Nambas 2
2
Wei wea olketa traeb mas stap long ples blong olketa
1Yawe hemi tok moa olsem long Mosis wetem Haeprist Eron, 2“Evritaem yufala stap long eni ples, yufala mas putumap haostent blong yufala raonem Tambu Haostent, bat olketa mas stap farawe lelebet long Tambu Haostent ya. An yufala mas garem flag fo makem traeb blong yufala, an olketa man mas putumap olketa haostent blong olketa raonem flag blong traeb blong olketa, an raonem flag blong laen blong olketa tu.
3“Olketa long traeb blong Jiuda mas putumap olketa haostent blong olketa long saet long ist, wetem flag blong olketa. Olketa mas stap long olketa laen blong olketa, wetem olketa lida blong olketa. Long traeb blong Jiuda, lida blong olketa nao Nason, san blong Aminadab. 4An namba blong olketa evriwan i kasem 74,600.
5“An traeb blong Isaka mas stap long saet long traeb blong Jiuda. An lida blong traeb blong Isaka nao Netanel, san blong Sua. 6An namba blong olketa evriwan i kasem 54,400.
7“An long narasaet, traeb blong Sebulun hemi stap. An lida blong olketa nao Eliab, san blong Helon. 8An namba blong olketa evriwan i kasem 57,400.
9“Namba long seksin long trifala traeb ya i kasem 186,400. An taem olketa traeb blong Israel i muv go long eni narafala ples, olketa nao i seksin fo wakabaot go fastaem.
10“An olketa long traeb blong Ruben mas putumap olketa haostent blong olketa long saet long saot, wetem flag blong olketa. Olketa mas stap long olketa laen blong olketa, wetem olketa lida blong olketa.
“Long traeb blong Ruben, lida blong olketa nao Elisua, san blong Sedeua. 11An namba blong olketa evriwan i kasem 46,500.
12“An traeb blong Simion mas stap long saet long traeb blong Ruben. An lida blong traeb blong Simion nao Selumiel, san blong Surisadae. 13An namba blong olketa evriwan i kasem 59,300.
14“An long narasaet, traeb blong Gad hemi stap. An lida blong olketa nao Eliasaf, san blong Duel. 15An namba blong olketa evriwan i kasem 45,650.
16“Namba long seksin long trifala traeb ya hemi kasem 151,450. An taem olketa traeb blong Israel i muv go long eni narafala ples, olketa nao i mektu seksin fo wakabaot go.
17“Taem yufala muv go long eni narafala ples, olketa long traeb blong Livae mas karim go Tambu Haostent wetem olketa samting blong hem, an olketa mas wakabaot bihaen long seksin blong Ruben. Olketa mas wakabaot long olketa laen blong olketa wetem flag blong olketa. An long sem wei wea olketa stap raonem Tambu Haostent long midol long olketa narafala traeb, traeb blong Livae mas wakabaot go long midol long olketa narafala traeb.
18“An olketa long traeb blong Efrem mas putumap olketa haostent blong olketa long saet long west, wetem flag blong olketa. Olketa mas stap long olketa laen blong olketa, wetem olketa lida blong olketa.
“Long traeb blong Efrem, lida blong olketa nao Elisama, san blong Amihud. 19An namba blong olketa evriwan i kasem 40,500.
20“An traeb blong Manase mas stap long saet long traeb blong Efrem. An lida blong olketa nao Gamaliel, san blong Pedasua. 21An namba blong olketa evriwan i kasem 32,200.
22“An long narasaet, traeb blong Benjamin hemi stap. An lida blong olketa nao Abidan, san blong Gideoni. 23An namba blong olketa evriwan i kasem 35,400.
24“Namba long seksin long trifala traeb ya hemi kasem 181,100. An taem olketa traeb blong Israel i muv go long eni narafala ples, olketa nao i mektri seksin fo wakabaot go.
25“An olketa long traeb blong Dan mas putumap olketa haostent blong olketa long saet long not, wetem flag blong olketa. Olketa mas stap long olketa laen blong olketa, wetem olketa lida blong olketa.
“Long traeb blong Dan, lida blong olketa nao Ahiesa, san blong Amisadae. 26An namba blong olketa evriwan i kasem 62,700.
27“An traeb blong Asa mas stap long saet long traeb blong Dan. An lida blong olketa nao Pagiel, san blong Okran. 28An namba blong olketa evriwan i kasem 41,500.
29“An long narasaet, traeb blong Naftali hemi stap. An lida blong olketa nao Ahira, san blong Enan. 30An namba blong olketa evriwan i kasem 53,400.
31“Namba long seksin long trifala traeb ya hemi kasem 157,600. An taem olketa traeb blong Israel i muv go long eni narafala ples, olketa nao i las seksin fo wakabaot go.”
32Namba blong olketa man wea Mosis hemi kaontem falom olketa laen blong olketa, i kasem 603,550. 33Bat Mosis hemi obeim wanem Yawe hemi bin talem, so hemi no kaontem olketa long traeb blong Livae taem hemi kaontem olketa narafala man blong Israel.
34Olketa mekem evrisamting barava olsem wea Yawe hemi talem long Mosis. Olketa putumap olketa haostent blong olketa wetem flag blong olketa, an evritaem olketa muv go long narafala ples, olketa wakabaot falom olketa traeb an olketa laen blong olketa.
Currently Selected:
Nambas 2: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.