1a Pedro 2
2
1Yuxan, sowalil che bꞌejcan masanil tzet man watxꞌoj. Manche xa je yal skꞌumal junoj ánima. Manxa ojabꞌ caabꞌ sat oj che yute je bꞌa. Manche xa ojabꞌ je sason yin junoj mac ey tzet ey tet. Manche xa jex bꞌuchwa yin junojxa mactxequel. 2-3Ta yel jix je yotajne el sicꞌlebꞌil tol watxꞌ Naj Kaawil kin, jaxca ojabꞌ chi yun yochen yim junoj unin tol to chi ali, jaxca ojabꞌ tuꞌ chi yun je yochen jun scuybꞌanil Dios man calbꞌil oj, yet watxꞌ che tecꞌbꞌa je bꞌa yin je colbꞌanil.
Jaꞌ Cristo Jaxca Junoj Chꞌen Chꞌen Iquis
4Cu jitzwej oc cu bꞌa scꞌatan Naj Kaawil xin, jaxca chi yun slatzꞌle a wanxa chꞌen yibꞌan junoj miman chꞌen chi eycantoj yipomaloj yich na. Jaꞌ jun mac jaxca miman chꞌen tiꞌ, jaꞌton Cristo, Naj iquis, catuꞌ iquis jon pax yetoj. Jaꞌ Naj jix intajnele el yu ebꞌ ánima, tol sicꞌbꞌilxa el yu Dios, catuꞌ miman yeloc apnoj yul sat. 5Yu jun tuꞌ, yuxan awej oc je bꞌa yul skꞌabꞌ Dios, yet chex oc snail oj. Yutol jaxca junoj chꞌen chꞌen iquis quey jon ton tuꞌ. Jaꞌ tinaniꞌ, yul snail Dios tuꞌ chi cu mulna jaxca ebꞌ yakꞌomal xaambꞌal tet Dios, ebꞌ yet xa Dios yei. Yu Jesucristo, chi skeꞌ kakꞌon cu xaambꞌal tet Dios, wan xaambꞌal yet cu pixan. Caw chi tzalabꞌi Dios yetoj wan cu xaambꞌal tuꞌ yet chi ẍaꞌoni. 6Yuxan queytuꞌ yalon can Dios yul An Juun Tzꞌibꞌebꞌilcan jaxca tiꞌ:
Jaꞌ bꞌey Jerusalén, oj jin txꞌoxa jun mactxequel. Jaꞌ jun mactxequel tuꞌ, laan jaxca junoj chꞌen chi eycantoj yipomaloj yich na.
Jaꞌ jun mactxequel sicꞌbꞌil el wu tuꞌ an, miman yeloc apnoj.
Jaꞌ ebꞌ oj yaoc scꞌul yin, cꞌam chi somcha el scꞌul ebꞌ yin, ẍi Dios yul An Juun tuꞌ.#Isaías 28:16.
7Jaꞌ jaon chi kaoc cu cꞌul yin Cristo tiꞌ, caw miman yeloc apnoj Naj yul cu sat. Ey pax ebꞌ cꞌam chi yaoc scꞌul yin Naj. Jaꞌton yin wan tiꞌ chi yal An Juun Tzꞌibꞌebꞌilcan bꞌey chi yal jaxca tiꞌ:
Ey jun chꞌen jix yintajne el ebꞌ waꞌnem na. Jaꞌton jun tuꞌ yel miman yopiso jix oqui, ẍi yul An Juun tuꞌ.#Salmos 118:22.
8Chi yal pax junelxa jaxca tiꞌ:
Jaxca junoj chꞌen chꞌen bꞌey chi ẍakꞌoc yajan ánima, ma jaxca junoj chꞌen bꞌey ian chi telcꞌotoj ánima, queytuꞌ yeoc Naj yul sat ebꞌ, ẍi yul An Juun tuꞌ.#Isaías 8:14-15.
Yutol queytuꞌ Cristo yul sat ebꞌ cꞌam chi yaoc scꞌul yin tuꞌ, yuxan tucꞌal chi somcha el ebꞌ yu, yutol cꞌam chi sjije skꞌane Naj ebꞌ. Miman txequelxa ye yet peyxa, tol tꞌinan queytuꞌ oj yute sbꞌa ebꞌ.
Sconobꞌ Jon Xa Dios Tinaniꞌ
9Jal jex jaex tiꞌ, junxane icꞌaale je yeoc sattaj Dios ketoj, yutol sicꞌbꞌil jex xa el yu. Akꞌbꞌil xa je yopiso yin yakꞌomal xaambꞌal tet Dios, cꞌal je yakꞌon servil cu Reyal ketoj. Caw junxane conobꞌal je yeoc yul sat Dios. Asan Dios che yakꞌ servil. Yet jex xa ton Dios tinaniꞌ. Queytuꞌ che yunne, yet che yalon can el swatxꞌilal Dios ketoj. Yutol jaꞌ jix jex awten el ketoj xol kꞌejkꞌinal, catuꞌ jix jex yaon can oc Naj bꞌey xol sajkꞌinalil caw watxꞌ. 10Man sconobꞌoj Dios je yeoc yet yalantoj. Jal tinaniꞌ xin, sconobꞌ jex xa. Jaꞌ yet yalantoj tuꞌ, cꞌam mac jix okꞌ scꞌul je yin, jal pax tinaniꞌ xin, chi okꞌ scꞌul Dios je yin ketoj.
Asanne Ojabꞌ Dios Chi Kakꞌ Servil Tinaniꞌ
11Jex wuẍtaj, jex wanabꞌ camcꞌulnebꞌil, man cu conobꞌ oj jun yul yibꞌankꞌinal tiꞌ, yutol ecꞌabꞌwom cꞌal keoc titiꞌ. Yuxan chin oc wal tean ey jex, manche yun wan tzet chi yoche oc je mimanil. Yutol jaꞌ wan pena ochwanilal tuꞌ, chi yakꞌle jowal ebꞌ yetoj cu pixan. 12Watxꞌ ojabꞌ chi kute cu bꞌeybꞌal yil ebꞌ man to otajnenoj Dios. Yu tuꞌ xin, caxcꞌal chi yal ebꞌ tol pena chi kute cu bꞌa tinaniꞌ, ta tol chi yil pax ebꞌ cu watxꞌ bꞌeybꞌal, oj yal watxꞌ kꞌane ebꞌ yin Dios yet oj jul scꞌual yet oj naꞌle oc kin cu masanil. 13Yu cu camcꞌulal yin Naj Kaawil, jijem ojabꞌ chi kute cu bꞌa tet masanil ebꞌ kaawil sicꞌbꞌil oc yin opiso yu ebꞌ ánima. Chi cu jije tzet chi yal ebꞌ rey, ebꞌ chi akꞌon mandar masanil. 14Chi cu jijen pax tet wanxa ebꞌ yaaw, yutol jaꞌ ebꞌ yaaw tuꞌ, ey cꞌal oc yopiso ebꞌ, yu yaon oc syaꞌtajilal ebꞌ yin ebꞌ chi oc spenail, cꞌal yu yalon watxꞌ kꞌane ebꞌ yin ebꞌ watxꞌ tzet chi el yuneni. 15Chi yoche Dios tol caw watxꞌ chi kute cu bꞌeybꞌal, yet watxꞌ cꞌam bꞌey chi can mitxꞌan ebꞌ cꞌam snaꞌbꞌal, ebꞌ man to yotaj oj skꞌane Dios, yet chi cu al-le penail yu ebꞌ. 16Jaon tiꞌ jajbꞌil jon xa eloj, yuxan kakꞌwej txeclo el xin, tol jajbꞌil jon xa. Asan tiꞌ xin, manche cu naꞌwej tol yu jajbꞌil jon xa, tol jajbꞌil xacꞌal kunen yal cꞌal tzet man watxꞌoj. Cu naꞌwejtej tol ey jon xa oc yakꞌomaloj servil Dios. 17Ey ojabꞌ yeloc apnoj junjun ánima yul cu sat. Catuꞌ chi cu camcꞌulnen pax ebꞌ ket creyenteal. Xiwojonwej tet Dios. Ey ojabꞌ yeloc apnoj ebꞌ mimej yaaw yul cu sat.
Jix Yabꞌ Syaꞌil Cristo Cu Yaꞌiloj
18Jex yakꞌomal servil, jijewej tzet chi yal je patrón. Ey ojabꞌ yeloc apnoj ebꞌ yul je sat. Man asanne oj tet ebꞌ watxꞌ snaꞌbꞌal cꞌal tet ebꞌ watxꞌ scꞌul che jije, jijewej pax tet ebꞌ pena snaꞌbꞌal. 19Ta asan yu eyoc cu naꞌbꞌal yin Dios, yuxan comon cꞌal chi cu etnelei, ta chi kakꞌ pax techaoj, caw chi tzala Dios ketoj. 20Kꞌinaloj yu junoj tzet pena jix el kuneni, catuꞌ chi cu etnele tinaniꞌ, ¿Tumi ta yu cꞌal oj kakꞌ techa jun syaꞌtajilal tuꞌ, yuxan watxꞌ jon? Kꞌinaloj ta comon cꞌal chi ale oc junoj syaꞌtajilal kin, yu junoj tzet watxꞌ chi el kunen tinaniꞌ, ta chi kakꞌ techa jun syaꞌtajilal tuꞌ, jaꞌton jun tuꞌ watxꞌ yul sat Dios. 21Tutun jaꞌ yu jun tiꞌ, yuxan jix cu yawte oc Dios yetoj, catuꞌ chi kabꞌen syaꞌil yu cu watxꞌ bꞌeybꞌal tiꞌ. Ilaꞌ, tol cu yaꞌiloj jix yabꞌen syaꞌil. Jaxca tuꞌ jix yute xꞌoxon can swatxꞌ bꞌeybꞌal ey jon, yet watxꞌ jaxca tuꞌ chi cu bꞌeybꞌalne. 22Jaꞌ Naj tuꞌ, cꞌam niꞌoj spenail jix oqui, cꞌam juneloj jix yetne junoj ánima Naj. 23Jaꞌ yet jix bꞌuchwa ebꞌ yin Naj, ma pax bꞌuchwa Naj yin ebꞌ. Jaꞌ yet jix ale oc Naj yin syaꞌtajilal yu ebꞌ, ma pax yakꞌ sjowal spajtze sbꞌa Naj tet ebꞌ. Tucꞌal jix ya can oc sbꞌa Naj yul skꞌabꞌ Dios, yutol jaꞌ Naj watxꞌ chi naꞌle oc yin. 24Jaꞌ Cristo jix ijon can a cu penail yin smimanil, yet jix ale oc Naj yin teꞌ culus, yet watxꞌ cꞌamxa yalon yet tzet man watxꞌoj kin, yutol jaxca tol camnajxa keoc tet spenail. Jaxca tuꞌ jix cu yute, yet watxꞌ, watxꞌ cꞌal chi kute cu bꞌeybꞌal. Caw jix yabꞌ syaꞌil Naj cu yaꞌiloj, yu cu colcha can eloj. 25Jaꞌ yet peyxa laan jon jaxca junoj noꞌ meꞌ qꞌueynaj cantoj. Jal pax tinaniꞌ jix cu meltzotej bꞌey Naj Kilomal, Naj chi teynen cu pixan.
Currently Selected:
1a Pedro 2: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.