Sefenaea 3
3
Yawe bae hemi panisim olketa blong Jerusalem
1?!Sore tumas long yufala pipol blong Jerusalem! Oltaem yufala gohed fo agensim Yawe. Wei blong yufala hemi barava nogud tumas. 2Yufala no save lisin long Yawe. Taem hemi tok fo stretem yufala, yufala no obeim hem. Yufala no trastem Yawe, an yufala no go kolsap long God blong yufala. 3Olketa bikman blong Jerusalem i spoelem pipol blong olketa olsem olketa laeon wea i hanggre fo enisamting. An olketa jaj blong hem i duim olketa ravis samting olsem olketa wael dog wea i hanggre tumas, an kaikaim evrisamting long tudak. 4Olketa profet i bikhed tumas, an olketa trikim olketa pipol. Olketa prist blong Jerusalem i spoelem tambu long Tambuhaos, an olketa brekem lo blong God. 5Nomata olsem, Yawe hemi stap olowe nomoa long Jerusalem, an wei blong hem hemi stret fogud. Evri moning, hemi somaot stretfala wei blong hem long olketa pipol, an evri niufala de hemi gohed nomoa fo duim olketa gud samting. Bat olketa nogud pipol i no save sem nao.?
6Yawe hemi tok olsem, ?Mi spoelem plande kantri finis. An olketa taon blong olketa wea i garem wolston, mi brekemdaon olketa finis. Olketa taon ya nao i emti, an no eni pipol nao i wakabaot long olketa. Olketa biktaon blong olketa i bagarap nao, no eniwan blong olketa bae i stap. No eniwan nao. 7Mi tingse, ?Maewat, distaem bae olketa mas tinghae long mi, an herem olketa toktok mi talem fo stretem olketa.? Sapos olketa herem mi olsem, mi no save spoelem ples blong olketa, an bae mi no panisim hem moa. Bat wea, olketa laekem tumas fo duim olketa nogud samting. 8!So yufala mas lukaot! Hem ya nao Mesij wea mi Yawe mi talem. Datfala de fo mi talemaot panis blong olketa kantri bae hemi kam. Mi tingting finis fo hipimap kam tugeta olketa pipol blong olketa kantri wetem evri king blong olketa. An bae olketa filim paoa long kros blong mi. Evri ples long disfala wol, bae mi spoelem olketa long paoa blong kros blong mi wea hemi bone olsem faea.
Yawe bae hemi mekem olketa blong Jerusalem an Jiuda gudbaek moa
9?Bae mi mekem toktok blong olketa pipol blong olketa kantri fo kamap stret, mekem olketa prea kam long mi Yawe nomoa. An bae olketa ya save obeim mi tugeta. 10Olketa pipol blong mi wea i stap farawe long saet go long olketa riva long kantri long Kus,#3:10 ?Kus? Kus hemi olfala nem blong eria long saet long saot blong Ijip. bae olketa kam fo givim olketa ofaring long mi. 11An yufala olketa pipol blong mi, long datfala taem, bae yufala no save sem long wei yufala bin agensim mi bifoa. Bikos bae mi tekemaot olketa hu i praod an bikhed, an bae yufala no agensim mi moa long holi maonten blong mi. 12Bat yufala wea i mekem tingting blong yufala lou, bae mi letem yufala nomoa fo stap long Jerusalem, an bae yufala save trastem nem blong mi, Yawe. 13Olketa blong Israel wea i laef yet, bae olketa no save mekem eni nogud samting. An bae olketa no save laea, an no save talem eni toktok wea i no tru. An bae olketa save kaikai gudfala, an save stap kuaet, an no eniwan nao bae mekem olketa fraet.?#Revelesin 14:5.
Singsing fo hapi
14!Pipol blong Israel,
yufala mas hapi an singaot!
!Olketa pipol blong Jerusalem,
yufala save hapi tumas
long tingting blong yufala!
15Yawe hemi finisim panis blong yufala.
Ya, hemi ronem olketa enemi.
King Yawe blong Israel
hemi stap wetem yufala,
an no enisamting save mekem yufala fraet moa.
16Long datfala taem,
olketa bae tok olsem
long pipol blong Jerusalem,
?Olketa pipol blong Saeon,
yufala no kamap wik long fraet.
17Yawe God blong yufala,
hemi stap wetem yufala,
an paoa blong hem hemi save sevem yufala.
Bae hemi hapi tumas long yufala.
Lav blong hem
bae hemi mekem yufala fo stap kuaet.
Bae hemi hapi fogud long yufala,
go-go hemi singsing long yufala.?
18Yawe hemi tok olsem:
Nomata yufala sore tumas
bikos yufala no save makem olketa bikde,
bae mi finisim sore blong yufala.
Trabol ya, bae mi tekemaot from yufala,
mekem yufala fo no sem moa.#3:18 Long Hibru Baebol, mining blong disfala ves hemi no klia.
19Long datfala taem, bae mi panisim
olketa hu i bin mekful long yufala.
Olketa hu i no save wakabaot gudfala,
bae mi sevem olketa.
An pipol wea olketa bin fosim olketa
fo go stap olobaot long narafala kantri,
bae mi tekem kambaek olketa
long barava ples blong olketa.
Bae mi tekemaot sem blong olketa,
an mekem pipol long evri ples
i tokhae an tinghae long olketa.
20Long datfala taem bae mi tekem kambaek
yufala pipol blong Jerusalem.
Yufala ya wea i stap olobaot
long olketa narafala kantri,
bae mi tekem kambaek
long barava ples blong yufala.
Bae mi mekem nius
abaotem hae nem blong yufala
fo go kasem evri ples long wol ya.
An bae yu save lukim dat
mi mekem laef blong yufala
fo kamap gudfala moa.
Hem nao mesij blong Yawe.
Currently Selected:
Sefenaea 3: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.