Éxodo 18
18
Jix Bꞌetecꞌ Naj Jetró Scꞌatan Moisés
1Jaꞌ naj Jetró sniꞌ Moisés, yalomal oc stiꞌ ebꞌ ánima tet sdiosal yeoc naj yu ebꞌ a Madián, jix yabꞌ naj masanil tzet jix yun scolwa Dios yetoj Moisés, cꞌal yetoj ebꞌ conobꞌ Israel yet jix iꞌle eltej ebꞌ yu Dios bꞌey Egipto. 2Jaꞌ naj Jetró tuꞌ, jix iꞌletej ix Séfora yu tet Moisés yetoj cawan yuninal ebꞌ, yutol akꞌbꞌil pax toj ix bꞌey smam yu naj Moisés tuꞌ. 3Jaꞌ naj bꞌabꞌel unin, Guersón,#18:3 Jaꞌ yin Hebreo, jaꞌ jun bꞌie chi yij Guersón, laan chi yun yal-le yetoj jun kꞌane, “txꞌoj conobꞌal”. sbꞌi naj, yutol yalnaj Moisés jaxca tiꞌ: Ecꞌabꞌwom cꞌal weoc xol ebꞌ txꞌoj conobꞌal tiꞌ, ẍi naj. 4Jaxa naj yet scaabꞌ chi yij Eliézer,#18:4 Jaꞌ jun bꞌie chi yij Eliézer, chi yal yeloc apnoj, “jaꞌ Dios jin Colomal”. yutol jix yal naj jaxca tiꞌ: Jaꞌ sDiosal jin mam, jaꞌ jix jin colon el tet chꞌen yespada naj Faraón, sreyal Egipto, ẍi naj.
5Jaxa yet jix yabꞌen naj Jetró tol jaꞌ bꞌey cusiltaj txꞌotxꞌ, jaꞌ tituꞌ bꞌulan ey naj Moisés yetoj ebꞌ yet conobꞌ bꞌey txꞌotxꞌ tzalan bꞌey jix xꞌox sbꞌa Dios, yuxan jix too naj Jetró yilaꞌ, jaꞌjun ix Séfora yistil Moisés tuꞌ yetoj, yetoj ebꞌ naj cawan yuneꞌ ix. 6Jix yalontoj naj Jetró tet naj Moisés:
—Jain ja niꞌ Jetró jin tiꞌ, lalan wapni oc jaach wiloni, jaꞌjun ix ja wistil wetoj an, yetoj pax ebꞌ naj je yuninal scawanil, ẍi toj naj.
7Yin xacꞌal eymanil jix eltej naj Moisés ẍaꞌon sniꞌ tuꞌ, jix ey noan naj sattaj, catuꞌ jix stzꞌubꞌon el stiꞌ. Jix lawi yakꞌlen scawil scꞌul ebꞌ xin, catuꞌ jix octoj ebꞌ bꞌey yul skꞌap na naj Moisés tuꞌ. 8Jix yalon naj Moisés tet sniꞌ tuꞌ tzet jix utele naj sreyal Egipto yu Jehová, yetoj cꞌal masanil ebꞌ conobꞌ a Egipto, yet jix col-le eltej ebꞌ conobꞌ Israel tuꞌ yu Dios, jix yalon pax naj yu jantaj syaꞌilal jix yil yetoj ebꞌ ánima tuꞌ bꞌey yul-laj bꞌe, cꞌal tzet jix yun scolwa Jehová yetoj ebꞌ.
9Caw jix tzala a scꞌul naj Jetró yet jix yabꞌen scolwal Dios yin conobꞌ Israel, yet jix col-le eltej ebꞌ yul skꞌabꞌ ebꞌ a Egipto. 10Jix yalon naj Jetró jaxca tiꞌ:
—Al-le ojabꞌ watxꞌ kꞌane tet Jehová, yutol jaꞌ Naj jix jex colon el yul skꞌabꞌ ebꞌ a Egipto, yetoj cꞌal yul skꞌabꞌ naj rey Faraón, cꞌal yalan ẍejbꞌanil naj. 11Jaꞌ tinaniꞌ xin, chi naꞌcha el wu, tol jaꞌ Jehová yel xacꞌal ecꞌbꞌan yipal yintaj wan chi al-le oc diosal, yutol jix jex col-le el yul skꞌabꞌ ebꞌ a Egipto yu, caxcꞌal caw jix smimanbꞌane sbꞌa ebꞌ sattaj Naj, ẍi naj Jetró tuꞌ.
12Jix lawi tuꞌ xin, jix yakꞌon tzꞌaꞌ jun noꞌ achꞌe meꞌ naj Jetró yin xaambꞌalil yu yalon swatxꞌ kꞌane tet Dios, catuꞌ jix yakꞌon wanxa xaambꞌal. Jix apni pax oc naj Aarón yetoj ebꞌ icham winaj yeoc yul conobꞌ bꞌey eyecꞌ sniꞌ naj Moisés tuꞌ, catuꞌ jix low ebꞌ sattaj Jehová.
Jix Yaoc Yopiso Wan Juez Naj Moisés
(Deuteronomio 1:9-18)
13Jaxa yet junxa cꞌual xin, jix ey chotan Moisés, yet chi waꞌxi yeoc jantaj jowal ey xol ebꞌ conobꞌ; masanil cꞌu ey cꞌal ecꞌ ebꞌ ánima tuꞌ sattaj naj. 14Jaꞌ yet jix yilon naj Jetró tzet chi yute naj Moisés yet chi waꞌxi yeoc jowal ey xol ebꞌ ánima tuꞌ, jix yalon naj tet jaxca tiꞌ:
—¿Tzet yuxan queytuꞌ cha wute ebꞌ ánima jaxca tiꞌ? ¿Tzet yuxan asan jaach cha waꞌne yeoc jowal ey xol masanil ebꞌ ánima tiꞌ? Ey ebꞌ tucꞌal chi ecꞌ cꞌu yu yechbꞌaneni, ẍi naj Jetró tuꞌ.
15Jix takꞌwi Moisés tet sniꞌ tuꞌ jaxca tiꞌ:
—Chi jul ebꞌ ánima tiꞌ ey jin, yutol jain chi wal tet Dios yu ebꞌ tzet chi yun swaꞌxi yeoc junoj kꞌane xol ebꞌ. 16Cꞌal yet chi yakꞌlen jowal ebꞌ, catuꞌ chi jul ebꞌ ey jin tiꞌ, catuꞌ chin naꞌon oc yin mactxequel chi ecꞌ yibꞌan mac yel chi yalaꞌ, chi lawi tuꞌ, chi walon ẍejbꞌanil cꞌal scuybꞌanil Dios tet ebꞌ an, ẍi Moisés.
17Catuꞌ jix yalon naj Jetró jaxca tiꞌ tet naj:
—Man watxꞌoj jaxca cha wute tuꞌ. 18Caw chach cꞌuumbꞌi aoj, catuꞌ chi cꞌuumbꞌi pax a ebꞌ ánima tiꞌ. Yel xacꞌal chi ecꞌ yibꞌan ja mulnail, yetoj pax oj ma jaach tzaji ja wilon ja txꞌojli. 19Abꞌ tzet oj wal ey jaach, jaꞌ Dios oj colwa ja wetoj. Jaach ey jaach oc sattaj Dios yu ja walon yu ebꞌ ánima tiꞌ, catuꞌ cha walon tet Dios yu scawxinajil ebꞌ. 20Watxꞌ tol cha cuy ebꞌ yin ẍejbꞌanil Dios, catuꞌ cha waloni tzet chi yun sbꞌeytoj ebꞌ, cꞌal tzet chi yun ebꞌ. 21Jaꞌ jun tzet cha wun tinaniꞌ, tol cha sicꞌ el jaywanoj ebꞌ winaj ey xiwcꞌulal tet Dios bꞌey xol ebꞌ a wet Israelal tiꞌ, ebꞌ tol jichan snaꞌbꞌal, ebꞌ man comonoj chi skꞌanel tumin yin ebꞌ ánima, catuꞌ cha waon oc yopiso ebꞌ yilon ebꞌ ánima tiꞌ. Ey ebꞌ cha waoc syaawiloj junoj mil ánima, ey pax ebꞌ cha waoc syaawiloj junoj 100 ánima, ey pax ebꞌ xin, asanne junoj 50 ánima bꞌey chi oc ebꞌ yaawilal, ey pax ebꞌ xin, asanne laonwan bꞌey chi oc ebꞌ yin yaawilal. 22Jaꞌ ebꞌ naj tiꞌ chi naꞌon oc yin ebꞌ ánima yin spenail yal cꞌal tzet horail. Ta jaxca tuꞌ, oj colwa ebꞌ yiꞌon el niꞌoj jun mulnail tiꞌ ja wibꞌan. Ta txenne kꞌaneal cꞌal jun tuꞌ, chi skeꞌ swaꞌne ey ebꞌ. Ta miman yeoc junoj jowal xin, jaxa yiꞌontej ebꞌ ja sattaj. Oj colwa ebꞌ yilontoj jun mulnail tiꞌ ja wetoj. 23Ta cha jije ja wunen jun tiꞌ, catuꞌ ta chi ẍaꞌ pax scꞌul Dios tol jaxca tuꞌ chi yunne, oj techa ja wu, jacꞌalaꞌ pax ebꞌ ánima tiꞌ oj meltzo ebꞌ yin tzalacꞌulal bꞌey caan, ẍi naj Jetró tuꞌ.
24Jix sjije naj Moisés yunen tzet jix yal sniꞌ tuꞌ. 25Yu tuꞌ xin, jix sicꞌon el naj ebꞌ caw ey snaꞌbꞌal, ebꞌ jelan xol ebꞌ yet Israelal tuꞌ. Catuꞌ jix ale oc yopiso ebꞌ naj yibꞌan junjun mil ánima, ey ebꞌ 100 ánima jix yiltoj, ey ebꞌ yin 50, ey pax ebꞌ laonwan jix yiltoj. 26Jaꞌ ebꞌ naj tuꞌ chi waꞌnen yeoc ebꞌ ánima tuꞌ yal cꞌal jantaj hora. Jal pax junoj jowal tol miman yeocoj, sowalil chi iꞌletoj sattaj naj Moisés; jaꞌ kꞌane txenne wal yeocoj, jaꞌ ebꞌ chi waꞌnen yei. 27Jix lawi tuꞌ, jix stakꞌele can sbꞌa naj Moisés yetoj sniꞌ, catuꞌ jix meltzo naj Jetró bꞌey sconobꞌ.
Currently Selected:
Éxodo 18: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
