Éxodo 8

Jix Pitzcꞌu A Noꞌ Patzaꞌ Yul-laj Jaꞌ Jaꞌ

1Jix yalon Jehová tet Moisés jaxca tiꞌ:

—Asiꞌ kꞌanabꞌan yetoj naj sreyal Egipto, cha walon tet naj: Jaꞌ Dios chi alon ey jaach jaxca tiꞌ: Chaꞌtoj ebꞌ jin conobꞌ tiꞌ, yet chi too ebꞌ yin eyilal ey jin bꞌey txꞌotxꞌ cusiltaj txꞌotxꞌ. 2Ta tol man oj ja chaꞌtoj ebꞌ jin conobꞌ tiꞌ, oj waoc syaꞌilal ja wibꞌan, oj wakꞌ pitzcꞌu a noꞌ patzaꞌ bꞌey masanil yul conobꞌ Egipto tiꞌ. 3Oj wakꞌ pitzcꞌu a noꞌ yul jaꞌ jaꞌ masanil, oj octoj noꞌ yul-laj ja despacho, oj atoj noꞌ sat ja txꞌat bꞌey chach weyi, catuꞌ oj octoj noꞌ yul-laj sna ebꞌ eyoc yin yopiso ja wetoj, cꞌal yul-laj sna masanil ánima, cꞌal yul-laj jorna bꞌey chi waꞌxi ixim pan cha loꞌ, cꞌal bꞌey satlaj teꞌ akꞌin bꞌey chi cal-le a ixim pan. 4Oj oc xacꞌal noꞌ ja win, cꞌal yin ebꞌ eyoc yin yopiso ja wetoj, cꞌal yin masanil ebꞌ ja wet conobꞌ, ẍi Jehová, ja chi tet, ẍi Dios.

5Jix yalon pax Jehová tet naj Moisés jaxca tiꞌ:

—Al tet naj Aarón, tol chi yatoj skꞌojoch yibꞌan masanil jaꞌ jaꞌ, jaꞌ niẍtej jaꞌ, cꞌal jaꞌ mimej naabꞌ jaꞌ, yet chi aol bꞌulna noꞌ patzaꞌ, catuꞌ chi noel yul yet Egipto tiꞌ yu noꞌ, ja chi tet Aarón.

6Jix lawi tuꞌ, jix yaontoj skꞌojoch naj Aarón yibꞌan jaꞌ jaꞌ bꞌey yul yet Egipto, catuꞌ jix aol bꞌulna noꞌ patzaꞌ. Jix noel masanil yul yet Egipto yu noꞌ. 7Jaxca tuꞌ jix yute pax ebꞌ naj jelan chi yute sbꞌa yetoj tzet cuybꞌil yu, jix jul cꞌal pax noꞌ patzaꞌ yul conobꞌ Egipto yu ebꞌ. 8Jix lawi tuꞌ xin, catuꞌ jix awtele Moisés cꞌal Aarón yu naj rey Faraón, jix yalon tet ebꞌ:

—Txalanwej tet Jehová, yet watxꞌ chi yiꞌel noꞌ patzaꞌ tiꞌ ey jin cꞌal yul jin conobꞌ, catuꞌ oj jin jajon el ebꞌ sconobꞌ yet chi too yakꞌon xaambꞌal ebꞌ tet Dios, ẍi naj rey tuꞌ.

9Jix takꞌwi Moisés tet naj rey:

—Al ey jin xin, bꞌakꞌin chin txali tet Jehová, yet chi yiꞌel Dios noꞌ patzaꞌ tiꞌ ja win, cꞌal yin ebꞌ eyoc yin yopiso ja wetoj, cꞌal xol masanil ánima, cꞌal yul-laj je na. Asanxane yul-laj jaꞌ jaꞌ, chi cancan noꞌ, ẍi naj Moisés.

10—Yet yecal, ẍi naj rey.

Jix yalon naj Moisés jaxca tiꞌ:

—Oj yun jaxca cha wal tuꞌ xin, catuꞌ oj ja wotajnen eloj tol cꞌam mac laan jaxca Jehová cu Diosal jon. 11Jaxca ton tuꞌ oj yun yel noꞌ bꞌey ja despacho, cꞌal bꞌey sna ebꞌ eyoc yin yaawil ja wetoj, cꞌal xol masanil ánima, jaxa cꞌal noꞌ ey yul jaꞌ jaꞌ oj cancanoj, ẍi naj Moisés.

12Jix lawi tuꞌ xin, jix eltej naj Moisés cꞌal naj Aarón sattaj naj rey, catuꞌ jix txali Moisés tet Dios tol chi el noꞌ patzaꞌ tuꞌ. 13Jix yun Jehová jaxca tzet jix skꞌan Moisés, catuꞌ jix camel noꞌ masanil bꞌey yul-laj na, cꞌal stiꞌ na, cꞌal xol-laj teꞌ. 14Catuꞌ jix syambꞌan a ebꞌ ánima masanil noꞌ camnaj patzaꞌ tuꞌ, yin bꞌulquiltajil bꞌey masanil yinlaj na tuꞌ, pena xacꞌal yecꞌ sabꞌ noꞌ. 15Jaꞌ yet jix yilon naj rey tol cꞌamxa syaꞌilal chi jul yibꞌan, catuꞌ jix yakꞌon pitbꞌoj el snaꞌbꞌal junelxa, ma sjije tzet jix yal tet Moisés, cꞌal tet Aarón, jaxca jix yun yalon Jehová.

Jix Pitzcꞌu A Noꞌ Kocꞌ Us

16Jix yalon Jehová tet naj Moisés:

—Al tet naj Aarón, tol chi yiꞌa skꞌojoch catuꞌ chi smakꞌon ey yibꞌan spojojal sat txꞌotxꞌ txꞌotxꞌ, catuꞌ chi oc can pojoj tuꞌ yin kocꞌ usal bꞌey masanil yul yet Egipto, ẍi Dios.

17Jaxca ton tuꞌ jix yute naj Moisés yetoj Aarón. Jix smakꞌey skꞌojoch yibꞌan spojojal txꞌotxꞌ txꞌotxꞌ, queytuꞌ jix yun yoc pojoj tuꞌ yin kocꞌ usal bꞌey masanil yul yet Egipto, catuꞌ jix chiꞌwa noꞌ yin ebꞌ ánima cꞌal yin noꞌ noꞌ. 18Jacꞌalaꞌ ebꞌ naj jelan yetoj tzet cuybꞌil yu, jix smakꞌ pax ey skꞌojoch ebꞌ jaxca jix yute yet Aarón tuꞌ yaloni. Jix yoche ebꞌ chi oc pojoj tuꞌ yin kocꞌ usal, ma skeꞌ yu ebꞌ, jaxa noꞌ us tuꞌ jix chiꞌwa noꞌ yin ebꞌ ánima cꞌal yin noꞌ jobꞌbꞌeal noꞌ. 19Yu jun tuꞌ xin, jix yalon ebꞌ naj tzꞌajan scꞌul tuꞌ tet naj rey:

—Jaꞌ jun tiꞌ smulnail Dios, jaꞌ Naj chi uteni, ẍi ebꞌ naj.

Jix cawbꞌi cꞌal el snaꞌbꞌal naj rey tuꞌ, ma ẍaꞌ naj yabꞌe tzet jix yal Moisés cꞌal Aarón, jaxca yalon Jehová.

Jix Pitzcꞌu A Noꞌ Mimej Yaax Jaꞌ Us

20Jix yalon pax Jehová tet Moisés jaxca tiꞌ:

—Jaꞌ yet skꞌinibꞌ yet sebꞌ yecal chi too jun rey tuꞌ bꞌey stiꞌ jaꞌ, catuꞌ chi too ja walon tet jaxca tiꞌ: Jaxca tiꞌ yalon Jehová: Tol cha jajel ebꞌ jin conobꞌ yet chi oc ebꞌ yin eyilal ey jin. 21Ta tol man oj ja jajel ebꞌ jin conobꞌ tiꞌ, oj watoj noꞌ mimej yaax jaꞌ us ja wibꞌan, cꞌal yibꞌan masanil ebꞌ ey yopiso ja wetoj, cꞌal yibꞌan masanil ebꞌ ja conobꞌ. Oj noel masanil yul-laj na cꞌal sat txꞌotxꞌ yul yet Egipto. 22Jaꞌ yet oj yunen wan tuꞌ, cꞌam junoj yaax jaꞌ us tuꞌ oj ecꞌ yul yet Gosen bꞌey eyecꞌ ebꞌ jin conobꞌ. Jaxca tuꞌ oj yun ja wotajne eloj tol jain Jehová jin, Dios jin bꞌey masanil yul yibꞌankꞌinal tiꞌ. 23Jaxca tuꞌ oj yun ja wotajne eloj tol ey sqꞌuexanil ebꞌ jin conobꞌ tiꞌ yintaj ebꞌ ja conobꞌ tuꞌ yul jin sat. Yet yecal chi sajlemtoj noꞌ yaax jaꞌ us, ẍi Jehová, ja chi.

24Jaxca tuꞌ jix yute Jehová. Jaxca xacꞌal mucꞌ yecꞌ noꞌ yaax jaꞌ us tuꞌ, jix apni oc noꞌ yul sdespacho naj rey cꞌal bꞌey yul-laj sna ebꞌ ey yopiso yetoj naj, cꞌal bꞌey masanil yul yet Egipto. Junelne jix yetnetoj noꞌ yaax jaꞌ us tuꞌ yul conobꞌ tuꞌ.

25Jix lawi tuꞌ xin, catuꞌ jix awtele naj Moisés cꞌal Aarón yu naj rey, jix yalon tet ebꞌ jaxca tiꞌ:

—Asiꞌwej, akꞌwej je xaambꞌal tet je Diosal tuꞌ; jaꞌ ojabꞌ cꞌal pax yul yet Egipto tiꞌ, ẍi naj.

26Jix takꞌwi naj Moisés:

—Cꞌam chi skeꞌ jaxca tuꞌ, yutol jaꞌ noꞌ noꞌ chi kakꞌ yin xaambꞌal tet Jehová cu Diosal tuꞌ jon, miman yeloc apnoj noꞌ yul sat ebꞌ ja wet conobꞌ tiꞌ. Yu tuꞌ xin, ta chi yil ebꞌ ánima tuꞌ cu makꞌon cam noꞌ noꞌ tuꞌ jon, jaxam cu skꞌojchꞌenen ebꞌ jon. 27Yu tuꞌ xin, sowalil jaꞌ bꞌey txꞌotxꞌ cusiltaj txꞌotxꞌ chi cu too jon, ey oxebꞌ cꞌual stecꞌbꞌanil, jaꞌ tituꞌ chi too kakꞌ cu xaambꞌal tet Jehová cu Diosal jon, jaxca jix yute yaloni, ẍi Moisés.

28Jix yalon pax naj rey Faraón jaxca tiꞌ:

—Chi skeꞌ je to bꞌey cusiltaj txꞌotxꞌ tuꞌ xin, yet chi too je yakꞌon je xaambꞌal tet Jehová je Diosal tuꞌ, asantane yel man naat oj chex toi, catuꞌ chex txali tet Dios wu jain tiꞌ an, ẍi naj rey.

29Jix takꞌwi Moisés tet naj:

—Asanne chin eltoj titiꞌ, catuꞌ chin kꞌanon tet Jehová, jaꞌ yet yecal chi el noꞌ yaax jaꞌ us tiꞌ ey jaach tiꞌ, cꞌal bꞌey ebꞌ eyoc yin yopiso ja wetoj, cꞌal bꞌey masanil yul ja nación tiꞌ, cꞌam ojabꞌxa chon ja wetne, catuꞌ cꞌam ojabꞌxa tzet cha wal ey jon yet chi too kakꞌon cu xaambꞌal tet Jehová, ẍi Moisés.

30Jix cꞌal eltej Moisés bꞌey yul sdespacho naj rey tuꞌ, catuꞌ jix txali tet Jehová. 31Jix yabꞌen Jehová tzet jix skꞌan Moisés yin txa, jix iꞌle el noꞌ yaax jaꞌ us tuꞌ yu Dios, cꞌal bꞌey ebꞌ eyoc yin opiso yetoj, cꞌal xol bꞌey masanil ebꞌ ánima; cꞌamxa junoj noꞌ jix cani. 32Jacꞌalaꞌ jix spitne pax sbꞌa naj rey tuꞌ junelxa; ma jajle el ebꞌ conobꞌ Israel tuꞌ yu naj.

Currently Selected:

Éxodo 8: knj

Highlight

Copy

Compare