Luk 6:27-49

An Jisas hemi sei moa, “Bat mi talem long yufala hu i lisin long toktok blong mi, yufala mas lavem olketa enemi blong yufala, an yufala mas duim gudfala samting long olketa hu i heitem yufala. An yufala mas blesim olketa hu i tokspoelem yufala, an yufala mas prea fo olketa hu i spoelem yufala. An sapos eniwan hemi hitim yu long raetsaet long fes, yu tanem go narasaet fo hemi hitim moa. An sapos eniwan hemi tekem longfala kaleko blong yu, yu no stopem hem moa fo tekem sote blong yu tu. An sapos eniwan hemi askem yu fo enisamting, yu mas helpem hem nao. An sapos eniwan hemi tekem enisamting blong yu, yu no askem hem fo givimbaek moa long yu. An wanem yufala laekem olketa nara pipol fo duim long yufala, yufala mas duim long olketa tu. “?Waswe, yufala tingse God bae hemi blesim yufala sapos yufala lavem nomoa olketa pipol hu i lavem yufala? Nomoa ya, bikos olketa pipol wea olketa garem sin tu olketa save lavem nomoa olketa pipol wea olketa lavem olketa. ?Waswe, yufala tingse God bae hemi blesim yufala sapos yufala duim gudfala samting nomoa long olketa pipol wea olketa duim gudfala samting long yufala? Nomoa ya, bikos olketa pipol wea olketa garem sin, olketa save duim semsamting tu. ?Waswe, yufala tingse God bae hemi blesim yufala sapos yufala givim samting nomoa long olketa pipol wea yufala save dat bae olketa givimbaek samting moa long yufala? Nomoa ya, bikos olketa pipol wea olketa garem sin tu, olketa save givim olketa samting long olketa nara pipol wea olketa garem sin, wea olketa save dat bae olketa givimbaek evrisamting moa long olketa. Bat yufala mas lavem olketa enemi blong yufala, an yufala mas duim gudfala samting long olketa tu. An yufala mas givim enisamting blong yufala fo olketa nara pipol, wea yufala no tingim moa wea bae olketa mas givimbaek long yufala. Sapos yufala duim olsem, bae God hemi barava blesim yufala ya, an bae yufala nao kamap barava pikinini blong God Antap. Bikos God hemi kaen olowe long olketa pipol, nomata olketa no save kaen long hem an nomata wei blong olketa hemi barava ravis tumas. Yufala mas kaen an sore long evri pipol, olsem Dadi blong yufala long heven hemi kaen an sore long evri pipol tu.” An Jisas hemi sei moa, “Yufala mas no jajem nara man, nogud God hemi jajem yufala tu. An yufala mas no panisim nara man, nogud God hemi panisim yufala tu. An yufala mas fogivim nara man, mekem God hemi save fogivim yufala tu. Yufala mas givim olketa samting long olketa nara pipol, mekem God hemi save givim olketa samting long yufala tu. Ya, God hemi save givim olketa samting long yufala, olsem wanfala man hemi fulumapem gud wanfala basket wea hemi sekem an presim godaon fo fulumapem moa. So diskaen wei wea yufala givim olketa samting long olketa nara pipol nao, bae God hemi falom tu taem hemi givim olketa samting long yufala.” Nao Jisas hemi gohed moa fo talem wanfala tokpiksa long olketa, “?Waswe, wanfala blaen man hemi save lidim go nara blaen man moa? Nomoa ya. Sapos hemi duim diswan, bae tufala evriwan foldaon insaet long wanfala hol ya. Man wea hemi skul, hemi no save winim tisa blong hem. Bat taem hemi skul gudfala go-go hemi barava savegud, long taem ya nao hemi save kamap wankaen wetem tisa blong hem. “?Waswe nao yu lukim wanfala smol pisgraon wea hemi kasem ae blong brata blong yu, bat yu ya, yu nating lukim nomoa bikfala pisgraon wea hemi kasem ae blong yu seleva? An hao nao yu save talem olsem long brata blong yu, ‘Ei, brata. Letem mi tekemaot disfala smol pisgraon from ae blong yu ya.’ Bat yu ya, yu nating lukim nomoa disfala bikfala pisgraon wea hemi kasem ae blong yu seleva. !Yu man fo laea tru nao! Yu mas aotem bikfala pisgraon ya from ae blong yu seleva fastaem. An bihaen, bae yu save lukluk gud an yu save aotem moa smolfala pisgraon ya wea hemi kasem ae blong brata blong yu.” An Jisas hemi sei moa, “Gudfala tri hemi no save garem ravis frut, an ravis tri hemi no save garem gudfala frut. So evri tri, yumi luksave long hem from frut blong hem seleva. An yumi no save faendem frut blong fig tri an frut blong grep tri long olketa ravis tri olobaot. Gudfala man hu hemi garem gudfala tingting long maen blong hem, hemi save duim olketa gudfala samting. Bat nogud man hu hemi garem olketa ravis tingting long maen blong hem, hemi save duim nomoa olketa ravis samting. Bikos wanem hemi fulap long maen blong wanfala man nao, hemi save kamaot long toktok blong hem. “?Waswe nao yufala sei, ‘!Masta, yu nao Masta blong mifala!’ bat yufala nating save duim nomoa wanem mi talem long yufala? Nao man wea hemi kam long mi an herem toktok blong mi an barava gohed fo falom olketa samting ya tu, mi save talem yufala abaotem wei blong man olsem ya. Hemi olsem wanfala man hu hemi laek fo wakem haos blong hem. Hemi dig godaon fogud nao, mekem hemi wakem faondesin long haos antap long bikfala ston. Nao taem ren hemi kam an bikfala wata hemi ran kam an bangam haos ya, haos ya hemi nating seksek. Bikos man ya hemi mekem disfala haos barava strong fogud. Bat man wea hemi herem toktok blong mi an hemi nating falom nomoa wanem mi talem, hemi olsem wanfala man hu hemi wakem wanfala haos antap long graon nomoa, wea hemi nating wakem eni faondesin long hem. So taem bikfala wata hemi ran kam an bangam haos ya, haos ya hemi foldaon an hemi barava pisis finis nao.”