2a Pedro 1
1
Yichbꞌanil Scarta Naj Pedro
1Jaꞌ tinaniꞌ xin, jain ton Simón Pedro jin an. Yakꞌomal jin servil Naj Jesucristo an. Ẍejabꞌ Naj jin pax oj. Tol chin tzꞌibꞌetoj jun jin carta tiꞌ ey jex an, jex che yaoc je cꞌul yin Dios ketoj jon. Jaꞌ jun jix je chaꞌ tuꞌ, jaꞌton bꞌey che yaoc je cꞌul, laan swatxꞌil jaxca ket tiꞌ. Yu jun tuꞌ xin, yuxan watxꞌ ket, yutol jaꞌ cu Diosal, jaꞌton Naj cu Colomal Naj Jesucristo caw watxꞌ ton Naj. 2Yel ojabꞌ xacꞌal chi xꞌox swatxꞌcꞌulal Dios ey jex, catuꞌ chi yakꞌon pax watxꞌcꞌulal snan je xol yet chi a can je yotajnen el Dios tuꞌ yetoj Naj Kaawil Jesús.
Sbꞌeybꞌal Ebꞌ Yet Xa Dios
3Ey wan tzetyetal caw sowalil chi oc ku, yet watxꞌ chi cu chaꞌ cu kꞌinal tol ey cꞌal yin tobꞌalkꞌinal, yet chi kaon pax oc cu naꞌbꞌal yin Dios. Jix yakꞌ masanil wan tzetyetal tuꞌ ey jon yu yipal, yutol jix yakꞌ kotajne el Jesucristo. Jaꞌ jix cu awten oc yetoj, yutol miman yeloc apnoj Naj, catuꞌ miman yipal Naj. 4Yu yipal Naj tuꞌ, yuxan tol jix yakꞌ can stiꞌ Naj ey jon. Jaꞌ wan tzet albꞌilcan tuꞌ, caw miman yeloc apnoj, catuꞌ miman swatxꞌil. Yu wan tuꞌ, yuxan chi skeꞌ cu colcha el yul skꞌabꞌ wan tzet cꞌam swatxꞌil chi yoche oc ebꞌ ánima bꞌey sat txꞌotxꞌ tiꞌ, yutol jaꞌ snaꞌbꞌal Dios eyoc kin yu wan tzet albꞌilcan tuꞌ. 5Yuxan, man kꞌojbꞌil oj tol asanne chi kaoc cu cꞌul yin. Sowalil chi kakꞌ pax kip cu waꞌnen oc cu bꞌeybꞌal. Catuꞌ chi cam cu cuyon sjelanil Dios. 6Cu mitxꞌwej oc tucan cu bꞌa yin tzet man watxꞌoj. Catuꞌ caw tecꞌan chi kute cu bꞌa. Catuꞌ asan ojabꞌ yin Dios chi kaoc cu naꞌbꞌal. 7Watxꞌ ojabꞌ pax cꞌal chi kute cu naꞌbꞌal yin ebꞌ kuẍtaj, cꞌal yin ebꞌ kanabꞌ, catuꞌ chi cu camcꞌulnen pax cu bꞌa yetoj ebꞌ. 8Ta jaꞌ wan tiꞌ yelcꞌulal tol chi kiꞌa can junjun cꞌu, caw ey kopiso yu Dios, chi yal tuꞌ. Man naꞌbꞌa oj cꞌal jix kotajne el Naj Kaawil Jesucristo, chi yal tuꞌ. 9Jal mac cꞌam chi unen wan tuꞌ, jaxca tol majan tocꞌal sat ebꞌ, ma xin, jaxca tol cꞌam chi skeꞌ yilontoj junoj tzetyetal naat ebꞌ. Yutol cꞌamxa chi snaꞌtej ebꞌ tol iꞌbꞌil xa el spenail ebꞌ yet yalantoj. 10Yuxan jex wuẍtaj, jex wanabꞌ, caw che yakꞌ je yip je yotajnen can el sicꞌlebꞌil, tol yel awtebꞌil jex xa oc yetoj, sicꞌbꞌil jex xa el yu. Ta tol jaxca tuꞌ chi kute cu bꞌa, cꞌam bꞌakꞌin oj etex el cu naꞌbꞌal. 11Ta jaxca tuꞌ xin, oj cu chaꞌle oc yalan yopiso Naj Kaawil Jesucristo, jaꞌton Naj cu Colomal. Manxa jantajoj swatxꞌil yet oj cu ẍaꞌon Naj. 12Yuxan, caxcꞌal je yotaj xa wan tiꞌ, caxcꞌal tecꞌan xa je yeoc yin wan cuybꞌanile caw yel bꞌey eyoc je naꞌbꞌal, oj jin jej je naꞌ. 13Chin naꞌ an, tol watxꞌ chin jej je naꞌ yin wan tiꞌ yajbꞌan iquis jin to. 14Yutol jaꞌ Naj Kaawil Jesucristo jix akꞌon wotajne el an, tol manxa mimanoj tiempo ey jin ecꞌoj. 15Yu jun tuꞌ, yuxan chi wakꞌ wip an, yet watxꞌ oj skeꞌ je naꞌon cꞌaltej wan cuybꞌanile tiꞌ tobꞌalkꞌinal, yet camnaj jin xa.
Jaꞌ Ebꞌ Jix Ilon Stzejejial Cristo
16Albꞌilxa can ku ey jex, tol ey yip Naj Kaawil Jesucristo, catuꞌ tol sowalil oj jul Naj yet scaelal. Jaꞌ wan tuꞌ, man comon kꞌane oj. Man yul oj ket jix cu naꞌon aoj. Yutol yetoj cu sat jix kilon Naj Kaawil tuꞌ tol miman swatxꞌil. 17Jaꞌcaw ilbꞌil ku, yet jix iꞌle a can yu cu Mam Dios. Jix kabꞌ yalon Dios, tol miman yeloc apnoj Naj Kaawil tuꞌ. Ẍi eytej Dios xol jun miman stzejejial jaxca tiꞌ: “Jaꞌton jun jin Cꞌaal tiꞌ, camcꞌulnebꞌil wu an. Caw chin tzala yetoj,” ẍi eytej. 18Jaꞌ jayebꞌ kꞌane albꞌil satcan tuꞌ, caw jix kabꞌ yetoj cu txiquin, yutol ey jon ecꞌ yetoj Naj Kaawil tuꞌ bꞌey jun wonan tuꞌ.#Mateo 17:1-5; Marcos 9:2-7; Lucas 9:28-35. Jaꞌ bꞌey jun wonan tuꞌ jix jul eytej Dios. 19Yetoj pax oj, eyojto sjul Naj Kaawil tuꞌ catuꞌ jix tzꞌibꞌelecan skꞌaneal yu ebꞌ ẍejabꞌ Dios. Eyecꞌ An Juun bꞌey Tzꞌibꞌebꞌilcan tuꞌ tinaniꞌ. Jaꞌ tzet chi yal An Juun tuꞌ, caw yel. Caw watxꞌ chi kute cu bꞌa, ta jacꞌalaꞌ kaon oc cu naꞌbꞌal yin tzet tzꞌibꞌebꞌilcan yu ebꞌ tuꞌ. Yutol jaꞌ An Juun tuꞌ, laan An jaxca junoj cu tzejtebꞌal chi cu tzejecꞌ xol kꞌejkꞌinal. Chi cu stzejtane masantaꞌcꞌal chi sajbꞌi, yet chi aol cꞌu. Jaxca cꞌu tuꞌ, queytuꞌ yet oj jul Cristo, catuꞌ oj yakꞌon mimanbꞌoj sajkꞌinal yin cu pixan. 20Jaꞌ ebꞌ ẍejabꞌ Dios yet peyxa, yin eyojto cꞌal jix stzꞌibꞌen cꞌal can yul An Juun ebꞌ wan tzet tꞌinan sjuli. Yuxan sowalil chi kotajne eloj, tol cꞌam junoj mac chi skeꞌ comon cꞌal chi yal xꞌojli tzet chi yal yeloc apnoj wan tzet tzꞌibꞌebꞌilcan tuꞌ. 21Yutol jaꞌ ebꞌ tuꞌ, cꞌam junoj tzet yul cꞌal yet ebꞌ jix snaꞌa ebꞌ yin snaꞌbꞌal, catuꞌ jix stzꞌibꞌen can ey ebꞌ. Tol jaꞌcaw Dios jix sicꞌon el ebꞌ. Jaꞌ Naj Yespíritu Dios chi akꞌon naꞌcha el yu ebꞌ tzet utbꞌil chi yute yalon can el skꞌaneal ebꞌ tuꞌ, catuꞌ jix stzꞌibꞌen can ey ebꞌ.
Currently Selected:
2a Pedro 1: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.