Nambas 36
36
Olketa lan fo givim go long olketa dota blong Selofehad
1Olketa lida blong laen blong Gilead wea hemi long laen blong Makia, long traeb blong Manase long traeb blong Josef, olketa nao i kam lukim Mosis wetem olketa narafala lida blong olketa traeb blong Israel. 2Olketa kam an tok olsem, “Yawe hemi talem yu, masta, olsem bae yufala mas yusim tufala spesol ston fo divaedem olketa lan long olketa traeb blong Israel. An Yawe hemi talem long yu, masta, wea lan blong Selofehad, wantok blong mifala, yufala mas givim lan blong hem go long olketa dota blong hem.#Nambas 27:7. 3Bat sapos olketa dota blong hem i maritim olketa man blong deferen laen, bae lan blong olketa bae hemi go nao long narafala laen, an lan blong laen blong mifala bae hemi go smolfala moa. 4An long disfala Mekfifti Yia fo mekem olketa samting gofri, hem luk olsem olketa lan blong olketa dota blong Selofehad bae i go joen wetem lan blong laen wea olketa gele ya i marit go long hem. An long wei olsem lan blong laen blong mifala bae hemi go smolfala moa.”#36:4 “Mekfifti Yia” Levitikas 25:8-17 hemi tokabaotem disfala Mekfifti Yia.
5So Mosis hemi talemaot toktok blong Yawe, hemi tok olsem, “Olketa long traeb blong Josef ya i toktru. 6Yawe hemi talem dat olketa dota blong Selofehad i save maritim eni man hu olketa laekem, bat olketa mas maritim man insaet long laen blong olketa nomoa. 7Evriwan blong yufala long Israel mas stap long lan blong laen blong hem nomoa. Dastawe lan blong eniwan hemi mas stap long han blong laen blong hem nomoa an yufala no save mekem lan hemi go long deferen laen fo olketa onam. 8Sapos gele hemi garem raet long lan blong laen blong hem, bae hemi mas marit insaet long laen blong hem nomoa. Long disfala wei, evriwan bae onam barava lan blong laen blong hem nomoa. 9An bae lan ya hemi no save goaot from laen blong hem fo go long narafala laen. Bae evri laen mas kipim olowe disfala lan blong laen ya nomoa.”
10-11Olketa dota blong Selofehad, olsem, Mala, an Tiasa, an Hogla, an Milka, an Noa, olketa barava falom nao wanem Yawe hemi talem long Mosis. Olketa maritim nomoa olketa pikinini blong olketa brata blong dadi blong olketa. 12Olketa marit insaet long wanfala laen long traeb blong Manase san blong Josef. So lan blong olketa hemi stap olowe nao insaet long laen blong dadi blong olketa.
13Hem nao olketa lo an rul wea Yawe hemi givim long Mosis fo talem pipol blong Israel, taem wea olketa stap long bikfala flat ples blong Moab, long saet blong Jodan Riva, long narasaet long riva from Jeriko.
Currently Selected:
Nambas 36: SIPB
Highlight
Copy
Compare
Share
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
