Yuba 14
14
Yuba mɔn yi yabin ti
1Yuba mɔn yi a fala, a naxa,
“Adamadiin minixi ɲaxanla nin,
a siimayaan mi xunkuya,
a rafexi lanbaranna nan na,
2a luxi nɛn
alo wudi fugen naxan minima,
a xara, alo nininna, a mi buma.
3N ma Ala,
i yɛɛn tima n tan nan na ba
naxan luxi alo adamadiin bodene?
I kitin nasoma en tan nan tagi ba?
4Nde nɔɛ se sariɲanxin bɛ se haramuxini?
Muxu yo.
5I bata muxuna siimayaan danna ragidi,
i yi a siimayaan kikene yatɛ,
a mi danguɛ naxanye ra
i naxanye saxi.
6Nanara, i yɛɛn ba muxun na,
a xa a matabu,
alogo a xa a waxatin naɲan bɔɲɛ xunbenli
alo walikɛɛn yanyin naɲanma kii naxan yi.”
7“Yigin wudin tan ma,
bayo a na sɛgɛ, a mɔn yi mini,
a ɲɔxɔn mi ɲanma,
8hali a salenna fori bɔxɔni,
a xun dungin yi faxa bɔxɔni,
9igen nɛɛn fa sa a ma tun,
a mɔn bata a mabun,
a yi a ɲingine ramini
alo a yi kii naxan yi a fɔlɔni.
10Koni, xa muxun faxa,
a sɛnbɛn bata ɲan.
Muxun na faxa, a sigan minɛn?
11Igen ɲanma nɛn baani,
xudene yi xara.
12Muxun na faxa,
a ɲanma na kii nin,
a mi fa kelima sɔnɔn,
fanni kore xɔnna na,
a mi xulunma,
a mi kelima a xixɔnli.”
13“Xa i yi tinɲɛ n luxunɲɛ laxira yi nun,
n yi lu na han i ya xɔlɔn yi ɲan!
I mɔn yi waxatin nagidi n ma,
n ma fe rabirama i ma waxatin naxan yi.
14Koni muxun naxan bata faxa,
na mɔn kelɛ ba?
N diɲama nɛn n ma wali waxatin bun,
han i fa n naxulunma waxatin naxan yi.
15Nayi, n ni i yabɛ, i na n xili,
i na wa n to feni,
i tan naxan n daxi.
16Anu iki, i n sigati kiin birin yatɛxi.
Koni na waxatini,
i mi fa n yulubine yatɛma,
17i n ma murutɛ feene luxunma nɛn bɛnbɛnla kui,
i yi n hakɛne mafelu.”
18“Koni, hali geyane,
nde luma bɛ e ra waxatin birin
han e xuya ayi,
hali fanyene,
e bama e funfuni a xunxuri yɛɛn ma,
19igen luma nde bɛ gɛmɛne ra,
baa walanxine yi bɔxɔn tongo,
i fan adamadiine yigin kalama na kii nin.
20I muxune yɛngɛma habadan,
e yi faxa,
i yi e yɛtagin masara, i yi e kedi.
21Xa binyena e diine ma,
e mi na kolon.
Xa e rayarabi, e mi na yigbɛma.
22A tan nan tun a tɔrɔn kolon,
a sunuxi a yɛtɛ nan tun ma fe ra.”
Currently Selected:
Yuba 14: Kitabuna
Highlight
Copy
Compare
Share
Want to have your highlights saved across all your devices? Sign up or sign in
© 2012 Traducteurs Pionniers de la Bible
© 2012 Pioneer Bible Translators
This work is licensed under the Creative Commons Attribution ShareAlike 4.0 license
