Provebs 31
31
Toktok blong King Lemuel
1Olketa waes toktok wea mami blong King Lemuel hemi tisim hem.
2“Pikinini blong mi, yu nao bon kam olsem ansa long prea blong mi.
3Yu no aftarem olketa woman fo slip wetem olketa,
kaen wei hemi spoelem olketa bikman.
4“Lemuel, hemi no stret fo lida hemi spaka,
an hemi no stret sapos bikman hemi laekem tumas fo dringim bia.
5Sapos olketa dring nomoa, bae olketa no save tingabaotem lo,
an bae olketa no save helpem pua pipol fo garem raet blong olketa.
6Bia hemi blong olketa wea kolsap olketa dae,
an waen hem blong olketa hu filnogud long ravis laef blong olketa.
7Kaen pipol save spaka an fogetem ravis laef blong olketa,
an no tingim wei wea olketa filnogud tumas.
8“Yu mas toktok fo helpem olketa hu i no save toktok fo olketa seleva.
Yu mas sapotem raet blong pipol wea narafala pipol i mekful long olketa.
9Yu mas tok stret taem yu jajem olketa pipol.
Yu mas gadem raet blong pua pipol an olketa hu i garem hadtaem.”
Wei blong Nambawan Woman
10Hemi had tumas fo faendem nambawan woman fo maritim.
Hemi barava gud moa winim enikaen barava spesol ston olsem pel.
11Hasban blong hem save barava trastem hem,
an hemi no sot long enisamting.
12Hemi gud tumas long man blong hem olowe,
hemi no spoelem hem enitaem.
13Oltaem nomoa hemi bisi tumas,
hemi gohed fo wakem enikaen gudfala kaleko.
14Oltaem hemi goaot fo lukaotem kaikai an karim kam long haos,
hemi olsem sip blong bisnisman wea i karim kam olketa kago.
15Hemi save wekap long eli moning fo redim kaikai blong famili blong hem,
an fo talemaot waka long olketa haosgele.
16Hemi save lukaotem pisgraon fo peim,
an hemi wakem plantesin blong grep long hem.
17Hemi wanfala strong woman,
an hemi gohed fo wakahad oltaem.
18Hemi savegud hao fo mekem bisnis blong hem,
an plande taem, hemi waka long naet.
19Oltaem hemi yusim save blong hem fo wakem olketa kaleko.
20Hemi kaen tumas long pua pipol,
an hemi helpem pipol hu i garem hadtaem.
21Long taem fo tukol, hemi no save wari,
bikos famili blong hem i garem olketa nambawan kaleko.
22Hemi wakem olketa gudfala sitbed fo dekoretem bed,
an kaleko blong hem hemi nambawan papol kaleko.
23Hasban blong hem, olketa man i tinghae long hem,
an hemi bikman long ples blong olketa.
24Woman olsem, hemi wakem olketa gudfala kaleko,
an hemi salem long olketa bisnisman.
25Pipol tinghae an tinghevi long hem.
Hemi no fraet long olketa samting wea bae kasem laef blong hem.
26Hemi save talem olketa waes toktok,
an olketa save trastem gudfala toktok blong hem.
27Oltaem nomoa hemi bisi,
an hemi barava lukaftarem famili blong hem.
28Olketa pikinini blong hem tokhapi long hem,
an hasban blong hem hemi tokhae long hem tu.
29Hasban blong hem hemi sei,
“Plande woman i gud, bat yu nambawan winim olketa evriwan.”
30Samfala woman i naes, bat hemi laea nomoa,
samfala woman luknaes, bat lelebet taem nomoa an hem finis.
Bat woman hu hemi tinghae long Yawe,
hemi stret fo tokhae long hem.
31Olketa mas tinghae long diskaen woman fo nambawan wei blong hem.
An hemi stret fo evriwan i tokhae long hem from waka blong hem.
Currently Selected:
Provebs 31: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.