1a Pedro 1
1
Scarta Naj Pedro Chi Yatoj Tet Ebꞌ Yet Xa Dios
1Jaꞌ tinaniꞌ xin, jain ton Pedro jin an, ẍejabꞌ jin Naj Jesucristo an. Chin tzꞌibꞌetoj jun jin carta tiꞌ ey jex, jex sajleminaj je ye cantoj bꞌey lugar Ponto, bꞌey Galacia, bꞌey Capadocia, bꞌey Asia, cꞌal bꞌey Bitinia. 2Jaon tiꞌ, sicꞌbꞌil jon xa el yu cu Mam Dios, jaxca tuꞌ jix yute snaꞌon oc kin yet tax peyxa. Jaꞌ Naj Santo Espíritu jix cu aon oc yetoj, yet watxꞌ chi cu jije tzet chi yalaꞌ, catuꞌ chi elcan cu penail kibꞌan yu ẍiqꞌuil Naj Jesucristo. Chi woche tol miman ojabꞌ cꞌal swatxꞌcꞌulal Dios chi yakꞌ je yibꞌan tituꞌ, catuꞌ ey pax watxꞌcꞌulal snan je xol cꞌal yetoj Dios.
Chi Kaoc Jesucristo Yipoj Cu Cꞌul
3Kalwej watxꞌ kꞌane tet Dios, Smam Naj Kaawil Jesucristo, yutol jix okꞌ scꞌul kin. Jix cu yakꞌ aloj Naj yet scaelal yu spitzcꞌubꞌail Jesucristo xol ebꞌ camnaj, yuxan chi kaoc yipoj cu cꞌul, tol jaꞌ oj akꞌon cu kꞌinal. 4Oj yakꞌ Dios jun cu sattajto tol cꞌubꞌabꞌilxa yu bꞌey satcan. Jaꞌ jun cu majul tuꞌ, ey cꞌal ecꞌ yin tobꞌalkꞌinal, cꞌam chi etextoj, man pax oj tactoj yili jaxca junoj xumac teꞌ cꞌuun stactoj yili. 5Yutol chi kaoc cu cꞌul yin Cristo, yuxan teynebꞌil jon cꞌal yu Dios yetoj yipalil masantaꞌcꞌal oj cu chaꞌ cu colbꞌanil. Jaꞌ cu colbꞌanil tuꞌ, watxꞌ xa yei, yet watxꞌ oj txeclonele a yet slawubꞌal tiempoal. 6Yu jun tuꞌ, yuxan caw chi cu tzalai. Caxcꞌal mi sowalil chi kabꞌ syaꞌil mimej porobꞌal janicꞌoj tiempoal, tol jacꞌalaꞌ chi cu tzalai. 7Ilaꞌ chꞌen oro tinaniꞌ, sowalil chi akꞌle porobꞌal chꞌen xol kꞌakꞌ, yet watxꞌ chi txeclo eloj ta watxꞌ chꞌen ma pena chꞌen.#1:7 Jaꞌ chꞌen oro chi oc xol kꞌakꞌ, yet watxꞌ chi tzꞌaꞌtoj masanil wanxa tzetyetal man jaꞌcaw oro, yutol cꞌam chi lawi el chꞌen oro xol kꞌakꞌ, asan wan tzꞌil chi tzꞌaꞌel yin chꞌen. Quey jon pax tuꞌ, sowalil chi cu akꞌle porobꞌal, catuꞌ chi txeclo eloj ta tol yel chi kaoc Dios yin cu cꞌul ma cꞌamaj. Ta chi techa wan porobꞌal tiꞌ ku, oj cu al-le watxꞌil yu Jesucristo yet oj juloj, oj yakꞌon cu watxꞌilal jaxca swatxꞌilal naj tuꞌ. Miman ton oj yun keloc apnoj tituꞌ xin. Jaꞌ yet chi kaoc cu cꞌul yin Dios, yel xacꞌal miman yeloc apnoj jun tuꞌ yintaj chꞌen oro chi skeꞌ sqꞌueytoj. 8Caxcꞌal tol cꞌam bꞌey jix je yil yin Jesucristo tuꞌ, jaex tiꞌ, caw che camcꞌulne pax Naj. Cꞌam ton bꞌey che yil yin tinaniꞌ, che ya pax oc je cꞌul yin Naj. Jaꞌ yu, yuxan chex tzala sicꞌlebꞌil, manxa jantajoj swatxꞌil jun tzalacꞌulal tuꞌ, tol cꞌam chi skeꞌ yal-lei. 9Jaꞌ scolbꞌanil cu pixan chi cu chaꞌ spaj oj, yu chi kaoc Naj yin cu cꞌul. 10Jaꞌ ebꞌ ẍejabꞌ Dios yet peyxa, jix yakꞌ yip ebꞌ seyon yil tzet utbꞌil yeoc cu colbꞌanil tiꞌ. Jix yalon can el ebꞌ yin eyojto cꞌal, tol oj xꞌox swatxꞌcꞌulal Dios ey jon. 11Jaꞌ Yespíritu Cristo eyoc yin ebꞌ, jaꞌ jix akꞌon yotajne el ebꞌ jantaj syaꞌilal tꞌinan yilon Cristo tuꞌ. Jix lawi tuꞌ xin, catuꞌ oj yakꞌ Yaawilal. Jaꞌ ebꞌ ẍejabꞌ Dios tuꞌ, jix yakꞌle ebꞌ snaꞌon eloj mactxequel jun oj jul tuꞌ, catuꞌ tzet tiempoal oj juloj. 12Jix akꞌle cꞌal yotajne el ebꞌ yu Dios tol jaꞌ wan kꞌane jix yal can el ebꞌ tuꞌ, man yetoj ebꞌ yei, tol ket yei. Jaꞌ tinaniꞌ xin, albꞌilxa can el ey jex tzet utbꞌil yeoc cu colbꞌanil tiꞌ. Jaon chi kalel skꞌaneal yet colbꞌanile, jaon jix kal can el ey jex. Jaꞌ Santo Espíritu chejbꞌiltej satcan, jaꞌ jix oc ketoj yet jix kalon can eloj. Ilaꞌ ebꞌ ángel jix yoche pax ebꞌ jix naꞌcha el wan tiꞌ yu ebꞌ, ma cꞌaltaꞌ akꞌle yotajne el ebꞌ.
Chi Yoche Dios Tol Watxꞌ Ojabꞌ Cꞌal Chi Kute Cu Bꞌa
13Yu tuꞌ xin, caw tecꞌan che yute je naꞌbꞌal. Listo ojabꞌ che yute je bꞌa. Caw che yaoc yipoj je cꞌul tzet oj yakꞌ Dios ey jon yu swatxꞌcꞌulal yet oj jul Jesucristo. 14Jaex tiꞌ, yuninal jex xa Dios wetoj an, jijem jex cꞌal tet. Jaꞌ yet yalantoj, ecꞌal tzet jix je yoche ocoj, yutol man to je yotaj oj Dios tuꞌ, jal tinaniꞌ xin, cꞌamxa che bꞌeybꞌalne jaxca tuꞌ. 15Jaꞌ Naj mac jix cu awteni, caw watxꞌ cꞌal Naj, cꞌam niꞌoj spenail Naj. Jaxca ojabꞌ Naj tuꞌ, quey ojabꞌ jex tuꞌ, watxꞌ cꞌal che yute je bꞌa. 16Yutol jix yal Dios yul An Juun Tzꞌibꞌebꞌilcan jaxca tiꞌ: “Watxꞌ cꞌal che yute je bꞌa, yutol watxꞌ jin jain tiꞌ,” ẍi.#Levítico 19:2. 17Jaꞌ Dios oj naꞌon oc yin junjun ánima jatacꞌalaꞌ sbꞌeybꞌal junjun. Man txꞌoj txꞌoj oj yun snaꞌle oc yin junjun yu. Yuxan ta tol chi kaloc Dios cu Mamoj, xiwoj jonwej tet yet ey jon ecꞌ yul yibꞌankꞌinal tiꞌ. 18Jaꞌ wan sbꞌeybꞌal ebꞌ kichmam bꞌeybꞌalnebꞌil ku yet yalantoj, caw naꞌbꞌacꞌal jix ketne cu bꞌa yin. Jal tinaniꞌ xin, colchanaj jon xa el yul skꞌabꞌ wan tuꞌ. Je yotaj xa, tol jaꞌ cu colbꞌanil tiꞌ, cꞌam chi mancha yetoj tzet cꞌuun slawi, jaxca chꞌen oro ma chꞌen plata. 19Jal pax ẍiqꞌuil Cristo xin, jaꞌ jix akꞌon ganar smanchai, yutol caw miman yeloc apnoj. Ilaꞌla, tol jix makꞌle cam Naj yin xaambꞌalil jaxca junoj noꞌ meꞌ cꞌam niꞌoj spenail, cꞌal cꞌam niꞌoj tzet pena yili oc yin. 20Jaꞌ yet cꞌamto chi swaꞌne jun yul yibꞌankꞌinal tiꞌ Dios, yotaj xa, tol jaxca tuꞌ oj elol yibꞌan Cristo. Jaꞌton yet jun slawubꞌal tiempoal tiꞌ jix aletej yet chi txeclo el bꞌey yul yibꞌankꞌinal tiꞌ yu cu watxꞌiloj. 21Yu Cristo tuꞌ, yuxan chi skeꞌ kaon oc Dios yin cu cꞌul tinaniꞌ, yutol jaꞌ jix pitzcꞌunen a xol ebꞌ camnaj. Catuꞌ jix iꞌle a can yu. Yu jun tuꞌ, yuxan caw chi kaoc Dios yin cu cꞌul, catuꞌ chi kaon pax oc yipoj cu cꞌul. 22Jaꞌ tinaniꞌ, /yu scolwal Naj Santo Espíritu, yuxan jix cu jije jun cuybꞌanile jaꞌcaw yel./ Jaxca tuꞌ chi kute cu jichlonen oc cu bꞌeybꞌal, yet watxꞌ yel ey cu camcꞌulal yin ebꞌ kuẍtaj cꞌal yin ebꞌ kanabꞌ. Yuxan, sowalil chi cu camcꞌulne cu bꞌa yin masanil cu cꞌul cꞌal yin masanil kip. 23Yutol alinaj jon xa el yin yet scaelal. Man yin oj cu mam cu txutx cambꞌeal yei jix cu ali yin yet scaelal tuꞌ, tol yu cꞌal skꞌane Dios, yuxan alinaj jon yin scaelal, yutol jaꞌ a kꞌinale yei. Jaꞌ skꞌane tiꞌ, ey cꞌal ecꞌ yin tobꞌalkꞌinal. 24Jaxca chi yal yul An Juun bꞌey chi yal jaxca tiꞌ:
Jaꞌ skꞌinal ebꞌ ánima masanil, laan jaxca cꞌal an ita. Laan yeloc apnoj ebꞌ jaxca xumac an ita.
Yutol jaꞌ an ita tuꞌ, jun txolan chi tajel an, catuꞌ chi eyqꞌuey cꞌotlabꞌoj xumac an.
25Jal pax skꞌane Naj Kaawil xin, ey cꞌal ecꞌ yin tobꞌalkꞌinal, ẍi yul An Juun tuꞌ.#Isaías 40:6-9. Jaꞌ skꞌane tiꞌ, jaꞌton jun watxꞌ skꞌaneal colbꞌanile jix al-le el ey jex.
Currently Selected:
1a Pedro 1: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.