Josua 16
16
Lan blong olketa long traeb blong Efrem an haf long traeb blong Manase
1Hem ya nao olketa lan wea olketa long traeb blong Josef i onam. Spialaen long saet long saot, hemi stat long Jodan Riva kolsap long Jeriko an hemi go-go kasem springwata long Jeriko long ist, an hemi go moa insaet long drae eria. Hemi go pas long Jeriko an hemi go-go kasem olketa hil long Betel, 2nao hemi go kasem taon long Lus, an hemi go pas long Atarot wea hemi spialaen long eria blong olketa pipol long Aki. 3Den, hemi tane go long west saet wea hemi go-go kasem spialaen blong olketa long laen blong Jaflet bifoa, an hemi go moa kasem taon olketa kolem Bet-Horon Long Daon, an hemi go moa kasem taon long Gesa, an hemi en long Mediterenian Si.
4So haf long traeb blong Manase, an traeb blong Efrem, tufala laen blong Josef, i tekova long olketa lan long disfala eria long saet blong Jodan Riva long west, an olketa onam nao.
Lan blong olketa long traeb blong Efrem
5Long saet long saot, spialaen blong olketa lan wea olketa long traeb blong Efrem i onam nao hemi stat long taon long Atarot-Ada long ist, an hemi goap long taon olketa kolem Bet-Horon long Antap, 6-9an hemi go west go kasem Mediterenian Si. Spialaen blong olketa long not, hemi stat long ist long taon long Janoa, an hemi tane go lelebet long not, den hemi tane kam moa lelebet long saot go kasem Mikmetat an Tapua, an hemi go falom Kana vali go west go kasem Mediterenian Si. Spialaen blong olketa long ist, hemi stat long not kolsap long Janoa an hemi gopas long Taanat-Saelo, an hemi go kasem taon long Atarot, an hemi go kasem taon long Naara, an hemi go kasem Jodan riva long wanfala ples kolsap long taon long Jeriko. Evri taon an evri vilij insaet long spialaen ya long saet long west, hemi stap insaet long eria blong traeb blong Manase, bat Josua hemi bin givim finis go long traeb blong Efrem. 10Olketa long traeb blong Efrem i nating ronemaot nomoa olketa pipol blong Gesa. Olketa stap tugeta nomoa wetem olketa ka-kam kasem tude, bat olketa long traeb blong Efrem i fosim olketa fo waka olsem slev.#Jajis 1:29.
Currently Selected:
Josua 16: SIPB
Highlight
Copy
Compare
Share
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
