Hechos 17
17
Jaꞌ Yet Jix A Somna Ebꞌ Ánima Bꞌey Conobꞌ Tesalónica
1Jix ecꞌ Pablo yetoj Silas bꞌey conobꞌ Anfípolis yetoj bꞌey conobꞌ Apolonia. Catuꞌ jix too ebꞌ bꞌey conobꞌ Tesalónica, bꞌey ey jun snail sculto ebꞌ Israel. 2Jix octoj Pablo tuꞌ yetoj ebꞌ yul snail sculto ebꞌ tuꞌ, jaxca cꞌal chi yun bꞌey junjun conobꞌ. Jaꞌ yin oxebꞌ scꞌual xewilal* jix bꞌet al-le yabꞌ ebꞌ Israel tuꞌ yu ebꞌ. 3Jix yal tet ebꞌ, tzet tzꞌibꞌebꞌilcan yul An Juun, tzet utbꞌil jaꞌ Cristo sowalil ton jix yabꞌ syaꞌil, catuꞌ jix akꞌle camoj. Tol sowalil pax jix pitzcꞌu a xol ebꞌ camnaj. Catuꞌ jix yalon pax tet ebꞌ jaxca tiꞌ:
—Jaꞌton skꞌaneal Jesús lalan walon ey jex tiꞌ an, tol jaꞌton Cristo, ẍi naj Pablo tet ebꞌ. 4Ey ebꞌ Israel jix yaoc scꞌul yin Cristo, yuxan jix oc ebꞌ yetbꞌi oj Pablo yetoj Silas tuꞌ. Ey pax ebꞌ ma yaoc scꞌul yin. Ecꞌal pax ebꞌ Griego chi yiꞌey sbꞌa tet Dios, jix yaoc ebꞌ yin scꞌul. Ecꞌal pax ebꞌ ix ix miman yeloc apnoj, jix yaoc ebꞌ ix yin scꞌul. 5Jal ebꞌ Israel ma yaoc ebꞌ yin scꞌul, jaꞌ yet jix yilon ebꞌ jaxca tuꞌ, caw jix tit sjowal scꞌul ebꞌ, catuꞌ jix yambꞌale oc wan ebꞌ pena cꞌaltaꞌ snaꞌbꞌal yu ebꞌ. Jaꞌ ebꞌ jix syambꞌa oc ebꞌ tuꞌ, jacꞌal spenail chi ecꞌ sey ebꞌ yul-laj calle. Jaꞌ yet jix akꞌle scꞌul ebꞌ pena snaꞌbꞌal tuꞌ, jix akꞌle pax scꞌul masanil conobꞌ yu ebꞌ. Jix yuchon a somna ánima ebꞌ yu stit sjowal ebꞌ. Catuꞌ jix octoj ebꞌ yin cꞌam spermiso ebꞌ yul sna naj Jasón, yutol jaꞌ snaꞌon ebꞌ, tol jatuꞌ eyecꞌ Pablo yetoj Silas. Catuꞌ chi yiꞌon eltej ebꞌ yaloni, catuꞌ chi ale oc ebꞌ yul skꞌabꞌ ebꞌ conobꞌ. 6Cꞌam pax ebꞌ eyecꞌ yul na tuꞌ. Yuxan, jaꞌ naj Jasón yetoj jaywanxa ebꞌ creyente jix smitxꞌ ebꞌ, catuꞌ jix iꞌletoj ebꞌ sattaj ebꞌ yaawil conobꞌ yu ebꞌ. Catuꞌ jix yalon ebꞌ yin ipal jaxca tiꞌ:
—Jaꞌ Pablo yetoj Silas tiꞌ, chi ecꞌ ebꞌ yakꞌ somcha scꞌul masanil ánima yul yibꞌankꞌinal tiꞌ. Jaꞌ tinaniꞌ, jix julecꞌ ebꞌ cu nan cu xol tiꞌ. 7Jaꞌ naj Jasón tiꞌ jix chaꞌon ebꞌ bꞌey sna. Jaꞌ masanil ebꞌ tiꞌ cꞌam chi sjije sley naj yaaw bꞌey Roma. Ilaꞌla, tol chi yal ebꞌ tol ey junojxa sreyal ebꞌ chi yij Jesús, ẍi ebꞌ tet ebꞌ yaaw tuꞌ.
8Jaꞌ yet jix yabꞌen ebꞌ conobꞌ yetoj ebꞌ yaaw wan tuꞌ, catuꞌ jix a uchna ebꞌ yu stit sjowal. 9Jal pax Jasón yetoj ebꞌ jix mitxꞌle yetoj naj tuꞌ xin, tumin chꞌen jix ya can eytoj ebꞌ preso sqꞌuexeloj, catuꞌ jix jajle el ebꞌ.
Jaꞌ Yet Eyecꞌ Pablo Yetoj Silas Bꞌey Berea
10Jaꞌ yet jix kꞌejbꞌi eyoj, catuꞌ jix chejletoj Pablo yetoj Silas yu ebꞌ creyente bꞌey conobꞌ Berea. Jix apni ebꞌ tituꞌ, catuꞌ jix oc ebꞌ yul snail sculto ebꞌ yet Israelal. 11Yel watxꞌ snaꞌbꞌal ebꞌ Israel a Berea tuꞌ yintaj pax ebꞌ a Tesalónica. Jix cam yabꞌen skꞌaneal Dios ebꞌ, catuꞌ junjun cꞌal cꞌu chi seyon yil ebꞌ An Juun bꞌey Tzꞌibꞌebꞌilcan skꞌane Dios, yu yilon ebꞌ ta yel chi yal Pablo yetoj Silas. 12Ecꞌal ebꞌ jix yaoc scꞌul yin Cristo.* Ecꞌal pax ebꞌ Griego jix yaoc yin scꞌul. Ey ebꞌ ix cꞌal ebꞌ winaj miman yeloc apnoj yul sat conobꞌ jix yaoc ebꞌ yin scꞌul. 13Jaxa yet jix yabꞌen ebꞌ Israel a Tesalónica tol lalan yalon el skꞌane Dios naj Pablo bꞌey Berea tuꞌ, catuꞌ jix too ebꞌ tituꞌ, jix apni ebꞌ, catuꞌ jix yuchon a somna conobꞌ ebꞌ. 14Eyman jix chejletoj Pablo yu ebꞌ creyente stiꞌ jaꞌ mar. Jal Silas yetoj Timoteo xin, jix cancan ebꞌ bꞌey Berea tuꞌ. 15Ey ebꞌ creyente jix too yetoj Pablo masantaꞌ jix apni bꞌey conobꞌ Atenas.#17:15 Jaꞌ bꞌey conobꞌ Atenas chi bꞌet ebꞌ a Grecia cuywoj, catuꞌ chi oc ebꞌ mimej jelanil. Yet jix apni ebꞌ tituꞌ, catuꞌ jix yalon Pablo tet ebꞌ jaxca tiꞌ:
—Che yal tet Silas yetoj Timoteo, tol chi tit ebꞌ yin eymanil, ẍi naj tet ebꞌ. Catuꞌ jix meltzo ebꞌ jix too yetoj Pablo tuꞌ.
Jaꞌ Yet Eyecꞌ Pablo Bꞌey Conobꞌ Atenas
16Yajbꞌan chi yechbꞌane yapni Silas yetoj Timoteo naj Pablo tuꞌ bꞌey conobꞌ Atenas, catuꞌ jix yiloni, tol ecꞌal wan tzetyetal chi yaloc ebꞌ sdiosaloj. Caw jix cusa scꞌul yet jix yilon jaxca tuꞌ. 17Catuꞌ jix octoj yul snail sculto ebꞌ yet Israelal. Jix cꞌoli yalon el tet ebꞌ Israel tuꞌ, cꞌal yetoj tet ebꞌ chi yiꞌey sbꞌa tet Dios yetoj. Catuꞌ junjun cꞌal cꞌu, jix bꞌet yalon el snan xol ánima bꞌey txombꞌal. 18Ey wan winaj caw chi scuy sjelanil ebꞌ, ebꞌ chi yij Epicúreo yetoj wan ebꞌ chi yij Estoico,#17:18 Jaꞌ yul stiempoal naj Pablo ey caabꞌ tujan cuybꞌanile bꞌey Atenas. Txꞌoj txꞌoj cꞌal yoc snaꞌbꞌal. Ey jun tujan chi yij Estoico, yetoj junxa tujan chi yij Epicúreos. catuꞌ jix cꞌoli skꞌanabꞌ ebꞌ yetoj Pablo. Ey ebꞌ jix yal yin naj Pablo jaxca tiꞌ:
—Jaꞌ jun winaj txꞌojxa wal skꞌanabꞌ tiꞌ, ¿tzet la oj yal ey jon? ẍi ebꞌ.
Jal wanxa ebꞌ xin, jix yal ebꞌ jaxca tiꞌ:
—Skꞌaneal wanxa txꞌoj diosal chi yalaꞌ, ẍi ebꞌ.
Queytuꞌ jix yute yalon ebꞌ jaxca tuꞌ yutol skꞌaneal Jesucristo jix yalel Pablo snan xol ebꞌ. Jix yal pax oj tol chi pitzcꞌu a ebꞌ camnaj. 19Jix iꞌletoj Pablo yu ebꞌ jelan tuꞌ bꞌey jun lugar chi yij Areópago, bꞌey chi yakꞌ syambꞌabꞌail ebꞌ.#17:19 Areópago sbꞌi jun lugar bꞌey chi syambꞌa sbꞌa ebꞌ yaaw bꞌey Atenas. Jaꞌ yet jix apni ebꞌ tituꞌ, catuꞌ jix skꞌanlen el ebꞌ tet Pablo jaxca tiꞌ:
—Jaꞌ jun acꞌ cuybꞌanile cha walel tiꞌ, ¿chim skeꞌ kotajnen el masanil? 20Yutol cꞌamto bꞌey chi kabꞌ wan tiꞌ. Yuxan chi koche chi kotajne eloj, tzet chi yal yeloc apnoj, ẍi ebꞌ.
21Queytuꞌ jix yute yalon ebꞌ jaxca tuꞌ, yutol masanil ánima bꞌey Atenas tuꞌ, cꞌal ebꞌ txꞌoj conobꞌal eyecꞌ tituꞌ, txꞌoj yel snaꞌbꞌal ebꞌ. Ta tol ey junoj acꞌ cuybꞌanile chi bꞌet al-le yabꞌ ebꞌ, caw chi ẍaꞌ scꞌul ebꞌ yabꞌeni, cꞌal yalon eloj. Asan jun tuꞌ bꞌey chi yaoc snaꞌbꞌal ebꞌ.
22Jix a linan Pablo snan xol ebꞌ bꞌey Areópago tuꞌ catuꞌ jix yalon jaxca tiꞌ:
—Jex winaj a Atenas tiꞌ, chi wilaꞌ, tol caw eyoc je naꞌbꞌal yin tzet che yaloc je diosaloj. 23Jaꞌ yet jix jin ecꞌ yul je conobꞌ tiꞌ, catuꞌ jix wilon bꞌey che yiꞌey je bꞌa tet tzet che yaloc je diosaloj tuꞌ. Jix wilon pax jun smeẍail xaambꞌal, bꞌey tzꞌibꞌebꞌil oc wan kꞌane tiꞌ je yu: “Jaꞌ titiꞌ chi kiꞌey cu bꞌa tet jun Dios man otajbꞌiloj,”#17:23 Jaꞌ ebꞌ ánima man creyenteoj yet peyxa, ey sobrail smeẍail xaambꞌal chi swaꞌne a ebꞌ yutol tala cꞌuxan ey wanoj dios man yotaj oj ebꞌ yalaꞌ, yuxan yet wan dios tuꞌ ye wan meẍa tuꞌ, yu cꞌam chi tit sjowal ebꞌ yin ebꞌ. ẍi oc yin. Jaꞌ jun che yiꞌey je bꞌa tet tuꞌ, jun man je yotaj oj tuꞌ. Jaꞌton jun Dios oj wal skꞌaneal ey jex.
24Jaꞌ jun Dios tuꞌ, jix waꞌnen yul yibꞌankꞌinal tiꞌ, cꞌal masanil tzettaj yetal. Yaaw yeoc bꞌey satcan, yaaw pax yeoc sat txꞌotxꞌ tiꞌ. Jaꞌ jun Dios tuꞌ cꞌam chi eey yul-laj na chi swaꞌne ánima. 25Man sowalil oj ey tzet chi akꞌle tet yu ánima. Yutol jaꞌ Dios tuꞌ chi akꞌon cu cawil cu masanil. Jaꞌ chi akꞌon cu kaꞌeꞌ, cꞌal masanil tzettaj yetal sowalil chi oc ku.
26Jaꞌ jix waꞌnen naj bꞌabꞌel winaj, naj bꞌey jix tit yicꞌaal junjun conobꞌ bꞌey yul yibꞌankꞌinal tiꞌ. Yuxan ey ánima bꞌey masanil yul yibꞌankꞌinal. Jaꞌ chi akꞌon slugar junjun conobꞌ bꞌey chi eeyi. 27Chi yute Dios jaxca tuꞌ, yet watxꞌ chi seyle ecꞌ Dios yu ebꞌ ánima, tala cꞌuxan chi yotajne el Dios ebꞌ. Jal tinaniꞌ chi wal ey jex, tol man naat oj ey Dios. Eyecꞌ Dios cu cawilal junjun jon. 28Asan yu Dios tuꞌ yuxan iquis jon. Ey cu cawil yu Dios. Yu Dios, yuxan chi cu ecꞌ yul yibꞌankꞌinal tiꞌ. Ey wan ebꞌ je yet conobꞌ caw jelan skꞌanabꞌi, jix yal ebꞌ jaxca tiꞌ: “Yuninal jon Dios cu masanil,” ẍi ebꞌ. 29Yel ton chi yal ebꞌ, yuninal jon ton Dios. Yuxan, manxa smoo oj cu naꞌon tol Dios wan echele waꞌnebꞌil yetoj chꞌen oro tuꞌ, ma chꞌen plata tuꞌ, ma junojxa tzet chꞌenal waꞌnebꞌil yu ánima yu sjelanil. 30Jaꞌ yet peyxa, man yotaj oj Dios ebꞌ ánima. Yuxan, miman yutenaj scꞌul yin ebꞌ. Jal tinaniꞌ, sowalil chi snaꞌ sbꞌa ánima yul yibꞌankꞌinal tiꞌ. 31Yutol yalnaj canoj, tol ey jun cꞌual oj snaꞌoc yin masanil ebꞌ ánima yin sjichanil. Ey jun winaj sicꞌbꞌil el yu Dios, jaꞌ oj naꞌon oc yin ebꞌ. Jix xꞌoxel Dios tet masanil ánima, tol caw yel jun tiꞌ, yet jix spitzcꞌunen a jun mactxequel tuꞌ xol ebꞌ camnaj, ẍi Pablo tet ebꞌ.
32Jaꞌ yet jix yabꞌen ebꞌ yaloni tol chi pitzcꞌu a ebꞌ camnaj, ey ebꞌ jix bꞌuchwa yin naj. Ey pax ebꞌ xin, jix yal ebꞌ tet jaxca tiꞌ:
—Oj kabꞌ wan tiꞌ ey jaach yet junelojxa, ẍi ebꞌ tet Pablo.
33Yet jix yabꞌen Pablo tzet jix yal ebꞌ tuꞌ, catuꞌ jix el xol ebꞌ. 34Ey pax jaywan ebꞌ jix yaoc scꞌul yin Cristo. Jix sjunbꞌane ey sbꞌa ebꞌ yetoj Pablo tuꞌ. Ey jun naj chi yij Dionisio, yet yaawil sbꞌa yetoj ebꞌ chi syambꞌa sbꞌa bꞌey Areópago. Ey jun ix ix chi yij Dámaris, cꞌal wanxa ebꞌ jix yaoc scꞌul yin.
© 2016, Wycliffe Bible Translators, Inc. All rights reserved.