Levitikas 6
6
1-3Yawe hemi gohed fo tok olsem long Mosis, “Maet samwan hemi laea abaotem samting wea nara man hemi givim long hem fo lukaftarem, o hemi stilim samting blong eniwan, o hemi ravem eniwan, o hemi faendem samting blong narafala man bat hemi laea abaotem an kipim samting ya. Oraet, sapos hemi duim enikaen samting olsem, o hemi mekem strongfala promis abaotem enikaen samting olsem bat hemi laea nomoa, datfala man hemi brekem lo blong mi an hemi sin agensim mi, 4-5an hemi fitim fo hemi mas panis long hem. Datfala man mas givimbaek evrisamting ya wea hemi tekem long rong wei, an hemi mas adem go moa tuenti pasent long praes blong samting ya. 6Den hemi mas ofarem kam wanfala man sipsip wea hemi no garem enisamting rong long bodi blong hem, an hemi mas givim long prist fo sakrifaes fo mekem kompensesin long mi Yawe. Praes blong sipsip ya hemi mas fitim wanem man hemi bin duim. 7Long disfala wei, prist hemi mekem sakrifaes fo tekemaot sin blong man, an bae mi fogivim man ya fo diskaen sin hemi duim wea hemi fitim fo hemi mas panis fo hem.”#Nambas 5:5-8.
Lo blong sakrifaes wea hemi barava bone
8Yawe hemi gohed fo tok olsem long Mosis, 9“Talem Eron wetem olketa san blong hem: Hem ya nao lo blong sakrifaes wea hemi barava bone. Disfala sakrifaes fo barava bone wea yufala mas ofarem kam evri ivining, hemi mas stap fulnaet antap long olta go-go kasem moning, an prist hemi mas lukaftarem faea blong olta mekem hemi gohed fo laet gudfala long naet. 10Oraet, long moning, wanfala prist hemi mas werem spesol kaleko blong hem wetem sot trasis blong hem#Eksodas 28:39-43. an hemi mas go fo tekemaot asis wetem olketa gris long hem, an putum go long saet blong olta. 11Bihaen, hemi mas go sensim olketa kaleko blong hem, an hemi mas kambaek fo tekem asis ya go aotsaet from ples wea yufala stap, long wanfala ples wea hemi klin long ae blong mi, an hemi mas kapsaetem long ples ya. 12An faea long olta hemi mas laet olowe, olketa mas no letem hem dae. Evri moning, prist mas putum go samfala faeawud moa long hem, an hemi mas putum sakrifaes fo barava bone antap long olta, an hemi mas bonem evri gris blong olketa sakrifaes fo som dat olketa stapgud wetem mi. 13Faea long olta ya, olketa mas no letem hem dae, hemi mas laet olowe nomoa.”
Lo blong ofaring long flaoa blong nambawan wit
14-15Yawe hemi gohed fo tok olsem long Mosis, “Hem ya nao lo blong ofaring long flaoa blong nambawan wit. Prist long laen blong Eron mas tekemaot samfala nambawan flaoa long han blong hem an miksim wetem oliv oel an insens, an hemi mas karim kam long frant long olta fo givim long mi. Den hemi mas bonem long olta fo somaot dat man ya hemi givim long mi, an hemi tambu samting wea smel blong hem hemi mekem mi Yawe hapi. 16-17Nao narafala haf long flaoa wea hemi stap, hemi fo olketa prist, mekem olketa save wakem bisket long hem, bat hemi tambu fo putum yist long hem. An olketa mas kaikaim bisket ya insaet long ples blong Tambu Haostent, bikos ples ya hemi tambu. Disfala kaikai wea mi givim long olketa hemi wanfala tambu samting, hemi tambu tumas olsem sakrifaes fo mekem man stret moa long ae blong mi, an sakrifaes fo mekem kompensesin. 18Eni man long laen blong Eron hemi save kaikaim disfala haf blong tambu ofaring bikos hem nao haf blong olketa olowe. Disfala kaikai ya hemi tambu tumas, so eniwan hu hemi tasim hem bae tambu hemi kam long hem.” 19Yawe hemi gohed fo tok olsem long Mosis, 20“Hem ya nao disfala ofaring long flaoa blong nambawan wit wea Eron o eni san bihaen long hem hemi mas tekem kam long mi Yawe stat long taem wea olketa mektambu long hem fo kamap hae prist. Evri de hemi mas tekem wan kilo nambawan flaoa an divaedem long tufala haf. Wanfala haf hemi mas ofarem long moning, an narafala haf long ivining. 21Hemi mas miksim flaoa ya wetem oliv oel an fraenem. Hemi mas pisisim disfala bred an ofarem kam olsem sakrifaes wea smel blong hem hemi mekem mi Yawe hapi. 22An evri man long laen blong Eron hu hemi kamap haeprist bihaen long Eron, hemi mas mekem disfala ofaring olowe, an hemi mas bonem hem finis bikos ofaring ya hem blong Yawe nao. 23Long sem wei tu, evri ofaring long flaoa blong nambawan wit wea eni prist hemi ofarem, hemi mas barava bone antap long olta. Hemi tambu fo prist fo kaikaim eni pat long hem.”
Lo blong sakrifaes fo mekem man stret moa long ae blong Yawe
24Yawe hemi talem Mosis, 25fo talem Eron wetem olketa san blong hem fo falom olketa wei long waka blong prist. Hemi tok olsem, “Hem ya nao lo blong sakrifaes fo mekem man stret moa long ae blong mi, long not saet blong olta long disfala ples wea olketa kilim dae animol blong sakrifaes fo barava bone,#Levitikas 1:11. hem nao ples wea olketa mas kilim dae animol fo disfala sakrifaes. Nao mit blong disfala sakrifaes, hemi barava tambu tumas. 26So prist hu hemi bonem disfala sakrifaes, hemi mas kaikaim mit ya insaet long ples blong Tambu Haostent nomoa wea hemi tambu. 27Enisamting wea hemi tasim datfala mit, bae tambu hemi kam long hem. An sapos blad blong disfala sakrifaes hemi kasem kaleko blong eniwan, hemi mas wasim kaleko ya long datfala tambu ples nomoa. 28Sapos prist hemi kukim datfala mit long wanfala pot wea olketa wakem long graon, bae hemi mas brekem pot ya. O sapos hemi kukim long wanfala sospen, hemi mas skrasim klin, an wasim long wata. 29Eni man long famili blong olketa prist save kaikaim mit blong datfala sakrifaes, bikos hemi barava tambu tumas. 30Bat sapos hae prist hemi mekem sakrifaes fo mekem man stret moa long ae blong mi, an hemi tekem kam blad blong hem insaet long Tambu Haostent, hemi tambu fo eniwan fo kaikaim mit blong disfala sakrifaes. Olketa mas barava bonem olketa mit blong hem.”
Currently Selected:
Levitikas 6: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
