Nambas 26
26
Mektu sensas
1Bihaen long taem wea ravis sik hemi finis, Yawe hemi tok olsem long Mosis an Haeprist Eleasa, san blong Eron, 2“Yutufala mas mekem sensas fo kaontem olketa man blong Israel. Yufala mas kaontem olketa falom olketa laen an olketa famili long tuelfala traeb blong Israel. Yufala mas raetemdaon nem blong olketa man hu i kasem tuenti yia an goap, an hu i fit fo go faet.”
3Olketa man i hipap tugeta long bikfala flat ples blong Moab, long narasaet long Jodan Riva from Jeriko. An Mosis an Eleasa i tok olsem long olketa, 4“Mitufala mas kaontem olketa man hu i kasem tuenti yia an goap. Hem nao wanem Yawe hemi talem Mosis fo duim.”
Olketa laen blong Israel wea olketa kamaot from Ijip i olsem:
5-7Traeb blong Ruben hu hemi fasbon san blong Israel, hemi garem laen blong Hanok, an laen blong Palu, an blong laen blong Hesron, an laen blong Kami. An namba blong olketa man long olketa laen ya i kasem 43,730.
8An long laen blong Palu, Eliab hemi san blong Palu. 9Eliab hemi garem trifala pikinini an nem blong trifala i Nemuel, an Datan, an Abiram. Datan an Abiram nao, olketa siusim tufala fo kamap lida blong olketa, bat tufala nao i bin agensim Mosis an Haeprist Eron, taem tufala joenem Kora fo agensim Yawe.#Nambas 16:1-35. 10An long taem wea faea hemi kilim dae Kora wetem 250 man blong hem, an graon hemi open fo sualomdaon olketa, tufala tu i dae wetem Kora. Diswan hemi olsem wanfala woning fo olketa pipol hu i agensim Yawe. 11Bat olketa pikinini blong Kora i no dae long datfala taem.
12-14Traeb blong Simion hemi garem laen blong Nemuel, an laen blong Jamin, an laen blong Jakin, an laen blong Sera, an laen blong Saol. An namba blong olketa man long olketa laen ya i kasem 22,200.
15-18Traeb blong Gad hemi garem laen blong Sefon, an laen blong Hagi, an laen blong Suni, an laen blong Osni, an laen blong Eri, an laen blong Arod, an laen blong Areli. An namba blong olketa man long olketa laen ya i kasem 40,500.
19-22Traeb blong Jiuda hemi garem laen blong Sela, an laen blong Peres, an laen blong Sera. Nao long laen blong Peres ya, hemi garem tufala smol laen olsem, laen blong Hesron an laen blong Hamul. An namba blong olketa man long olketa laen blong Jiuda i kasem 76,500. Bifoa kam Jiuda hemi garem nara tufala pikinini bat tufala dae long Kenan an no eni laen hemi kamaot from tufala. Nem blong tufala nao i Era an Onan.#Jenesis 38:1-10.
23-25Traeb blong Isaka hemi garem laen blong Tola, an laen blong Pua, an laen blong Jasub, an laen blong Simron. An namba blong olketa man long olketa laen ya i kasem 64,300.
26Traeb blong Sebulun, hemi garem laen blong Sered, an laen blong Elon, an laen blong Jaleel. 27An namba blong olketa man long olketa laen ya i kasem 60,500.
28-32Traeb blong Manase, san blong Josef, hemi kamap traeb blong Makia, san blong Manase. Makia hemi olo long laen blong Gilead. Laen blong Gilead hemi garem olketa smol laen olsem: laen blong Yesa, an laen blong Helek, an laen blong Asriel, an laen blong Sekem, an laen blong Semida, an laen blong Hefa.
33Nao laen blong Hefa hemi garem wanfala man wea nem blong hem Selofehad. Selofehad hemi nating garem eni pikinini boe, bat hemi garem olketa gele nomoa, wea nem blong olketa, Mala, an Noa, an Hogla, an Milka, an Tiasa. 34An namba blong olketa man long olketa laen long traeb blong Manase i kasem 52,700.
35Traeb blong Efrem, san blong Josef, hemi garem laen blong Sutela, an laen blong Bekea, an laen blong Tahan. 36An laen blong Sutela hemi garem laen blong Eran. 37An namba blong olketa man long olketa laen ya i kasem 32,500.
38-41Traeb blong Benjamin, hemi garem laen blong Bela, an laen blong Asbel, an laen blong Ahiram, an laen blong Sefufam, an laen blong Hufam. An laen blong Bela, hemi garem tufala smol laen olsem: laen blong Ad, an laen blong Naaman. An namba blong olketa man long olketa laen ya i kasem 45,600.
42Traeb blong Dan, hemi garem laen blong Suham. 43An namba blong olketa man long laen ya i kasem 64,400.
44Traeb blong Asa, hemi garem laen blong Imna, an laen blong Isvi, an laen blong Beraea. 45An laen blong Beraea, hemi garem tufala smol laen olsem: laen blong Heba, an laen blong Malkiel. 46Bifoa kam Asa hemi garem wanfala dota wea nem blong hem Sera. 47An namba blong olketa man long olketa laen ya i kasem 53,400.
48Traeb blong Naftali, hemi garem laen blong Jaseel, an laen blong Guni, 49an laen blong Jesa, an laen blong Silem. 50An namba blong olketa man long olketa laen ya i kasem 45,400.
51So namba blong olketa man blong Israel, hemi kasem 601,730.#26:5-51 Disfala mektu sensas hemi lelebet deferen from fas sensas wea yu save lukim long Nambas 1:1-46 bikos olketa olo bin dae taem olketa goraon long drae eria long fotifala yia afta olketa lusim Ijip.
52Oraet, Yawe hemi tok olsem long Mosis, 53“Olketa lan wea bae mi givim go long yufala, bae yufala mas divaedem long olketa traeb blong yufala, falom namba blong olketa.#Nambas 34:13; Josua 14:1-2. 54-56Bikfala lan nao bae yu givim go long traeb wea hemi garem plande man long hem, an smolfala lan nao bae yu givim go long traeb wea hemi no garem plande man long hem. Oraet, yufala mas yusim tufala spesol ston fo faendemaot olsem watkaen lan nao bae i go long evri traeb.”
57Nao traeb blong Livae, hemi garem laen blong Geson, an laen blong Kohat, an laen blong Merari. 58An hemi garem olketa narafala laen olsem: laen blong Libni, an laen blong Hebron, an laen blong Mali, an laen blong Musi, an laen blong Kora. Long laen blong Kohat, hemi garem wanfala man long bifoa wea nem blong hem Amram. 59Nao Amram hemi marit long wanfala woman long traeb blong Livae wea nem blong hem Jokebed hu hemi bon long Ijip. Oraet, tufala bonem trifala pikinini, wanfala gele, wea nem blong hem Miriam, an tufala boe, wea nem blong tufala Eron an Mosis. 60An Eron hemi garem fofala san, wea nem blong olketa, Nadab, an Abihu, an Eleasa, an Itama.#Nambas 3:2. 61Bat Nadab an Abihu, tufala dae long taem wea tufala bonem insens fo Yawe long faea wea hemi no tambu.#Levitikas 10:1-2; Nambas 3:4.
62Namba blong olketa man long traeb blong Livae wea i kasem wan mans an goap, hemi 23,000. Bat olketa no kaontem traeb blong Livae tugeta wetem olketa narafala traeb, bikos God hemi no givim eni lan long olketa olsem hemi givim long olketa narafala traeb blong Israel.
63Hem nao evriwan long olketa traeb blong Israel wea Mosis an Prist Eleasa i kaontem long bikfala flat ples blong Moab, long narasaet long Jodan Riva from Jeriko. 64-65Nao Kelab, san blong Jefune, an Josua, san blong Nun, tufala i laef long datfala taem. Bat olketa narafala man wea Mosis an Haeprist Eron i bin kaontem bifoa kam taem olketa stap fastaem long drae eria long Saenae, no eniwan long olketa ya i laef. Hemi olsem bikos Yawe hemi bin talem finis dat olketa evriwan mas dae long drae eria.#Nambas 14:26-35.
Currently Selected:
Nambas 26: SIPB
Highlight
Copy
Compare
Share
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
