2a Samuel 2
2
Jix Oc Naj David Sreyaloj Judá
1Jix lawi tuꞌ xin, catuꞌ jix skꞌanlen naj David tet Jehová, jix yalon jaxca tiꞌ:
—¿Tumi chi skeꞌ jin too yul junoj conobꞌ ey yul yet Judá tuꞌ? ẍi naj. Jix takꞌwi Jehová tet naj jaxca tiꞌ:
—Chi skeꞌ chach too, ẍi Dios tet naj.
Jix skꞌanlen pax David junelxa:
—¿Tzet conobꞌal bꞌey chi skeꞌ chin too an xin? ẍi naj.
—Jaꞌ bꞌey conobꞌ Hebrón chach too, ẍi Jehová.
2Yuxan jaꞌ tituꞌ jix too naj David yetoj cawan yistil, jaꞌton ix Ahinóam a Jezreel, yetoj ix Abigail, yistil can naj camom Nabal, a conobꞌ Carmel. 3Catuꞌ jix yiꞌon cꞌal pax toj ebꞌ soldado eyecꞌ yetoj, jix too ebꞌ yetoj yistil cꞌal yetoj yuninal junjun ebꞌ. Jix caey ecꞌ ebꞌ bꞌey yul wan conobꞌlaj yul yet Hebrón. 4Jix lawi tuꞌ, jix ecꞌ cꞌaltoj jayebꞌ cꞌual, catuꞌ jix apni oc ebꞌ icham winaj yeoc yul conobꞌ xol ebꞌ yicꞌaal Judá, catuꞌ jix ale can oc naj David yin sreyaloj conobꞌ yu ebꞌ.
Jix yabꞌen oc naj David tol jaꞌ ebꞌ a Jabés yul yet Galaad jix mujon can naj camom Saúl, 5yuxan jix yatoj wan ebꞌ yakꞌomal servil yu yalon tet ebꞌ jaxca tiꞌ: Yakꞌ ojabꞌ syaaxilal Jehová ey jex, yu tzetyetal tol watxꞌ jix je yun yin naj Saúl je reyal, yutol jix je mujcan eytoj smimanil naj. 6Yu cꞌal jun tuꞌ xin, ey ojabꞌ cꞌal scamcꞌulal Jehová je yin, naꞌan ojabꞌ jex cꞌal yu naj, jacꞌalaꞌ pax jin jain tiꞌ, ey cꞌal jin camcꞌulal je yin, catuꞌ oj jin pajtze yu tzetyetal watxꞌ che yunne. 7Yu jun tuꞌ xin, ey ojabꞌ je tzalacꞌulal, cꞌam ojabꞌ cꞌal chex xiwi, caxcꞌal jix cam naj Saúl je reyal, jaꞌ ebꞌ yicꞌaal Judá jix jin yaoc ebꞌ sreyaloj, ẍi naj David tet ebꞌ.
Ocnaj Jowal Xol Ebꞌ Israel Yetoj Ebꞌ A Judá
8Jaꞌ naj Abner, scꞌaal naj chi yij Ner, yaaw yeoc naj xol ebꞌ soldado naj Saúl tuꞌ. Jaꞌ naj jix iꞌontoj naj Is-bóset, scꞌaal Saúl bꞌey conobꞌ Mahanaim. 9Jaꞌ tituꞌ jix yaoc yopiso yin sreyaloj conobꞌ Galaad, Aser, Jezreel, Efraín, cꞌal Benjamín, jaꞌton bꞌey yul masanil conobꞌ Israel. 10Jaꞌ yet jix ẍaꞌon el yich yakꞌon yaawilal naj Is-bóset bꞌey Israel, ey cawinaj abꞌil skꞌinal naj, caabꞌ abꞌil jix yakꞌ reyal naj. Jaꞌ ebꞌ yicꞌaal Judá tuꞌ jix aon oc naj David yin reyal. 11Queytuꞌ jix yun yoc naj David yin reyal bꞌey Judá yin jujebꞌ abꞌil yetoj wajebꞌ xꞌaaw. Jaꞌ yet jun tiempoal tuꞌ, jaꞌ bꞌey conobꞌ Hebrón jix yakꞌ yaawilal naj.
12Jal naj Abner xin, jix el bꞌey Mahanaim, jix toocan naj bꞌey Gabaón yetoj ebꞌ soldado naj Is-bóset. 13Jal naj Joab yuneꞌ ix chi yij Seruiá, jix eltoj yetoj ebꞌ soldado David bꞌey Hebrón, jix ẍaꞌlen sbꞌa ebꞌ yetoj naj Abner bꞌey chi yambꞌa sbꞌa jaꞌ jaꞌ bꞌey Gabaón. Jaꞌ caabꞌ tujan ebꞌ soldado tuꞌ jix eyecꞌ ebꞌ bꞌey yaman oc jaꞌ jaꞌ tuꞌ, jun tujan bꞌey jun pacꞌ, ey junxa tujan bꞌey jun pacꞌxa ecꞌtoj tuꞌ. 14Catuꞌ jix yalon naj Abner tet naj Joab jaxca tiꞌ:
—El ojabꞌtej jaywanoj ebꞌ naj achꞌe yakꞌle jowal cu sattaj tiꞌ, ẍi naj.
—Ye xin, ẍi naj Joab.
15Jaxca tuꞌ jix yun xin, laan cꞌal sbꞌisil yet junjun ebꞌ jix eltej, lacawan ebꞌ yet Benjamín eyoc yetoj Is-bóset scꞌaal Saúl, lacawan cꞌal pax ebꞌ yet David jix eltej.
16Junjun cꞌal jix smitxꞌtej xil sjolom scajat ebꞌ, catuꞌ jix sjejontoj yespada ebꞌ yul smootx junjun, yuxan junne cꞌal jix yun scam masanil ebꞌ. Yuxan jaꞌ sbꞌi jun txꞌotxꞌ yul yet Gabaón tuꞌ, jix oc can sbꞌioj, txꞌotxꞌ bꞌey jix oc tejlebꞌail. 17Jix lawi tuꞌ, caw wal miman jix yun yoc jun jowal yu masanil ebꞌ. Jaꞌ naj Abner yetoj ebꞌ soldado Israel jix eyqꞌuey ebꞌ yu ebꞌ soldado naj David tuꞌ. 18Jaꞌ tituꞌ eyoc ebꞌ oxwan yuneꞌ ix Seruiá, jaꞌton naj Joab, Abisai cꞌal naj Asael. Jaꞌ naj Asael tuꞌ caw jelan sbꞌey naj jaxca junoj noꞌ scꞌultajil che. 19Jix too tzajan yintaj naj Abner tuꞌ, ma xacꞌal elcan yintaj naj. 20Jaꞌ yet jix meltzotoj taꞌnan naj Abner yintaj, jix a yaw naj, jix yalon jaxca tiꞌ:
—Ma tol jaach Asael jaach tiꞌ, ẍi naj.
—Jain toni, ẍi naj.
21Jix yalon naj Abner tet naj jaxca tiꞌ:
—Manche xa jin ja wujte an, watxꞌ tol jaꞌ junoj ebꞌ naj achꞌe tiꞌ cha mitxꞌa, catuꞌ cha wiꞌon can ecꞌ masanil tzetyetal iꞌbꞌil oc yu ebꞌ, ẍi tet naj.
Jaꞌ naj Asael tuꞌ, ma cꞌal yal scꞌul jix oc tucan yujteni. 22Jix yalon pax Abner tet naj Asael junelxa:
—Manche xa jin ja wujte, ¿ma cha woche chin ja wakꞌ pural jaach jin makꞌon camoj? Ta jaxca tuꞌ ¿tzet to wal chi yun jin txꞌoxon jin bꞌa tet naj ja wuẍtaj Joab? ẍi naj.
23Jaꞌ naj Asael tuꞌ, ma yal scꞌul jix oc tucan yujten naj Abner tuꞌ, catuꞌ jix ẍucon eltoj chꞌen slanza naj Abner yintaj, palan cꞌal slow yin scꞌul naj Asael tuꞌ, jix kꞌaxbꞌo ecꞌtoj chꞌen bꞌey yichin naj. Jaꞌ tituꞌ jix cam naj Asael tuꞌ. Masanil ebꞌ ánima jix ecꞌtoj bꞌey jix cam naj Asael tuꞌ, jix oc linan ebꞌ yiloni. 24Jaꞌ naj Joab yetoj naj Abisai, jix too cꞌal ebꞌ yintaj naj Abner tuꞌ. Jaxa wal stoo cꞌu jix apni oc ebꞌ bꞌey sjolom jun wonan chi yij Amá, jatuꞌ ey sattaj ecꞌtoj Guíah, jaꞌton bꞌey chi toocan sbꞌeal txꞌotxꞌ cusiltaj txꞌotxꞌ bꞌey Gabaón. 25Jaꞌ tituꞌ jix syambꞌa oc sbꞌa ebꞌ yicꞌaal Benjamín yetoj naj Abner, junxane jix yute sbꞌa masanil ebꞌ bꞌey jun tzalan. 26Jaxa jix yun xin, jix awi naj Abner tet naj Joab jaxca tiꞌ:
—¿Tumi man oj jaach oc tucan ja makꞌon cam ebꞌ ánima tiꞌ? ¿Tumi cꞌam cha naꞌ niꞌoj tol asan spenail chi yiꞌtej jun tiꞌ kibꞌan? ¿Janicꞌ wal oj ja wal tet ebꞌ naj ja soldado tol chi oc tucan ebꞌ yujten yet conobꞌ tiꞌ? ẍi naj.
27Jix yalon naj Joab jaxca tiꞌ:
—Sattaj Dios chi walon ey jaach, kꞌinaloj ma ja walaꞌ tol chi kakꞌ jowal, ma mi cu oc tzajan je yintaj yet tax cꞌal jix kꞌinibꞌi aoj, ẍi naj.
28Jix lawi tuꞌ xin, jix yalon naj Joab tol chi xuꞌle noꞌ cacho, queytuꞌ jix yun yoc tucan yakꞌon jowal masanil ebꞌ soldado tzajan oc yintaj ebꞌ Israel tuꞌ. 29Jal naj Abner yetoj ebꞌ soldado, pilan akꞌbꞌal jix bꞌey ebꞌ bꞌey yacꞌalil txꞌotxꞌ Arabá, jix kꞌaxbꞌo ecꞌtoj ebꞌ yul jaꞌ Jordán, catuꞌ jix ecꞌ cꞌaltoj ebꞌ bꞌey Bitrón masantaꞌcꞌal jix apni oc ebꞌ bꞌey Mahanaim.
30Jal naj Joab xin, naj jix oc tucan yujten Abner, jix syambꞌa oc ebꞌ soldado tuꞌ, jaꞌ yet jix yawten slistail masanil ebꞌ, jix yilontej tol ey 19 ebꞌ soldado yet David jix cami, jix cam cꞌal pax can naj Asael. 31Jaxa pax ebꞌ soldado naj Abner xin, jix cam jun 360 ebꞌ yu ebꞌ soldado naj David.
32Jix lawi tuꞌ, jix yiꞌontoj smimanil Asael ebꞌ bꞌey conobꞌ Belén. Jaꞌ tituꞌ jix mujle naj, jaꞌton tituꞌ mujan smam. Jaꞌ naj Joab yetoj cꞌal masanil ebꞌ soldado, masanil akꞌbꞌal jix bꞌey ebꞌ, eyxa ecꞌ ebꞌ bꞌey Hebrón yet jix kꞌinibꞌi a yet junxa cꞌu.
© 2016, Wycliffe Bible Translators, Inc. All rights reserved.