Yuba 15
15
Elifasi a falan firindena: Ala ɲaxudene saranma nɛn e kɛwanle ra
1Teman kaana Elifasi mɔn yi falan tongo, a naxa,
2“Fekolonna lan a yi yabin ti
naxan tɔnɔ mi na ba,
naxan findixi fala fuun na?
3I lan i yi i xun mafala fala buntarene ra ba,
naxanye tɔnɔ mi na?
4I Ala yɛɛragaxun kalama muxune yi,
i e Ala maxandi feene xunna kalama.
5I i hakɛne nan ma fe falama.
Fala ɲaxine nan i dɛ.
6N tan mi a ra,
i fala xuiin nan i yalagixi.
I dɛɛn nan i seren na.
7I singe nan barixi adamadiine birin yɛɛ ra ba?
I singe nan daxi benun geyane xa da ba?
8I Ala wundo falane ramɛ nɛn ba?
I tan nan keden fe kolon ba?
9I nanse kolon,
nxu mi naxan kolon?
I nanse famuma,
nxu mi naxan famuma?
10Xun sɛxɛ fixɛne na,
fonne nxu yɛ,
naxanye fori i fafe xa.
11Ala i ralimaniyama falan naxanye ra,
i makoon mi ne ma ba,
nxu fala faɲin naxanye tima?
12Nanfera i bɔɲɛn tema?
Nanfera i yɛɛn xun sinma,
13i niin nafɔrɔ Ala xili ma,
i na fala sifane ti?
14Nanse adamadiin na,
a yi a yɛtɛ yatɛ sariɲanden na?
Naxan minixi ɲaxanli,
na findɛ tinxinden na ba?
15Hali a malekane,
Ala mi lannayaan saxi ne yi.
Hali kore xɔnna,
a mi sariɲan a yɛɛ ra yi.
16A xa lannayaan sa muxun tan yi di nayi,
naxan ɲaxu, naxan yanfan tima,
tinxintareyaan nafan naxan ma
alo igen min daxina?”
17“N xa a yɛba i xa, i tuli mati.
N xa a yɛba n naxan toxi,
18fekolonne naxan falaxi,
e nun e benbane,
naxanye mi sese luxunxi e ma,
19Ala yamanan so naxanye gbansan yii,
xɔɲɛ yo munma yi so naxanye yɛ.”
20“Ɲaxuden luma kɔntɔfinla nin a siimayaan birin yi,
ɲaxankata tiina waxatin yatɛxin na a ra.
21A wurundun xui magaxuxine mɛma,
bɔɲɛ xunbeli waxatini,
halagin yi fa a tan ma.
22A mi laxi a mini feen na sɔnɔn dimini,
a faxama yɛngɛn nin.
23A donseen fenma,
koni a sɔtɛ minɛn?
A kolon a faxan lɔxɔna a mamɛma.
24Kɔntɔfili feene nun kuisan feene a magaxuma nɛn,
e wuyaxi yi fa a xili ma
alo mangana ganla nan sigan yɛngɛni.
25Ne feene birin a sɔtɔma nɛn
bayo a bata susu Ala ra,
a murutɛ Ala Sɛnbɛ Kanna xili ma.
26A keli nɛn Ala xili ma a tengbesenyani,
a yɛ masansan wure lefa gbeen tixi a yɛɛ ma.
27A yɛtagin tuyanxi,
a gbingin gbo,
28koni a luma nɛn taa rabeɲinxine yi,
banxi kui genle yi,
naxanye kalamatɔ a ra.
29Na kanna mi fa hɛrin sɔtɔma,
a nafunla mi sabatima,
a fɔxɔn mi fa luma bɔxɔn fari sɔnɔn.
30A mi tangama sayaan ma,
a luma nɛn
alo tɛɛn wudi dungin naxan ganma,
Ala dɛ foyen yi a xali wulani.”
31“A yigin saxi fuyanten feene nin,
koni a yɛtɛ nan yanfanma,
bayo fuyantenyaan nan findima a saranna ra.
32Na kamalima nɛn benun a xa faxa,
alo wudin naxan mi fa a maɲingima.
33A luxi nɛn alo manpa binla#15.33 Wudi binla nde na yi, mɛn kaane naxanye sima, e yi naxanye bogi yitɔnma alo manpana e gbee kiini.
naxan a bogine rayolonma e mɔn xinde,
hanma alo oliwi binla
naxan fugeye yolonma a ra.”
34“Na ligama nɛn
bayo dii mi barima Ala kolontarene denbayane yi,
yanfan banxin naxanye kui,
ne findima tɛɛn balon nan na.
35Sɔxɔlɛ feene e yi,
na yi findi fe ɲaxine ra,
e yanfani tɔn e bɔɲɛni.”
Currently Selected:
Yuba 15: Kitabuna
Highlight
Copy
Compare
Share
Want to have your highlights saved across all your devices? Sign up or sign in
© 2012 Traducteurs Pionniers de la Bible
© 2012 Pioneer Bible Translators
This work is licensed under the Creative Commons Attribution ShareAlike 4.0 license
