Hosia 13
13
Bae Yawe hemi panisim olketa blong Israel
1 (Profet) Bifoa, taem olketa long traeb blong Efrem i tok, olketa long levenfala narafala traeb blong Israel i fraet an tinghae long olketa, bikos olketa i strong. Bat olketa long Efrem nao i sin an wosipim disfala laea god Baal. An from disfala samting nao, olketa kamap olsem man dae.#13:1 “olketa long traeb blong Efrem” Bifoa Israel hemi garem king, Efrem wetem Jiuda nao tufala i nambawan traeb long olketa tuelfala traeb blong Israel. (Lukim tufala blesing blong Jekob long tufala ya long Jenesis 49:9-12, 22-26.) An taem olketa kamaot from Ijip an krosim Jodan Riva fo tekova long lan blong Kenan, Josua hu hemi long traeb blong Efrem, hemi kamap bikfala lida blong Israel. (Lukim Nambas 13:8, 16; Diutronomi 34:9; Josua 24:29-30.) An taem King Solomon hemi dae an kingdom ya hemi divaed, Jeroboam hu hemi long traeb blong Efrem, hemi kamap fas king long kingdom blong Israel long not. (Lukim 1 Kings 11:26; 12:20.) Bat King Jeroboam nao hemi mekem tufala man buluka wea olketa wakem long gol, an putum long tufala taon long Betel an Dan, mekem evri pipol blong Israel long not i wosipim. (Lukim 1 Kings 12:26-33.) 2Distaem, olketa blong Israel i falom wei blong traeb blong Efrem, an gohed fo sin olowe nomoa agensim Yawe. Olketa gohed nomoa fo wakem kaving long olketa laea god long silva fo wosipim. Olketa kaving ya, man nomoa hemi wakem falom save blong hem. Olketa pipol long olketa narafala kantri raonem olketa i tok olsem, “Olketa blong Israel i kilim pipol dae fo sakrifaesim go long god blong olketa, an kisim olketa kaving god long man buluka nomoa.” 3Bikos yufala duim olketa ravis samting olsem, bae yufala lus kuiktaem nomoa, olsem smok antap long olketa hil long eli moning. Ya, hemi olsem tu wata blong naet, taem san hemi kamap long moning an hemi lus kuiktaem nomoa. Bae yufala olsem nomoa skin blong wit wea win hemi bloum go. Ya, bae yufala lus nomoa olsem smok blong faea wea hemi goap long skae.
4Yawe hemi tok olsem, “Mi Yawe nao mi God blong yufala, an mi bin tekem olketa grani blong yufala fo kamaot from Ijip. Mi nomoa mi God blong yufala, an no eni narafala god moa hemi stap fo sevem yufala.#Eksodas 20:2-3. 5Mi nao bin lukaftarem olketa grani blong yufala insaet long drae eria, ples wea hemi hot tumas. 6Bat taem olketa tekova long disfala gudfala graon an stap long hem, olketa hapi tumas bikos mi givim plande kaikai long olketa. Diswan hemi mekem olketa fo kamap praod tumas, an ka-kam kasem tude, olketa nating tingim mi moa.#Diutronomi 8:1-20. 7Hem nao mi kros tumas long yufala, an bae mi spoelem yufala finis olsem taem laeon hemi kaikaim wanfala animol. Bae mi weit nomoa fo kilim yufala dae, olsem bikfala wael puskat hemi haed long saet rod fo kasholem animol wea bae hemi kaikaim. 8Ya, olsem wanfala mami bea wea hemi kros tumas an hemi pisisim animol wea hemi stilim olketa pikinini blong hem, bae mi tu mi pisisim yufala. Bae mi kilim yufala evriwan dae, olsem wea laeon hemi kilim dae wanfala animol an kaikaim nao.
9“Olketa blong Israel. Nomata mi nao save helpem yufala, bat yufala gohed nomoa fo agensim mi. Dastawe nao, bae mi spoelem yufala finis. 10Yufala bin tok olsem, ‘!Givim mifala wanfala king an olketa lida fo helpem mifala!’ ?Bat wea nao disfala king an olketa lida? !Olketa no save sevem yufala!#1 Samuel 8:5-6, 19-20. 11Mi bin kros tumas long yufala, hem nao mi givim king long yufala. An distaem, mi kros tumas tu long yufala, hem nao mi tekemaot moa king ya from yufala.#1 Samuel 10:17-24; 15:26.
12“Mi bin raetemdaon finis olketa sin blong yufala, an mi kipim gud nomoa. 13Yufala garem plande sans fo laef, bat yufala krangge tumas, hem nao yufala les. Yufala olsem pikinini wea hemi stap insaet long bele blong mami blong hem, bat taem hemi redi fo bon kam, hemi les nomoa fo kamaot.
14“Bae mi peim olketa aot from paoa blong Grev.
Ya, bae mi tekem olketa aot from paoa blong Dae.
!Dae! ?Wea nao paoa blong yu fo kilim pipol dae?
!Grev! ?Wea nao paoa blong yu fo spoelem pipol?
Ya, bae mi sevem olketa pipol blong mi,
an mi no save sensim tingting blong mi.#1 Korin 15:55.
15“Bat distaem, nomata olketa blong laen ya Efrem i grou bikfala an kamap strong winim olketa narafala laen blong Israel, bat bae mi spoelem olketa finis. Bae hemi olsem wea mi sendem wanfala barava hot win fo kamaot from drae eria long ist. An bae disfala hot win hemi mekem olketa wel an springwata blong olketa fo kamap drae evriwan. Bae mi tekemaot evri gudfala samting blong olketa. 16Bae mi mas panisim olketa blong Samaria, bikos oltaem nomoa olketa gohed fo agensim mi. Bae olketa enemi i kam an kilim dae evriwan long faet. Bae olketa torowem evri pikinini blong olketa long graon, an bae olketa kasholem olketa waef blong olketa wea i babule, an splitim bele blong olketa open.”
Currently Selected:
Hosia 13: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.