Éxodo 17
17
Jix Eltej Jaꞌ Jaꞌ Bꞌey Sat Chꞌen Chꞌen
(Números 20:1-13)
1Jix el ebꞌ Israel bꞌey txꞌotxꞌ cusiltaj txꞌotxꞌ yul yet txꞌotxꞌ Sin, cꞌuancꞌulal jix yun sbꞌey stoo ebꞌ, jaxca jix yute yalon Jehová tet ebꞌ. Jix apni oc ebꞌ bꞌey jun txꞌotxꞌ chi yij Refidim, cꞌam jaꞌ jaꞌ chi skeꞌ yuqꞌuen ebꞌ tituꞌ.
2Caw jix tit sjowal ebꞌ ánima tuꞌ yin Moisés, jix yalon ebꞌ jaxca tiꞌ:
—Jaꞌ tinaniꞌ caw ey cu tajin tiꞌal jon, akꞌ jaꞌ kucꞌ jon, ẍi ebꞌ.
—¿Tzet yuxan chex awi oc win? ¿Tzet yuxan che yakꞌ porobꞌal Jehová? ẍi Moisés tet ebꞌ.
3Caw ey stajin tiꞌal ebꞌ conobꞌ tuꞌ, yuxan jix yaon el yaw ebꞌ tet Moisés, jix yalon ebꞌ jaxca tiꞌ:
—¿Tzet yuxan jix jon ja wiꞌeltej bꞌey Egipto? ¿Tumi yu cu cam yu tajin tiꞌal yetoj ebꞌ kuninal, cꞌal yetoj noꞌ cu jobꞌbꞌeal noꞌ tiꞌ? ẍi ebꞌ.
4Caw jix tac scꞌul naj Moisés yu ebꞌ, jix oc pax tean yin Jehová, jix yalon naj yin xa jaxca tiꞌ:
—¿Tzet wal chi wute ebꞌ ánima tiꞌ? Ian wal chin kꞌojchꞌennele cam yu ebꞌ an.
5Jix takꞌwi Dios tet naj jaxca tiꞌ:
—Jaꞌ tinaniꞌ, bꞌabꞌantoj sattaj ebꞌ ánima, catuꞌ cha wiꞌontoj jaywanoj ebꞌ icham winaj yeoc xol conobꞌ tiꞌ ja wetoj; catuꞌ cha wiꞌontoj teꞌ ja kꞌojoch, teꞌ jix ja wakꞌbꞌalne ja makꞌon sat jaꞌ miman Nilo. 6Oj jaach wechbꞌane bꞌey sjolom chꞌen chꞌen bꞌey txꞌotxꞌ wonan Horeb. Jaꞌ yet chach apni ocoj, cha makꞌon oc teꞌ ja kꞌojoch yin sat chꞌen chꞌen tuꞌ, jaxa yelol jaꞌ jaꞌ bꞌey sat chꞌen chꞌen tuꞌ, jaxa yuqꞌuen jaꞌ ebꞌ ánima tiꞌ, ẍi Jehová.
Queytuꞌ jix yute naj Moisés sattaj ebꞌ icham winaj yeoc xol conobꞌ Israel tuꞌ. 7Meribá#17:7 Jaꞌ jun kꞌane Meribá yin Hebreo chi yal yeloc apnoj “jowal”. jix yakꞌ yij sbꞌi jun txꞌotxꞌ tuꞌ ebꞌ, yutol pena jix yal ebꞌ yin naj Moisés. Catuꞌ jix yakꞌon pax ebꞌ yij sbꞌi, Masá,#17:7 Jaꞌ jun kꞌane Masá yin Hebreo chi yal yeloc apnoj “chi akꞌle porobꞌal”. yutol jix yakꞌ porobꞌal Jehová ebꞌ, jix yalon ebꞌ jaxca tiꞌ: ¿Ta wal yel eyecꞌ Jehová cu xol, ma cꞌamaj? ẍi ebꞌ.
Jix Yakꞌ Jowal Ebꞌ Israel Yetoj Ebꞌ Amalecita
8Jaꞌ yet eyecꞌ ebꞌ Israel bꞌey Refidim, jaꞌ yet tuꞌ jix apni oc ebꞌ Amalecita yakꞌ jowal yetoj ebꞌ. 9Yu tuꞌ xin, jix yalon Moisés jaxca tiꞌ tet Josué:
—Sicꞌ el jaywanoj ebꞌ naj Israel yet chi too ebꞌ yakꞌon jowal yetoj ebꞌ Amalecita. Yet skꞌinibꞌ yecal chin to bꞌey sjolom tzalan, catuꞌ chi wiꞌontoj teꞌ jin kꞌojoch tiꞌ, teꞌ chi skꞌanbꞌalne Dios wetoj, ẍi naj.
10Jix sjije Josué tzet jix yal naj Moisés, jix too yakꞌon jowal yetoj ebꞌ Amalecita. Jaxa naj Moisés yetoj naj Aarón cꞌal naj Hur, jix too ebꞌ bꞌey sjolom jun tzalan tuꞌ. 11Jaꞌ yet chi yiꞌon a skꞌabꞌ naj Moisés naat, caw chi eyqꞌuey ebꞌ Amalecita yu ebꞌ Israel. Jaxa yet chi yiꞌon ey skꞌabꞌ naj, ian wal chi eyqꞌuey ebꞌ Israel tuꞌ yu ebꞌ. 12Caw chi cꞌuumbꞌi a qꞌuetxan skꞌabꞌ naj Moisés tuꞌ, yuxan jix sey naj Aarón cꞌal naj Hur jun chꞌen chꞌen bꞌey jix ey chotan naj, jaxa ebꞌ jix mitxꞌon a skꞌabꞌ naj Moisés, junjun ebꞌ jix oc mitxꞌan yin junjun skꞌabꞌ, masantaꞌ jix too cꞌu. 13Jaxca tuꞌ jix yun yeyqꞌuey ebꞌ Amalecita yu naj Josué.
14Jix lawi tuꞌ xin, jix yalon Jehová tet naj Moisés:
—Tzꞌibꞌe can wan tiꞌ yul junoj juun, yet watxꞌ cꞌam chi too qꞌueycꞌulal je yu. Catuꞌ cha walon tet naj Josué tol jain oj jin qꞌueyel masanil ebꞌ Amalecita tiꞌ yin junelne, cꞌamxa bꞌakꞌin oj bꞌinale ecꞌ ebꞌ, ẍi Dios.
15Jix lawi tuꞌ xin, catuꞌ jix swaꞌnen jun yet xaambꞌal naj Moisés, jix yakꞌon yij sbꞌi: Jaꞌ Dios jin bandera yeocoj. 16Jix yalon Moisés jaxca tiꞌ:
¡Yutol jix yiꞌa skꞌabꞌ naj Amalec yin yakꞌon jowal yetoj Dios, yuxan jaꞌ Naj oj yakꞌ cꞌal jowal yetoj ebꞌ yicꞌaal Amalec!
Currently Selected:
Éxodo 17: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
