2a Tesalonicenses 3
3
Yochwan Naj Pablo Chi Akꞌle Bꞌina Yin Txa Yu Ebꞌ Creyente
1Jaꞌ tinaniꞌ jex wuẍtaj, jex wanabꞌ, caw chex txali ku, yet watxꞌ eyman chi too skꞌane Naj Kaawil xol masanil ánima. Catuꞌ chi ẍaꞌon ebꞌ yin masanil scꞌul, jaxca jix je yute je chaꞌon, jaex tiꞌ. 2Chex txali pax oj, yet watxꞌ cꞌam ojabꞌ tzet chi cu utele yu ebꞌ pena snaꞌbꞌal, ebꞌ pena chi yute snaꞌbꞌal kin. Yutol man masaniloj ánima chi yaoc yin scꞌul. 3Chi cꞌal yun tzet chi yal Naj Kaawil. Jaꞌ Naj chi akꞌon je tecꞌanil. Chex scolon pax el yin spenail. 4Chi kaoc Naj Kaawil yipoj cu cꞌul tol lalan je jijen wan chejbꞌanil jix kal ey jex, catuꞌ oj je jijen cꞌal tobꞌalkꞌinal. 5Chi koche chi yakꞌ Naj Kaawil naꞌcha el scamcꞌulal Dios je yu. Chi koche chi oc Cristo je yetoj, yet watxꞌ caw tecꞌan che yute je bꞌa jaxca Cristo tuꞌ.
Sowalil Chi Cu Mulnai
6Jex wuẍtaj, jex wanabꞌ, yutol jix yal Naj Kaawil Jesucristo, yuxan chi kaltoj wanxa chejbꞌanil tiꞌ ey jex. Ta ey junoj creyente je xol tuꞌ, cꞌam chi mulnai, ta cꞌam chi sbꞌeybꞌalne wan cuybꞌanile jix ecꞌ kal can ey jex, manche je junbꞌane je bꞌa yetoj. 7Je yotaj xa, tol smoo che bꞌeybꞌalne cu bꞌeybꞌal, tol man isa oj jix kute cu bꞌa je xol. 8Je yotaj, cꞌam bꞌey tucꞌal jix cu kꞌan low cu bꞌa ey jex. Jaꞌ jun tiꞌ ket, jix cu mulna cꞌualil cꞌal akꞌbꞌalil. Caw jix kakꞌ kip cu mulnai, yutol ma yal cu cꞌul jix kakꞌ cu bꞌa je cargone yu cu gasto. 9Caxcꞌal ey kalon ket cu kꞌanon cu gasto ey jex, caw jix cu mulna cꞌal yu cu gasto tuꞌ. Queyton tuꞌ jix kute cu txꞌoxon can jun watxꞌ bꞌeybꞌale tuꞌ ey jex, yet watxꞌ che bꞌeybꞌalne pax oj. 10Yutol jaꞌ yet ey jon ecꞌ je xol jix kal jun chejbꞌanile tiꞌ ey jex, jun chi yal jaxca tiꞌ: “Ta ey mac cꞌam chi yal scꞌul chi mulnai, cꞌam chi low pax oj.” 11Chi kaltoj wan tiꞌ ey jex, yutol chi kabꞌ skꞌumal, ey jex abꞌ cꞌam chi yal je cꞌul chex mulnai. Tucꞌal abꞌ comon chex too xol tzet man je yetoj. 12Jaꞌ jaex mac jex queytuꞌ che yute je bꞌa, Jatuꞌ chi kaltoj wan tiꞌ. Yutol jix yal Naj Kaawil Jesucristo yuxan chi cam kalontoj ey jex, caw chex mulna yin tzalacꞌulal, yet watxꞌ che yiꞌ je tzettaj yetal yul je yet. 13Jex wuẍtaj, jex wanabꞌ, manche jex isabꞌi a je yunen swatxꞌil. 14Ta ey mac cꞌam chi jijen tzet chi kaltoj yul jun cu carta tiꞌ, chi cam je yilon jun mactxequel tuꞌ yet watxꞌ cꞌam chex ecꞌ yetoj yu yel cꞌal oj qꞌuixwoj aoj. 15Cꞌam pax chi skeꞌ je naꞌoni tol je cajat. Alwej yabꞌ ebꞌ, yutol je yuẍtaj ebꞌ, je yanabꞌ ebꞌ.
Chi Yoche Naj Pablo Chi Xꞌox Swatxꞌcꞌulal Naj Kaawil Tet Ebꞌ
16Jaꞌ Naj Kaawil, jaꞌ jun akꞌom watxꞌcꞌulal kin, chi woche chi yakꞌ watxꞌcꞌulal snan je xol tobꞌalkꞌinal. Chi woche chi oc Naj je yetoj je masanil tituꞌ. 17Jain caw Pablo jin tiꞌ, chin tzꞌibꞌetoj jin bꞌi tiꞌ, yu xeclo eloj tol yel wet jun carta tiꞌ an. Jaxca cꞌal tiꞌ chi wute jin tzꞌibꞌentoj jin bꞌi yin junjun jin carta. 18Chi woche chi xꞌox swatxꞌcꞌulal Naj Kaawil Jesucristo ey jex je masanil tituꞌ.
© 2016, Wycliffe Bible Translators, Inc. All rights reserved.