Éxodo 35
35
Sleyalil Scꞌual Xewilal
(Éxodo 31:12-17)
1Jix yambꞌale oc masanil ebꞌ conobꞌ Israel yu Moisés, catuꞌ jix yalon wan ẍejbꞌanil Dios tet ebꞌ. 2Yin wajebꞌ cꞌual chi skeꞌ che mulnai, jaxa yet sjuj cꞌual xin, yet xa Jehová chi yun can ocoj. Masanil jun cꞌu tuꞌ chex xewi, catuꞌ che yiꞌon a can sbꞌi Jehová. Jaꞌ mac chi mulna yet jun cꞌual tuꞌ sowalil tol chi cami. 3Tam wal je nubꞌon oc je kꞌakꞌ, cꞌam chi skeꞌ je yaon oc yet jun cꞌu tuꞌ, yal cꞌal bꞌeytuꞌ caan jex ecꞌoj, ẍi Moisés.
Saꞌbꞌeal Chi Akꞌle Bꞌey Snail Scalubꞌal Jehová
(Éxodo 25:1-9)
4Jix yalon pax Moisés tet ebꞌ yet Israelal: Jaꞌ ẍejbꞌanil Dios chi yal jaxca tiꞌ: 5Tol che yiꞌtej junoj je saꞌbꞌeal tol chi el wal yin je cꞌul je yakꞌon bꞌey snail scalubꞌal Jehová. Che yiꞌwejtej chꞌen oro, chꞌen plata yetoj chꞌen bronce; 6che yiꞌontej an kꞌejweinaj kꞌap, an púrpura yetoj an lino tol caw watxꞌ yili, yetoj xil noꞌ chiw tol txꞌumbꞌil, 7cꞌal stzꞌuumal noꞌ meꞌ tol cajin yanil eyocoj, cꞌal noꞌ tzꞌuum caw labꞌabꞌi xacꞌal, cꞌal teꞌ acacia, 8yetoj aceite chi kꞌanle yetoj tzejtebꞌal, yetoj perfume chi oc xol aceite olivo chi ale oc yin junoj chi oc can yetoj Jehová, chi oc cꞌal pax xol incienso tuxa cꞌal chi sukꞌukꞌi yoc sabꞌ, 9yetoj cꞌal chꞌen cornalina, cꞌal wanxa chꞌen chꞌen yel xacꞌal watxꞌ yili yet chi oc yelawiloj chaleco, yetoj an smajil xaamscꞌul spichil naj sat yakꞌomal xaambꞌal tet Dios.
Jix Waꞌnele Smitxꞌkꞌabꞌil Scalubꞌal Jehová
(Éxodo 39:32-43)
10Masanil ebꞌ winaj tol jelan snaꞌbꞌal yin swaꞌnen tzetyetal tol watxꞌ yili, tit ojabꞌ ebꞌ, catuꞌ chi swaꞌnen ebꞌ tzet jix yal Jehová tol chi waꞌxi. 11Swaꞌne ojabꞌ jin Calubꞌal ebꞌ, jaꞌton kꞌap na, yetoj cꞌal tzet chi oc yibꞌan, yetoj cꞌal chꞌen slocxomal, cꞌal ẍemteꞌal, sreglail, yoyal, cꞌal yetoj yich bꞌey chi ey bꞌatxanoj, 12cꞌal teꞌ scaẍail yet swa kꞌane Dios, yetoj sreglail chi oc sbꞌatxlubꞌoj, yetoj smajil bꞌey chi akꞌle tan spenail, yetoj an cortina chi majchen el teꞌ; 13cꞌal teꞌ meẍa yetoj sreglail chi oc sbꞌatxlubꞌoj, cꞌal yetoj smitxꞌkꞌabꞌil, cꞌal ixim pan chi akꞌle jin sattaj, 14cꞌal sbꞌatxlubꞌal tzejtebꞌal, yetoj cꞌal masanil smitxꞌkꞌabꞌil, yetoj cꞌal wan tzejtebꞌal, yetoj yaceiteal chi eytoj yul wan tzejtebꞌal tuꞌ. 15Catuꞌ chi waꞌxi pax jun yet xaambꞌal yet incienso cꞌal yetoj sreglail chi oc sbꞌatxlubꞌoj, yetoj cꞌal aceite olivo chi kꞌanbꞌalnele yet chi oc yin junoj chi oc can wetoj, cꞌal incienso tol sukꞌukꞌi yoc sabꞌ, cꞌal an cortina yet smajil stiꞌ bꞌey chi octoj bꞌey jin calubꞌal, 16jaxa jun bꞌey chi tzꞌaꞌ xaambꞌal, cꞌal srejail tol chꞌen bronce, yetoj cꞌal steꞌal, masanil smitxꞌkꞌabꞌil, cꞌal yetoj jun palangana yetoj sbꞌatxlubꞌal yalan, 17cꞌal an cortina bꞌey sattaj eltoj stiꞌ snail jin calubꞌal, yetoj yoyal cꞌal sbꞌatxlubꞌal yalan, cꞌal an cortina yet smajil bꞌey stiꞌeltoj snail jin calubꞌal, 18yetoj cꞌal yestacail cꞌal xꞌanil chi oc yin stiꞌlaj jin calubꞌal tuꞌ, cꞌal yin sattaj eltoj yamakꞌil tuꞌ, 19cꞌal an pichile tol chembꞌil, chi yaoc ebꞌ yakꞌomal xaambꞌal ey jin bꞌey yul jin calubꞌal, jaꞌton an pichile tol chi yaꞌilnelei chi yaoc Aarón, yetoj cꞌal spichil ebꞌ scꞌaal naj, jaꞌ chi yaoc ebꞌ yet chi oc ebꞌ yin yopiso, ẍi Jehová, ẍi naj Moisés.
Jix Yiꞌtej Saꞌbꞌeal Ebꞌ Conobꞌ
20Masanil ebꞌ ánima jix yal can toj sbꞌa ebꞌ tet naj Moisés. 21Jix lawi tuꞌ, ey wal mactxequel jix tit yin snaꞌbꞌal yakꞌon saꞌbꞌeal, jix yakꞌon can tet Jehová yu swaꞌxubꞌal scalubꞌal Jehová, bꞌey chi ẍaꞌle sbꞌa ebꞌ ánima yetoj Dios, cꞌal masanil tzet chi kꞌanlei, cꞌal an pichile watxꞌ yili. 22Ebꞌ winaj yetoj ebꞌ ix ix, jix yiꞌtej saꞌbꞌeal ebꞌ tet Jehová, catuꞌ jix jul yakꞌon ebꞌ tet Moisés. Jix yiꞌtoj ebꞌ wan chꞌen chꞌen chi oc yelawiloj pichile, chꞌen kolkꞌabꞌe, cꞌal chꞌen ue, yetoj chꞌen ome cꞌal wanxa chꞌen chꞌen tol oro cꞌal eloj, jix yakꞌ ebꞌ tet Jehová. 23Ey pax ebꞌ jix iꞌontej an kꞌejweinaj kꞌap, cꞌal an kꞌap púrpura, yetoj cajin yili, cꞌal an lino caw watxꞌ yili, yetoj xil noꞌ chiw tol txꞌumbꞌil eyoj, yetoj cꞌal stzꞌuumal noꞌ icham meꞌ bꞌonbꞌil yetoj cajin ambꞌal, yetoj cꞌal noꞌ tzꞌuum caw labꞌabꞌi; masanil wan tuꞌ jix yiꞌtoj ebꞌ ánima tet Jehová. 24Ey pax ebꞌ jix el yin scꞌul xin, jix yiꞌtoj chꞌen plata ebꞌ, cꞌal chꞌen bronce tet Jehová. Ey mac ey teꞌ acacia bꞌey, jix yiꞌ cꞌal pax toj ebꞌ, yet chi kꞌanle teꞌ yin scalubꞌal Jehová. 25Ey pax ebꞌ ix ix tol jelan yin spatxꞌonen an txꞌal yetoj skꞌabꞌ, jix yiꞌontoj an kꞌejweinaj kꞌap ebꞌ, cꞌal an kꞌap púrpura, yetoj an kꞌap cajin yili, yetoj an lino caw watxꞌ yili. 26Ey pax ebꞌ ix ix tol caw jelan, jix tit wal yin snaꞌbꞌal spatxꞌonen ey xil noꞌ chiw yetoj skꞌabꞌ. 27Jaxa ebꞌ naj icham winaj yul conobꞌ Israel, jix yiꞌtoj chꞌen ónice ebꞌ, yetoj cꞌal wanxa chꞌen chꞌen caw watxꞌ yili, yet chi oc chꞌen yelawiloj an camiẍe chaleco yetoj an smajil xaamscꞌul spichil ebꞌ yakꞌomal xaambꞌal tet Dios. 28Cꞌal perfume, yetoj aceite chi kꞌanbꞌalnele yin tzejtebꞌal, cꞌal aceite olivo chi kꞌanle yin junoj chi oc can yetoj Jehová, cꞌal incienso tol sukꞌukꞌi yoc sabꞌ.
29Masanil ebꞌ conobꞌ Israel, ebꞌ winaj cꞌal ebꞌ ix ix tol jix el wal yin scꞌul ebꞌ yakꞌon scolwal yet watxꞌ chi yiꞌ sbꞌa mulnail jaxca jix yun yalon Dios tet Moisés.
Ebꞌ Jix Waꞌnen A Scalubꞌal Jehová
(Éxodo 31:1-11)
30Jix yalon pax Moisés tet masanil ebꞌ yet Israelal jaxca tiꞌ: Tuxa jix sicꞌle el naj Besalel yu Jehová, scꞌaal naj Urí, yitxiquin Hur, naj yicꞌaal Judá. 31Jaꞌ Dios jix yaoc Yespíritu yin, yet chi akꞌle sjelanil, cꞌal snaꞌbꞌal, cꞌal otajbꞌilal yet chi skeꞌ snaꞌcha el yu, 32yet chi swaꞌnen yechel junoj tzetyetal chi waꞌxi, yin chꞌen oro, ma plata, cꞌal chꞌen bronce. 33Catuꞌ jix akꞌle pax sjelanil, yet chi waꞌxi pax chꞌen chꞌen yel xacꞌal watxꞌ chi yunne, cꞌal yet chi waꞌxi ey yechel teꞌ teꞌ caw watxꞌ chi yunne, cꞌal yoc yelawiloj teꞌ. 34Jix yakꞌon pax sjelanil Jehová tet naj Aholiab, scꞌaal Ahisamac, jix tit yin yicꞌaal Dan, yet chi cuyle wanxa ebꞌ oj colwa yetoj ebꞌ. 35Jix akꞌle sjelanil ebꞌ yu Jehová, yet chi swaꞌnen masanil tzetyetal ebꞌ tol yel xacꞌal watxꞌ yili; yet chi ale oc yechel, cꞌal yet chi tzꞌisle oc an kꞌap yelawiloj, an kꞌejweinaj yili, yetoj an púrpura, cꞌal an cajin yili, cꞌal an lino tol caw watxꞌ ye ẍemlei; jelan ebꞌ yin swaꞌnen junoj tzetyetal tol watxꞌ yili, cꞌal yin jix xꞌoxon yechel junjun tujan mulnail.
Currently Selected:
Éxodo 35: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
