Karasia 4

Haga 4

Toineꞌen Ahoꞌopot Hap Tupana Mohey Hap Upi

1Pyno ahenoi poꞌog wẽtup i hãꞌãkap wuo ehepe. Ahetama pe kue aihire te turan aiꞌywot ikuꞌuro pote ipowatꞌyp aiwatnuat totiat iheg me toineꞌen yt taꞌatuium i te ahepe. Maꞌato Airan hap putꞌok e raꞌyn hawyi iheg myi taꞌatuenotem naꞌyn miꞌi te ium iꞌatuꞌe ahepe aiꞌywot powatꞌyp ikuꞌuro rakat mikyꞌesat miwan miat aiꞌywot toꞌe hap ewy. 2Maꞌato aiwemotag hamo te yt kat i ipowatꞌyp aikai. Iraniaꞌin emiit no yn watukupteꞌen pote aiꞌywot powatꞌyp iwato toineꞌen pykai. Miꞌi tã ahetama pe watunug. 3Karãpe atunug yne teran Tupana woꞌonapin hap uhehakyeraꞌat hamo aiꞌe pote watoineꞌen aikotã waĩꞌe hat po pe. Aikotã aihire te turan aiꞌywot ikuꞌuro rakat powatꞌyp iheg me kahato toineꞌen rakat hap ewywuat watoineꞌen mesuwe. 4Putꞌok e raꞌyn heꞌat tomikyꞌesat ewy raꞌyn topyhuꞌat hawyi Tupana tipoꞌoro Tosaꞌyru haryporia kaipywiat torannia tehay woꞌonapin hap nug hamuat raꞌyn. Putꞌok toꞌe hawyi yt wẽtup i Toꞌywot woꞌonapin hap toiꞌaparap. Tutunug yne imikyꞌesat oktan. 5Koitywy Iesui ainug Toꞌywot saꞌyruꞌin Toꞌywot sakiꞌytꞌin koꞌi wo. Koitywy watunug neran ainapin hap oktan katupono imepytꞌin pakup koꞌi watoineꞌen pote. Aikotã waku ehay uinapin hap atunug watoꞌe aat i aat i Tupana kape. 6Miꞌi hawyi tutum Tosaꞌyru Paꞌãu wakuat -Uimepytꞌin wo eweikupteꞌen toꞌe ahepiat hap. Putꞌok e hawyi Papai watoꞌe aat kaꞌap Tupana kape aipyꞌa pe. 7Tupana yat eropat haria ewy nimo watoineꞌen. Koitywy haꞌyruꞌin hakiꞌytꞌin no sese wo ainug naꞌyn. Koitywy Aiꞌywot powatꞌyp yn naꞌyn aikai paĩ haꞌyruꞌin sese hakiꞌytꞌin kahato wo aito.

8Saꞌawyꞌi yt eweikuap i Tupana sese pywuat turan eweikupteꞌen Tupana ran koꞌi mohey haria tupanaria eropat haria eipe eweikupteꞌen. 9Maꞌato koitywy wyti Tupana sese kuap haria raꞌyn eweikupteꞌen. Iꞌewyte Tupana sese mikuap koꞌi eipe are. Kat hamo ten pyno koran eweiꞌaipok teran mekewat saꞌawyꞌi wuat eipyhyp hap ewywuat kape saꞌawyꞌi wuat eipyhyp hat eikaꞌiwat kape. Ehetupana ran yt kat etiat i kuap haria kape. 10Uimokenꞌẽ kahato haria eipe tawa Karasia piaria katupono -Watunug Iuteuria eko koꞌi ewy yne pote watuwehakyeraꞌat kuap e haria eipe. Iuteuria eko koꞌi watiꞌatumotypot hãpyk hawyi watuwehakyeraꞌat kuap eweiꞌe. Waku kahato aimimotypot no Iuteuria eꞌat koꞌi waty koꞌi anu koꞌi yne aiwehakyeraꞌat hamo eweiꞌe. 11Miꞌi pote uimoꞌakagꞌaia kahato haria eipe are mio tã eweiꞌe pote. Yt naku i rat paĩ katupono eimuꞌe saꞌawyꞌi te wuat Iesui etiat uhepiat hap eweiwaure kahato hap. Miꞌi hawyi yt kat hamo i eimuꞌe saꞌawyꞌi wuat hap topyhuꞌat ehepe.

12Uito meimuẽwat seko koꞌi uhehakyeraꞌat hap atiwaure yne rakirẽ ahẽtup kahato Iesui kape yn uhehakyeraꞌat hap. Miꞌi hawyi atipuẽti Tupana Iesui mohey hap upi waku kahato. Pyno mesup atikyꞌesat kahato eipe uito ewywuat. Yt eweimohey teiꞌo eheko nug hap muap Tupana kuap hamuat katupono Iesui yn muap Tupana kape are. Atikyꞌesat kahato eipe uiꞌewywuat imohey haria hap atikyꞌesat eweikupteꞌen hamuat paĩ. Iuteuria ywania mepyt sese uito meiũ paĩ. Uiꞌywot ti Iuteu sese paĩ. Uiꞌywania eko koꞌi ewy atunug kahato saꞌawyꞌi uhehakyeraꞌat hap kyewi Tupana kuap hamo wen maꞌato yt atipuẽti i miꞌi muap atunug yne urueko ewywuat pykai paĩ. Miꞌi hawyi Iesui Uhehakyeraꞌat hatno topyhuꞌat hawyi waku kahato Tupana topyhuꞌat yt pya hin i uikai topyhuꞌat. Pyno atikyꞌesat eipe uhepiat Iesui mohey hap ewywuaria ro eweikupteꞌen. Saꞌawyꞌi areineꞌen eipyꞌasetpe turan eheko ewywuat atunug. Yt urueko koꞌi i atunug uito Iuteu uito pykai. Eipe ewy atunug itote. Pyno mesup ewetunug uito ewy eweikupteꞌen yi Karasia ywania. Waku eheko wakuat ewywuat ewetunug aikotã saꞌawyꞌi atunug eipyꞌasetpe are. Maꞌato mio uheko Iuteu eko upi eweikat Tupana piat ehehakyeraꞌat hap aikotã uimotag hap eꞌat pe ewywuat ewetunug neran. Yt eiweꞌeg hin i mio tã ewetunug pote. Saꞌawyꞌi uimohey haria eweikupteꞌen. Kat pote mesup uhehay mohit hanuaria eweikupteꞌen. 13Saꞌawyꞌi uiꞌahuu kahato itote eipyꞌasetpe areineꞌen turan miꞌi pote yt areto kuap i wẽtup tawa kape. Uiꞌahuu eipyꞌasetpe wywo worohoꞌoꞌomuꞌe. 14Miꞌi turan tig yt eweiwaure i uhehay. Yt karãpe i -Motoro eweiꞌe uhepe. Uiꞌahuu hap upi yt eiwekyryꞌi hin i. Waku kahato waku kahato eweiꞌe yn uimimuꞌe pe. -Ereke ro mehin ereke ro mimi eweiꞌe yn uhepe. Aikotã uito atipy kaipywiat suut hat ewy uinug Iesui putꞌok e turanuat ewy. -Ereke ro eweiꞌe hap ewy yn. Eimimotypot no kahato areineꞌen saꞌawyꞌi itote. 15Miꞌi turan uhehay wo worohoꞌomowepiit kahato. Kat poteĩ koitywy yt iwepiit rakaria wo i raꞌyn eweikupteꞌen. Saꞌawyꞌi uheha ahuu hap yt ikahu i pykai uikyꞌe eipe. -Urutum neran urueha wakuat eweiꞌe uikyꞌe haype. 16Maꞌato koitywy eweikupteꞌen yt uikyꞌe i poꞌog haria ewy eweikupteꞌen katupono yt uiwẽ pohep teran i eimuꞌe pywuat sehay wuat hap ete pyi pote. Miꞌi pote ehewanikap ewy areineꞌen mesup. 17Koitywy eimuꞌe haria wẽtup seko kaipyi eikyꞌe wen maꞌato eimaꞌat reran haype. Worohoꞌokyꞌe iꞌatuꞌe maꞌato eheropoꞌok uipo pywiat reran haype neꞌi. Eikyꞌesat taꞌatukyꞌe ehepiat poꞌog uikyꞌe hap kawiat haria wo eweikupteꞌen. 18Atikyꞌesat wuatꞌi eꞌat pe miitꞌin eiꞌatukyꞌe haria wo sio areineꞌen itote sio yt. Wuatꞌi miitꞌin eikyꞌe hap atikyꞌesat aikotã uito worohoꞌokyꞌe hap ewy are atikyꞌesat wen maꞌato yt atikyꞌesat i eikyꞌe ran hap neꞌi eimaꞌat sehay wo hap neꞌi. 19Uimepytꞌin eipe pote haty kahato uhete. Worohoꞌokyꞌe hap aikotã aity tuwemepyt turanuat hap ewy. Uhehatꞌat kahato ekyewi are. Eiꞌatumuꞌe hap kaipywiat hãpyk takaria wo teran worohoꞌonug aikotã Iesui hãpyk takat topyhuꞌat hap ewywuaria wo teran haype. Atikyꞌesat kahato Iesui iꞌywaĩꞌĩ eipyꞌa pe i hap. Miꞌi pote Tupana kape ahẽtup haty wo -Etunug emepytꞌin no miꞌiria are Tupana pe. Haty kahato uipyꞌa pe aikotã aity ete haty imepyt wemoherep hap eꞌat pe hap ewy ahẽtup eikawiatno. Eweimoherep taꞌyn hawyi waku raꞌyn uhetiat. Haty hap tokosap taꞌyn aikotã aity tehatꞌat tomepyt egyiꞌat turan hap ewy. 20Uipopap kahato eimowanetup pyreꞌi uhepiat Tupana ehay wuat hamo. Miꞌi pote areto teran ehewowi maꞌato yt aikotã kuap hin i areto woꞌopyhik hawe areineꞌen mote.

21Uhehatꞌat kahato sio ehehãite Iesui mohey hap ete sio yt hap kuap hamo aikotã aity ewy worohoꞌokyꞌe. 22Saꞌawyꞌi te ti urueꞌaseꞌi Aparãu toineꞌen typy ok saꞌyru ywot no e miwan me. Wẽtup haꞌyru iharyꞌi sese mana Sara kawiat maꞌato wẽtup haꞌyru hemiit wẽtup ywania kawiat mana Akã kawiat. 23Temiit kawiat haꞌyru ti topuꞌi kaipywiat wemoherep.

Mana Akã Hawyi Mana Sara Aimuꞌe

24Pyno ahenoi teran miꞌi hap sehay iãꞌãkap wuo ehepe Aparãu saꞌyruꞌin etiat typy ok etiat iharyꞌiꞌin typy ok hap kaipywiat hap. Pyno Aparãu eharyꞌi toineꞌen typy ok hap kaipywiat. Pyno Aparãu eharyꞌi toineꞌen typy ok aikotã typy ok kapiat Tupana ihay hap e. Tohenoi kahato tehay woꞌonapin hap Muisei pe yityꞌok Sinai e hap tote -Uwe uwe inug yne teran Tupana ehay waĩꞌe hap tehakyeraꞌat hamo haria ti tukupteꞌen Aparãu saꞌyru temiit kawiat ewy mana Akã kawiat ewy. 25Iraniaꞌin teꞌeremohey saꞌag. -Atunug yne teran uhehakyeraꞌat hamuat iꞌatuꞌe. Mio tã e haria mana Akã mepyt Isamaeu ewywuat wẽtup ok Aparãu eharyꞌi temiit kawiat ewywuat haria. Mio tã e haria tawa Ierusarẽi miaria. Uwe uwe toto miꞌiria ehay upi miꞌiria teꞌeropyhuꞌat -Atunug yne teran Tupana woꞌonapin hap e hap emiit no tukupteꞌen. 26Maꞌato toineꞌen wẽtup tawa Ierusarẽi ne. Miꞌi tawa atipy kaipywiat suut hat mesuwiat ewywuat rẽ wen. Miꞌi pe watukupteꞌen mio aitoria Aparãu eharyꞌi sese mepyt Isaki ewywuaria wẽtup sehay upiat gupteꞌen haria. Katupono Iesui mohey hap yn ahehakyeraꞌat e haria. 27Saꞌawyꞌi te ti Tupana toꞌe miwan me -Eiwemowepiit ro yt karãpiat i imepyt rakaria e. Eiwemowepiit ro yt karãpiat i hãꞌãg mepyt saty hãꞌãg haria katupono heꞌaito miꞌatoiat ti aru poꞌog imepytꞌin nakatno topyhuꞌat heꞌaito kahato rakat mepytꞌin kai. 28Miꞌi tupono uiwyriaꞌin aito ti watukupteꞌen Tupana saꞌyruꞌin wo Tupana sakiꞌytꞌin no toꞌe Tupana Aparãu me hap ewy Isaki piat -Atum ti aru e hap ewy. 29Mekewat haꞌyru piit esaika hap kaipywiat wyti Isamaeu e hap het rakat tuwekyryꞌi kahato Tupana Paꞌãu esaika hap kaipywiat ete Isaki ete. Miꞌi hap ewy kahato te koran topyhuꞌat. Katupono miit esaika hap kaipywiaria toꞌokyryꞌi kahato te Tupana Paꞌãu esaika hap kaipywiat ete. 30Saꞌawyꞌi mana Sara toꞌe teꞌaito Aparãu me Tupana Paꞌãu kaipyi -Etipoꞌoro ro eharyꞌi emiit kawiat imepyt wywo pya aiꞌyatypepyi katupono yt naku i ti aru eꞌyi epowatꞌyp koꞌi topyhuꞌat esaꞌyru ran po pe neꞌi pote. Esaꞌyru sese po pe yn waku epowatꞌyp eꞌyi epoityro hap topyhuꞌat e teꞌaito pe. Miꞌi hawyi Aparãu tipoꞌoro teharyꞌi ran imepyt wywo wẽtup hy kape. 31Miꞌi tupono uiwyriaꞌin teropat hat kawiat Aparãu mepyt yt ewywuaria i raꞌyn aito maꞌato pywo sese iharyꞌi sese kawiat imepyt ewywuaria aito are. Isaki saipepiat sese Iesui paĩ miꞌi upiaria aito are.

Currently Selected:

Karasia 4: mav

Highlight

Copy

Compare