Esikiel 48
48
Olketa lan blong samfala traeb long Israel
1-7Yawe hemi gohed fo tok olsem, “Hem ya nao olketa traeb blong Israel, an olketa lan wea bae hemi blong olketa, stat long baondri long lan ya long not saet. Baondri ya long not hemi stat long Mediterenian Si an hemi ran go falom rod long taon long Hetlon, an hemi go kasem ples ya wea rod hemi gotru long olketa maonten long Hamat. Hemi ran go long taon long Hasarenon long ist saet, an hemi falom baondri long lan blong taon long Damaskas, an baondri long lan blong taon long Hamat. Olketa traeb ya evriwan bae i garem lan blong olketa, stat long baondri long lan ya long ist saet go-go kasem Mediterenian Si long west saet. Olketa lan blong olketa wea hemi stat long not an go long saot hemi olsem:
Faswan, hemi lan blong traeb blong Dan.
An nekswan, hemi lan blong traeb blong Asa.
An nekswan, hemi lan blong traeb blong Naftali.
An nekswan, hemi lan blong traeb blong Manase.
An nekswan, hemi lan blong traeb blong Efrem.
An nekswan, hemi lan blong traeb blong Ruben.
An nekswan, hemi lan blong traeb blong Jiuda.
Tambu eria ya long midol long lan
8“Disfala lan long saot saet long baondri blong Jiuda, hemi spesolwan. Waed blong hem, bae hemi stat long not an go long saot, hemi tuel an haf kilomita. An longfala blong hem, bae hemi stat long ist an go long west. Hemi semsem nomoa olsem lan wea olketa narafala traeb i garem. An Tambuhaos blong mi bae hemi stap insaet long lan ya.
9“An wanfala haf long spesol lan ya, bae hemi mas garem wanfala spesol ples, wea longfala blong hem hemi tuel an haf kilomita, an waed blong hem hemi ten kilomita. Bae yufala mas givim disfala ples olsem ofaring long mi. 10Disfala spesol ples hemi tambu fo olketa prist. Disfala pisgraon, bae longfala blong hem stat long ist go kasem long west hemi tuel an haf kilomita, an waed blong hem stat long not go kasem long saot, hemi faev kilomita. An Tambuhaos blong mi bae hemi stap insaet long pisgraon ya. 11Disfala lan bae hemi fo olketa prist hu i bon kam bihaen long laen blong Sadok. Olketa bin gohed fo duim gud waka fo mi, an i no joen wetem olketa narafala laen blong Israel wea i go rong olsem olketa narafala Livaet ya bin duim. 12-13Hem nao spesol lan blong olketa long laen blong Sadok, an bae lan ya hemi barava tambu. Olketa Livaet tu bae i garem wanfala spesol lan kolsap long disfala lan blong olketa prist. Bae longfala blong lan ya stat long ist go kasem long west, hemi tuel an haf kilomita, an stat long not go kasem long saot, hemi faev kilomita. An longfala blong tufala haf long spesol lan ya stat long ist go kasem long west, hemi tuel an haf kilomita, an stat long not go kasem long saot, hemi ten kilomita. 14Disfala lan wea bae yufala givim long mi, hemi barava nambawan lan winim evri narafala lan ya. An bae yufala mas no salem eni pis long hem, o sensim fo narafala lan wea yufala save givim go long nara man. Disfala lan bae hemi tambu, bikos hemi blong mi.
15“An narafala haf long lan ya wea hemi stap saet long tambu lan ya long saot saet, hemi fo olketa pipol save yusim. Longfala blong hem hemi tuel an haf kilomita an waed blong hem hemi tu an haf kilomita. Olketa pipol save wakem olketa haos long hem, an save yusim fo eria wea hemi garem gras long hem fo olketa animol i kaikaim. An bae taon long Jerusalem hemi stap midol long hem. 16Lan fo taon ya bae hemi skuea, wea evri saet blong hem hemi kasem 2250 mita. 17An evri saet raonem taon ya, bae hemi garem wanfala open eria, wea bikfala blong hem hemi 125 mita. 18Taem yufala mekem taon ya finis, bae tufala haf long lan ya hemi stap yet, wea wanfala hemi stap long ist saet blong taon ya, an narawan hemi stap long west saet. Saes blong tufala lan ya hemi semsem nomoa, wea longfala blong tufala hemi faev kilomita, an waed blong tufala hemi tu an haf kilomita. Hem nao ples fo olketa pipol blong taon ya i save mekem gaden long hem. 19Olketa pipol hu i stap long taon ya, nomata olketa blong watkaen laen, bae olketa save mekem gaden nomoa long lan ya.
20“So, disfala lan long midol bae hemi skuea, an evri saet long hem bae hemi tuel an haf kilomita. Tufala spesol haf wetem lan blong taon ya, bae hemi olsem tambu ofaring fo givim kam long mi.
21-22“Long tufala saet long disfala lan long midol, bae tufala bikfala haf hemi stap yet. Wanfala haf blong hem long ist saet, hemi go kasem baondri long lan ya long ist, an long west saet, hemi go kasem Mediterenian Si. Tufala bikfala haf ya bae i blong king, an midol long tufala bikfala haf ya, bae spesol lan wetem Tambuhaos hemi stap long hem. An disfala spesol lan long midol wetem tufala bikfala haf blong king, hemi stap midol long lan blong Jiuda long not, an lan blong Benjamin long saot.”
Olketa lan blong olketa narafala traeb long Israel
23-27“Stat long disfala spesol lan long midol an go long saot, bae olketa narafala traeb i garem lan, stat long baondri blong lan ya long ist saet go kasem Mediterenian Si long west saet. Olketa lan blong narafala traeb ya, stat long not go kasem long saot bae hemi olsem:
Faswan, hemi lan blong traeb blong Benjamin.
An nekswan, hemi lan blong traeb blong Simion.
An nekswan, hemi lan blong traeb blong Isaka.
An nekswan, hemi lan blong traeb blong Sebulun.
An laswan, hemi lan blong traeb blong Gad.
28“Baondri long lan blong yufala long saot saet, hem tu hemi baondri long lan blong olketa long traeb blong Gad. Bae baondri ya hemi stat long taon long Tama long saot an hemi gotru long drae eria go-go kasem Meribat-Kades, wea hemi garem wata long hem. Baondri ya hemi ran go long not west, falom smolfala wata long baondri long lan blong Ijip, go-go kasem Mediterenian Si.
29“Hem nao wei wea yufala mas divaedem olketa lan ya, fo olketa traeb blong Israel i onam. Hem nao mesij blong mi Lod Yawe.”
Olketa geit blong Jerusalem
30-34Yawe hemi gohed fo tok olsem, “Jerusalem bae hemi garem bikfala wolston raonem, wea hemi garem fofala saet long hem, wea longfala blong olketa evriwan hemi 2,250 mita. Bae hemi garem trifala geit long evri saet, an olketa geit ya bae garem nem blong olketa tuelfala traeb blong yufala. Trifala geit long not saet, wanfala bae hemi garem nem blong Ruben, an wanfala hemi garem nem blong Jiuda, an wanfala hemi garem nem blong Livae. An trifala geit long ist saet, wanfala bae hemi garem nem blong Josef, an wanfala hemi garem nem blong Benjamin, an wanfala hemi garem nem blong Dan. An trifala geit long saot saet, wanfala bae hemi garem nem blong Simion, an wanfala hemi garem nem blong Isaka, an wanfala hemi garem nem blong Sebulun. An trifala geit long west saet, wanfala bae hemi garem nem blong Gad, an wanfala hemi garem nem blong Asa, an wanfala hemi garem nem blong Naftali.#Revelesin 21:12-13.
35“Longfala blong bikfala wolston wea hemi goraonem taon ya bae hemi 9,000 mita. An stat long datfala taem ya, bae yufala gohed fo talem nem blong taon ya olsem, Yawe-Sama, wea hemi minim ‘Yawe hemi stap long dea.’”
Currently Selected:
Esikiel 48: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.