Hagae 2
2
Niufala Tambuhaos bae hemi nambawan
1Long sem yia ya, long mektuenti-wan de blong mekseven mans,#2:1 ?Long sem yia ya, long mektuenti-wan de blong mekseven mans? Long datfala taem, mekseven mans long yia hemi mans long Tisri long kalenda blong olketa pipol blong Israel, an hemi sem taem long yia olsem Septemba o Oktoba long kalenda blong yumi. Disfala de hemi 17 Oktoba 520 B.K., an hemi las de long Bikde fo Stap long Smolfala Lif Haos. Lukim Levitikas 23:33-43. Yawe hemi talemaot Mesij blong hem long Profet Hagae. Hemi tok olsem, 2?Yu go tok long Gavna Serababel blong Jiuda, an long Haeprist Josua, an long olketa pipol long dea, an yu askem olketa olsem, 3??Hu nao long yufala hemi save rimembarem Tambuhaos blong mi bifoa wea hemi barava nambawan? Distaem ating yufala lukim dat hemi enihao. Ating yufala tingse disfala niufala Tambuhaos hemi samting nating nomoa.#Esra 3:12. 4Bat yu Serababel, yu mas strongim tingting blong yu seleva. An yu Josua, yu mas strongim tingting blong yu seleva. Yufala evriwan long disfala ples, yufala mas strongim tingting blong yufala seleva. Mi Yawe hu mi garem evri paoa, mi talem stret long yufala nao: Mi laekem yufala evriwan fo waka, bikos mi stap wetem yufala. 5Taem olketa olfala grani blong yufala i kamaot from Ijip bifoa, mi bin mekem spesol agrimen wetem olketa fo stap wetem yufala olowe. An kam kasem tude, Spirit blong mi hemi stap yet wetem yufala. So yufala mas no fraet.??#Eksodas 29:45-46.
6Hem nao Yawe hu hemi garem evri paoa hemi tok olsem, ?I no longtaem, bae mi mekem heven, an disfala wol, an solwata, olketa evriwan i seksek.#Hibrus 12:26. 7Bae mi winim olketa narafala kantri, an tekemaot olketa gudfala samting blong olketa, an karim kam fo fulumap Tambuhaos ya long hem. 8Evri silva an gol wea i stap long disfala wol i blong mi. 9Mi Yawe hu mi garem evri paoa, mi talem stret long yufala nao: Disfala niufala Tambuhaos blong mi bae hemi barava nambawan fogud winim faswan. An long disfala ples, bae mi mekem yufala fo stapgud an garem piis.?
Profet Hagae hemi toktok wetem olketa prist
10Long disfala sem yia nomoa, long mektuenti-foa de blong meknaen mans,#2:10 ?Long disfala sem yia nomoa, long mektuenti-foa de blong meknaen mans? Long datfala taem, meknaen mans long yia hemi mans long Kislev long kalenda blong olketa pipol blong Israel, an hemi sem taem long yia olsem Novemba o Disemba long kalenda blong yumi. Disfala de hemi 18 Disemba 520 B.K. Yawe hemi talemaot Mesij blong hem long Profet Hagae. Nao profet hemi tok olsem, 11?Yawe hu hemi garem evri paoa hemi tok olsem, ?Yu go faendemaot long olketa prist olsem wanem nao lo hemi talem. 12Yu askem olketa ya olsem: ?Sapos samwan hemi karim mit wea olketa bin mektambu long hem, nao hemi karim long kaleko blong hem, an datfala kaleko ya hemi jes tasim wanfala bred, o supsup, o waen, o oel, o eni narafala kaikai moa, waswe, bae samting ya hemi kamap tambu?’ ” Den olketa prist i ansa olsem, ?Nomoa?.#Levitikas 6:27; Esikiel 46:20.
13Nao Hagae hemi ask moa olsem, ??Sapos wanfala man hemi tasim ded bodi, an hemi jes tasim eni kaikai olsem, waswe, bae kaikai ya hemi kamap no klin long ae blong God??#Nambas 19:11-12.
Olketa prist i ansa olsem, ?Ya, hemi no klin nao.?
14An Hagae hemi talemaot dat Yawe hemi tok olsem, ?Hemi semsem nomoa long yufala olketa pipol blong disfala ples, an olketa samting wea yufala duim, an olketa sakrifaes wea yufala bonem fo givim kam long mi. Olketa evrisamting i no klin long ae blong mi.
15?Yufala mas tingting gud long olketa samting wea i kasem yufala kam kasem distaem. Taem yufala no stat yet fo bildimbaek moa disfala Tambuhaos blong mi, 16evritaem yufala go fo tekemaot olketa wit an bali#2:16 ?bali? Hemi wankaen kaikai wea hemi luk olsem raes. long olketa gaden blong yufala, yufala tingse bae yufala garem 200 kilo, bat wea, yufala garem nomoa 100 kilo. An taem yufala go fo tekem waen long ples blong hem, yufala tingse bae yufala garem 100 lita, bat yufala garem nomoa 40 lita. 17Hemi olsem bikos mi bin mekem olketa ston long aes fo foldaon long olketa gaden blong yufala, an mi bin sendem kam barava hotfala strong win fo spoelem olketa gaden blong yufala, an mi bin sendem kam tumas ren fo spoelem kaikai long olketa gaden blong yufala. Nomata olsem, yufala no tane kambaek long mi.#Emos 4:6-11. 18Tude hemi mektuenti-foa de blong meknaen mans, an tude yufala finisim nao faondesin blong Tambuhaos blong mi. Stat distaem, yufala save lukim wanem bae hemi kamap. 19Nomata olketa kaikai blong yufala hemi finis, an olketa grep tri, an olketa fig tri, an olketa pomegranet,#2:19 ?pomegranet? Hemi wanfala kaen frut wea hemi luk olsem pasenfrut. an olketa oliv tri blong yufala, i no save garem frut, bat stat distaem bae mi blesim yufala.?
Yawe hemi mekem promis long Serababel
20Long sem de ya tu, Yawe hemi talemaot mektu Mesij blong hem long Profet Hagae mekem hemi go talemaot 21long Serababel, gavna blong Jiuda. Hemi tok olsem, ?Bae mi mekem heven an disfala wol fo seksek. 22Olketa kantri wea i garem king, bae mi spoelem olketa, an bae mi finisim paoa blong olketa. Olketa kaat fo faet blong olketa, an olketa soldia wea i raed long olketa kaat ya, bae mi kilim olketa dae. Olketa hos blong olketa bae dae, an olketa soldia wea i raed long olketa hos ya bae olketa ki-kilim dae olketa wantok long ami nomoa. 23Bat yu Serababel, san blong Sealtiel, yu wakaman blong mi. Long datfala de, bae mi mekem yu fo kamap olsem wanfala gol ring wea hemi stap long fingga long raet han blong mi, wea hemi saen blong paoa blong mi. Mi siusimaot yu finis fo kamap man blong mi.?
Hem nao toktok blong Yawe hu hemi garem evri paoa.
Currently Selected:
Hagae 2: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.