Malakae 3
3
1Bat Yawe hu hemi garem evri paoa, hemi tok olsem, ?Bae mi sendem mesenja blong mi fastaem fo redim rod blong mi. Seknomoa, Masta blong yufala wea yufala weitem, hemi kam nao long Tambuhaos blong hem. Ya, disfala man wea yufala barava laek fo lukim, bae hemi kam, an hemi talemaot spesol agrimen blong mi.?#Matiu 11:10; Mak 1:2; Luk 1:76; 7:27.
2?Bat hu nao hemi fitim fo stanap strong long datfala de wea man ya hemi kam? Ya, no eniwan save stanap taem hemi lukim hem. Bae hemi olsem man hu hemi bonem silva fo aotem ravis blong hem, o olsem man hu hemi yusim sop fo aotem doti long kaleko.#Joel 2:11; Revelesin 6:13. 3Bae hemi jaj olsem man hu hemi bonem silva an gol fo hemi kamap klin. Long wei ya nao, bae hemi mekem olketa prist fo klin, mekem Yawe hemi garem olketa prist hu i save tekem kam ofaring long stretfala wei. 4Hem nao bae Yawe hemi hapi long olketa ofaring wea pipol blong Jiuda an Jerusalem i tekem kam, olsem bifoa.
5Yawe hu hemi garem evri paoa, hemi tok olsem, ?Bae mi kam fo jajem yufala, an kuiktaem nomoa mi talemaot hu long yufala nao hemi duim olketa ravis samting. Hem nao olketa hu i mekem majik, an olketa hu i brekem lo blong marit, an olketa hu i laea long kot, an olketa masta hu i ravem pei blong wakaman, an olketa hu i mekful long olketa wido an olketa pikinini wea mami an dadi blong olketa i dae finis, an mekful long olketa strensa. Evriwan hu i duim olketa nogud samting olsem i nating tinghae long mi.?
Sapos olketa kambaek long God, bae hemi blesim olketa
6Yawe hu hemi garem evri paoa, hemi tok olsem, ?Mi Yawe nao mi no save sens long enitaem. Dastawe nao no enisamting hemi spoelem yufala finis. 7Stat long taem blong olketa olo blong yufala bifoa kam, yufala les fo falom olketa lo blong mi. Ya, yufala nating falom wei blong mi. Oraet, sapos yufala kambaek long mi, bae mi kambaek moa long yufala. Bat yufala tok olsem, ??Hao nao mifala save kambaek long yu?? 8?Waswe, hemi stret nomoa fo man hemi ravem God? Bat nomata olsem, yufala gohed nomoa fo ravem mi. An yufala tok olsem, ??Hao nao mifala ravem yu?? Yufala gohed fo ravem mi long wei wea yufala nating givim kam olketa wan-tent an ofaring blong yufala long mi. 9Trabol hemi gohed fo kasem yufala evriwan long Israel, bikos yufala gohed fo ravem mi. 10Tekem kam olketa wan-tent blong yufala long Tambuhaos blong mi, mekem plande kaikai hemi stap long hem. Traem mi, mekem yufala lukim dat bae mi barava blesim yufala winim wanem yufala save tingim. Bae hemi olsem wea mi openem skae an letem ren hemi kamdaon.#Levitikas 27:30; Nambas 18:21-24; Diutronomi 12:6; 14:22-29; Nehemaea 13:12. 11Bae mi no letem olketa inseks fo spoelem olketa gaden blong yufala, an bae mi no letem enisamting fo mekem olketa tri blong yufala fo lusim frut blong olketa bifoa hemi redi. 12An bikos ples blong yufala hemi barava gud tumas, pipol blong evri kantri bae i talem dat yufala hapi fogud.? Hem nao toktok blong Yawe, hu hemi garem evri paoa.
God hemi promis fo sore long olketa stretfala pipol
13Hem ya toktok blong Yawe. Hemi tok olsem, ?Yufala barava tokspoelem mi nao. Bat yufala tok olsem, ??Hao nao mifala tokspoelem yu?? 14Yufala gohed fo talem dat hemi yusles nomoa fo duim waka blong mi Yawe hu mi garem evri paoa. Yufala tingse hemi nating helpem yufala fo obeim olketa lo blong mi an mekem yufala seleva fo luk olsem yufala sore tumas long ae blong mi. 15An yufala gohed fo talem dat olketa praod pipol nao i hapi, an olketa nogud pipol i garem gudfala laef. Yufala talem tu dat mi no panisim nomoa olketa hu i agensim mi.?
16 (Profet) So olketa hu i tinghae long Yawe, i tok tugeta. An Yawe hemi herem evrisamting wea olketa talem, an hemi mekem nem blong olketa hu i tinghevi long hem hemi stap long wanfala buk fo rimembarem olketa.
17Yawe hemi tok moa olsem, ?Long taem mi mekem olketa ya fo kamap spesol pipol blong mi, bae olketa i blong mi nao. Bae mi sore long olketa barava olsem wea dadi hemi sore long pikinini blong hem hu hemi obeim hem. 18An long datfala taem, bae yufala luksave wea olketa stretfala pipol hu i obeim mi i barava deferen from olketa nogud pipol hu i nating obeim mi.? Hem nao toktok blong Yawe hu hemi garem evri paoa.
Currently Selected:
Malakae 3: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.