Sams 149
149
Singsing fo preisim Yawe
(Toktok go long olketa pipol.)
1!Yumi preisim Yawe!
Yumi mas singim wanfala niufala singsing long Yawe.
Ya, yumi mas preisim hem taem yumi hu i tinghevi long hem i kam tugeta fo wosip.
2Yumi blong Israel,
yumi mas hapi bikos Yawe nao hemi mekem yumi.
Ya, yumi olketa pipol blong hem long Saeon,
yumi mas hapi bikos hem nao hemi king blong yumi.
3Yumi mas dans fo preisim nem blong hem,
an yumi mas bitim olketa dram an ringim olketa gita fo preisim hem.
4Yawe hemi hapi tumas long yumi olketa pipol blong hem.
Hemi haemapem yumi hu i lou, an hemi mekem yumi fo winim olketa enemi.
5Yumi hu i tinghevi long hem, yumi mas hapi bikos yumi win long faet.
Ya, yumi mas hapi an singsing go-go kasem delaet.
6Hemi gud tumas sapos yumi holem olketa sap naef fo faet an yumi singaot fo preisim hem.
7Hemi duim diswan mekem yumi save spoelem olketa narafala kantri,
an yumi save panisim olketa pipol blong olketa.
8An bae yumi save taemapem olketa king an olketa lida blong olketa ya long olketa bikfala sen.
9Ya, bae yumi save panisim olketa kantri ya olsem wea God hemi bin talem.
Hem nao wei wea Yawe hemi onarem yumi hu i tinghevi long hem.
!Yumi preisim Yawe!
Currently Selected:
Sams 149: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.