Nambas 17
17
Wokingstik blong Haeprist Eron hemi grou
1Yawe hemi tok olsem long Mosis, 2“Yu talem olketa pipol fo tekem kam olketa wokingstik blong tuelfala lida blong Israel. An yu mas raetem nem blong lida long stik blong hem. 3An yu mas raetem nem blong Haeprist Eron long stik blong traeb blong Livae. Evri lida blong olketa tuelfala traeb blong Israel mas garem wanfala wokingstik. 4An yu mas tekem kam tuelfala wokingstik ya long Tambu Haostent blong mi, yu mas putum olketa long frant long Tambu Boks long ples wea mi save mit wetem yu long hem. 5An man wea mi siusim hem fo duim waka blong mi, wokingstik blong hem bae hemi grou. An long datfala wei, bae mi mekem olketa pipol fo no komplen long yu olowe.”
6So Mosis hemi talem olketa, an tuelfala lida blong tuelfala traeb blong Israel i tekem kam olketa wokingstik long hem. Nao hemi garem tuelfala wokingstik an wokingstik blong Haeprist Eron tu hemi wetem olketa. 7Den hemi go putum tuelfala wokingstik ya insaet long Tambu Haostent long frant long Tambu Boks.
8Long neks de, taem Mosis hemi kam long Tambu Haostent, hemi lukim dat wokingstik blong traeb blong Livae, wea nem blong Eron stap long hem, hemi grou. Wokingstik ya hemi garem lif an flaoa long hem, an hemi garem tu samfala frut blong amon#17:8 “frut blong amon” Disfala amon hemi wankaen nat wea hemi lelebet olsem Alite nat. wea hemi raep.#Hibrus 9:4. 9Den Mosis hemi tekem kam olketa wokingstik, an som long pipol blong Israel. An taem olketa lukim datfala samting, olketa lida i tekembaek wokingstik blong olketa. 10An Yawe hemi tok olsem moa long Mosis, “Yu tekem wokingstik blong Eron an putum gobaek moa long frant long Tambu Boks. Bae yu kipim long dea fo mekem saen long ae blong olketa hu i gohed fo komplen kam long mi. An bae disfala wokingstik hemi som olsem sapos olketa nating stopem komplen blong olketa, bae olketa dae.” 11Nao hemi duim barava olsem wea Yawe hemi bin talem.
12An olketa pipol i singaot olsem long Mosis, “!Sei! !Bae mifala evriwan dae! 13Eniwan hu hemi kam kolsap long Tambu Haostent bae hemi mas dae. Ating mifala evriwan bae dae nao ya.”
Currently Selected:
Nambas 17: SIPB
Highlight
Copy
Compare
Share
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
