tol jaxca xa junoj spananil yet yipcꞌulal oj wute canoj. Jaꞌ tituꞌ oj takꞌwoj ey jin, jaxca wal jix yun yet kꞌopoto, jaxca yet jun scꞌual yet jix eltej bꞌey txꞌotxꞌ Egipto.
16Jain caw Jehová jin chi walaꞌ, tol jaꞌ yet jun cꞌual tuꞌ oj yalon jaxca tiꞌ: Jaach wichamil, ẍi. Manxa oj yalaꞌ: Jaach Baal, waawil jaach,#2:16 Baal, chi yal yeloc apnoj “Yaaw”. Ey cꞌal pax bꞌey chi yal yeloc apnoj, “ichamile”. Asan xin, ma yal scꞌul Dios chi akꞌle bꞌina jun bꞌie tuꞌ, yutol sbꞌi sdiosal ebꞌ txꞌoj conobꞌal. man ẍi oj.
17Junelne oj wiꞌel yin stiꞌ, cꞌal yin snaꞌbꞌal yin yakꞌon bꞌina wan Baal, cꞌamxa bꞌakꞌin oj yakꞌ bꞌina jun bꞌie tuꞌ.
18Jaꞌ yet jun cꞌual tuꞌ, oj wakꞌ jin wa kꞌane yetoj noꞌ xol-laj teꞌal noꞌ, noꞌ tzꞌiquin, cꞌal noꞌ labꞌa yet cꞌamxa tzet oj jaach yute noꞌ; catuꞌ oj wiꞌon el yopiso julbꞌal bꞌey jun nación tiꞌ, chꞌen lanza, cꞌal jantaj mitxꞌkꞌabꞌe yet jowal, yet watxꞌ oj xew ebꞌ jin conobꞌ tiꞌ yin cꞌamxa tzet oj snaꞌ.
19Jaach conobꞌ Israel, jaxca tol oj jaach oc wistiloj yin junelne, yin sjichanil, cꞌal yin smooalil, yutol oj okꞌ jin cꞌul ja win, cꞌal jaach jin camcꞌulneni.
20Jaxca tol oj jaach oc wistiloj, oj wun cꞌal tzet jix walaꞌ, queyton tuꞌ, oj yun jin ja wotajne eloj tol Jehová jin.
21Jain caw Jehová jin chi walaꞌ: Jaꞌ yet jun cꞌual tuꞌ, oj wal tet satcanlaj, catuꞌ oj tit nabꞌ yibꞌan txꞌotxꞌ txꞌotxꞌ tiꞌ;
22catuꞌ oj chꞌibꞌa ixim tiriw sat txꞌotxꞌ txꞌotxꞌ tiꞌ, yetoj vino cꞌal aceite. Queytuꞌ oj yun jin spajtzen xa ebꞌ jin conobꞌ, tol waꞌnebꞌil wu.
23Oj wakꞌ caey ecꞌ ebꞌ jin conobꞌ bꞌey sat txꞌotxꞌ txꞌotxꞌ tiꞌ yet chi oc ebꞌ wetoj. Jaxa jin camcꞌulal yin ix Lo-ruhama. Cꞌal yin naj Lo-amí oj wal jaxca tiꞌ: Jin conobꞌ jaach, jin chi. Jaxa ebꞌ oj alon ey jin jaxca tiꞌ: Cu Diosal jaach, ẍi ebꞌ, oj yalon ebꞌ, ẍi Jehová.
© 2016, Wycliffe Bible Translators, Inc. All rights reserved.