Esta 9
9
Olketa Jiu i winim olketa enemi blong olketa long faet
1Hemi kasem nao mektetin de blong mektuel mans ya, wea Haman bin talemaot long nem blong king, an olketa enemi blong olketa Jiu i bin planem finis fo kilim olketa dae. Bat long datfala taem, evri plan hemi barava sens fogud nao, an olketa Jiu i winim olketa enemi ya. 2Long evri taon wea olketa Jiu i stap long hem an long evri provins long kingdom blong King Sekses, olketa Jiu i redim olketa seleva finis fo faet agensim olketa pipol wea i laek fo kilim olketa dae. Bat olketa pipol long evri ples i fraetem olketa Jiu, so olketa enemi i nating save winim olketa nao.
3Evri minista blong king, an olketa gavna an olketa bikman long olketa provins wetem evri wakaman blong king, olketa evriwan i gohed fo helpem olketa Jiu, bikos olketa fraetem Modekae. 4Evriwan long kingdom ya i save finis wea king bin siusim Modekae fo kamap praeminista, an distaem hemi kamap strong moa.
5So, olketa Jiu i kilim dae nao evriwan long olketa enemi blong olketa, olsem wea olketa laek fo duim. 6Olketa Jiu i kilim dae 500 pipol insaet long Susa. 7-10Long taem ya, olketa kilim dae tu tenfala san blong enemi blong olketa ya Haman. Nem blong olketa san ya nao, Pasandata, an Dalfon, an Aspata, an Porata, an Adalia, an Aridata, an Pamasta, an Arisae, an Aridae, an Vaesata. Bat nomata olsem, olketa Jiu i no tekem enisamting wea olketa enemi ya i onam.
11Long datfala sem de, king hemi herem ripot abaotem namba long olketa pipol wea olketa Jiu i kilim dae long Susa. 12An hemi tok olsem long Esta, “Kuin Esta. Long Susa, olketa pipol blong yu i kilim dae 500 pipol, wetem tenfala san blong Haman. An long olketa provins, namba ya maet hemi goap. ?Wanem moa yu tingim? Yu talem mi sapos yu laekem enisamting moa. Enisamting moa wea yu askem, bae mi save duim nomoa fo yu.”
13Esta hemi tok olsem, “King. Sapos hemi oraet nomoa long yu fo olketa Jiu i duim olsem, plis yu letem olketa fo duim moa semsamting tumoro long taon ya, olsem wea olketa bin duim tude. An yu talem olketa man blong yu, fo hangem bodi blong tenfala san ya blong Haman long datfala ples fo hangem man long hem.” 14So, king hemi givim narafala strongfala toktok wea hemi letem olketa fo duim moa wanem olketa bin duim finis long Susa, olsem wea Esta bin askem. An olketa man blong hem i go hangem bodi blong tenfala san ya blong Haman, mekem evri pipol save lukim. 15Long mekfotin de blong mektuel mans ya, olketa Jiu hu i stap long Susa i kam tugeta moa, an kilim dae 300 pipol moa long taon ya. Bat olketa no tekem nomoa enisamting blong olketa.
16Olketa Jiu hu i stap aotsaet long taon long Susa long olketa provins blong kingdom ya, olketa redim olketa seleva tu fo faetem olketa enemi hu i laek fo kilim olketa dae. Olketa kilim dae 75,000 long olketa enemi. Bat olketa no tekem nomoa enisamting blong olketa. 17Hem nao mektetin de long mektuel mans ya. Bat long neks de, olketa no faet. Long datfala de, olketa gohed fo mekem fist bikos olketa barava hapi tumas. 18Bat olketa Jiu hu i stap long Susa, olketa gohed fo faet long mektetin de an mekfotin de. Long mekfiftin de, olketa no faet. Olketa gohed fo mekem fist tu bikos olketa i barava hapi tumas. 19From diswan nao, evri yia, olketa Jiu hu i stap long olketa smolfala taon i makem mekfotin de blong mektuel mans ya, fo olsem wanfala de fo holide an fo mekem fist long hem bikos olketa i barava hapi tumas. An evri famili i save wakem kaikai, an givim kaikai go long olketa narafala fren blong olketa.
Fist blong Purim
20Modekae hemi mekem olketa fo raetemdaon stori abaotem olketa samting ya, an sendem go long leta fo olketa Jiu hu i stap evriwea long olketa provins insaet long kingdom ya blong King Sekses. 21Long leta ya hemi tok olsem, “Yumi mas makem wea bae long evri yia yumi mas holide long tufala de ya, mekfotin de an mekfiftin de long mektuel mans long Ada. 22Hem nao tufala de wea yumi kilim dae olketa enemi blong yumi. Long datfala taem nao, yumi bin tingse bae yumi sore tumas an krae, bat hemi kamap wanfala taem wea yumi barava hapi tumas. Bae yumi mas hapi long tufala de ya, an olketa famili blong yumi mas wakem kaikai, an mas givim kaikai long olketa fren blong yumi, an long olketa pua pipol tu.” 23So, olketa Jiu i falom toktok ya blong Modekae, an olketa mekem olsem wanfala kastom blong olketa evri yia, fo mekem fist long tufala de ya.
24Olketa duim disfala samting bikos Haman, san blong Hamedata long laen blong Agag hu hemi enemi blong olketa Jiu, hemi bin rolem olketa spesol ston, wea olketa kolem “purim”, fo faendemaot de wea bae olketa kilim dae olketa Jiu. Hemi bin mekem wanfala plan fo kilim dae evriwan blong Jiu. 25Bat taem king hemi herem disfala ravis plan, hemi mekem narafala toktok wea disfala plan blong Haman fo kilim dae olketa Jiu, mas kasem hem seleva. Dastawe nao olketa hangem Haman an olketa san blong hem long ples fo hangem man long hem. 26From diswan nao, olketa Jiu i kolem long “Fist blong Purim”, falom nem blong olketa spesol ston ya. An from leta ya blong Modekae, an from olketa samting wea hemi hapen long olketa, 27olketa Jiu i mekem wanfala rul fo olketa. Olketa wea bae i bon kam bihaen long olketa, an olketa narafala pipol wea bae i laek fo falom wei blong olketa Jiu, bae olketa mas kipim tufala de ya evri yia, long barava taem blong hem, olsem wea Modekae bin talem long leta blong hem. 28An evriwan i agri wea evriwan hu bae i bon kam bihaen long olketa, mas oltaem kipim tufala de ya blong Purim. An long evri provins an long evri taon, olketa Jiu evriwan mas tingim fo mekem fist ya evri yia.
29Kuin Esta wetem Modekae blong Jiu i raetem wanfala leta moa fo som dat Esta hemi barava agri long leta wea Modekae hemi raetem fastaem abaotem disfala Fist blong Purim. 30An tufala sendem olketa leta go long olketa Jiu hu i stap long 127 provins insaet long kingdom ya blong King Sekses. Insaet long leta ya, tufala talem olketa Jiu fo garem piis an fo stap gudfala. 31An leta ya hemi talem dat olketa evriwan wetem olketa hu bae i bon kam bihaen long olketa, bae i mas kipim tufala de ya blong Purim long barava taem blong hem. Olketa mas kipim tufala de ya long sem wei wea olketa bin gohed fo kipim rul ya fo no kaikai, an fo sore an krae taem man hemi dae. Modekae blong Jiu an Kuin Esta nao i putum disfala rul.
32So, olketa raetemdaon disfala strongfala toktok wea Kuin Esta hemi talem abaotem olketa rul long Fist blong Purim insaet long wanfala buk.
Currently Selected:
Esta 9: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.