Eklesiastes 2
2
Wanem hemi mekem man fo hapi, hemi no fitim tingting blong yumi
1Mi bin tingting olsem, “Oraet, bae mi traem evri gudfala samting fo faendemaot wanem hemi save mekem mi hapi.” Bat hemi no fitim tingting blong yumi. 2Taem man hemi laf, hemi krangge nomoa ya. An olketa samting wea hemi save mekem man hemi hapi, hemi nating save helpem hem nomoa. 3Mi laekem tumas fo kamap waes long evrisamting, so mi gohed fo dringim waen mekem mi hapi an kamap krangge. Mi wande luksave long olketa samting wea man save duim fo mekem hem hapi long sotfala taem hemi stap long wol.
4Nao mi duim plande barava bikfala waka. Mi wakem finis olketa haos fo mi, an mi mekem finis olketa plantesin long grep. 5Mi plantem finis plande gaden long olketa tri, an mi wakem finis plande plantesin long olketa deferen kaen frut tri. 6An mi bin mekem olketa watasaplae fo watarem olketa gaden blong mi. 7Mi bin garem plande slev wea mi baem, an plande moa wea i bon long ples blong mi. An olketa sipsip an nanigot an buluka blong mi i plande tumas. Stat kam bifoa kam kasem distaem, no eniwan long Jerusalem hemi garem plande gudfala samting olsem mi. 8Mi bin tekem olketa silva an gol blong olketa king long olketa eria mi rul ovarem. Mi garem olketa man an woman hu i singsing fo mekem mi hapi. An mi garem tu plande woman, olsem eni man hemi laekem tumas fo garem.#1 Kings 10:14-27; 2 Kronikols 9:22-27.
9Mi garem biknem, an no eniwan long olketa hu i rul fastaem long mi long Jerusalem hemi garem barava biknem olsem mi. Long taem mi duim olketa samting ya, waes blong mi hemi stap long mi olowe an hemi nating save lus from mi.#1 Kronikols 29:25. 10Ya, mi garem evrisamting wea mi laekem, an mi duim enisamting wea mi laekem tumas. Mi barava hapi long evrisamting wea mi waka long hem, an olketa samting ya nao hemi olsem gudfala pei blong mi. 11Bat taem mi tingting gud long olketa samting wea mi bin duim an wea mi bin hadwaka tumas long hem, mi lukim dat olketa hadwaka blong mi ya hemi no fitim tingting blong mi. Hemi olsem wea mi bin aftarem nomoa win. Mi nating faendem nomoa eni gudfala samting long hem.
Waes hemi winim wanem hemi krangge
12Mi tingting abaotem wanem hemi waes an wanem hemi krangge. Mi lukim dat neks king hemi nating save duim nomoa eni niufala samting. Oltaem hemi mas duim nomoa olketa semsamting wea olketa narafala king hu i rul fastaem long hem i bin duim. 13An mi lukim dat wei blong waes nao hemi moabeta winim olketa krangge wei. Hemi barava olsem wea laet hemi moabeta winim tudak. 14Man hu hemi waes hemi luksave long rod blong laef wea hemi falom, bat man hu hemi krangge hemi wakabaot nomoa long tudak. Bat mi save dat dae bae kasem tufala evriwan.
15So mi lukim dat semsamting wea hemi kasem man hu hemi krangge, bae hemi save kasem mi tu. ?Sapos olsem, watkaen gudfala samting nao bae mi winim long waes blong mi ya? !Nating nao! !Hem tu hemi no fitim tingting blong yumi! 16Long taem wea waes man an krangge man i dae finis, no eniwan bae hemi tingim tufala moa. Ya, olsem krangge man hemi mas dae, waes man tu bae hemi dae. 17So mi les long olketa trabol long laef blong man. Evrisamting wea mi bin wakahad long hem, hemi mekem mi filnogud. Laef ya hemi no fitim tingting blong yumi. Mi lukim hemi olsem wea yumi aftarem nomoa win.
18So mi les long evrisamting wea mi hadwaka fo hem, bikos mi save dat bae mi mas letem fo man wea bae hemi sensim mi. 19Mi no save dat man ya maet hemi waes o maet hemi krangge nomoa. Nomata watkaen man nao, bae hemi yusim evrisamting wea mi bin wakahad fo hem an evrisamting wea mi kasem long waes blong mi. Diswan hemi no fitim tingting blong yumi. 20So mi barava filnogud long evri hadwaka ya. 21Man hemi wakahad long waes, an long tingting, an long save blong hem, bat taem hemi dae, hemi mas letem evrisamting blong hem fo narafala man hu hemi nating wakahad long hem. Disfala samting hemi nating stret, an hemi no fitim tingting blong yumi. 22?Long laef blong yumi, oltaem yumi gohed fo wakahad tumas an wari tumas long waka ya, bat wanem nao bae yumi garem long olketa hadwaka ya? !Nating nao! 23Evride, yumi wari an filnogud tumas long waka. Diswan hemi mekem yumi no save slip long naet. Diskaen laef hemi no fitim tingting blong yumi tu.#Job 5:7; 14:1.
24So, nambawan samting wea yumi save duim nao, hemi olsem, yumi kaikai an dring nomoa, an gohed fo hapi long olketa samting wea yumi garem. An mi save tu dat God nomoa hemi givim olketa samting ya.#Eklesiastes 3:13; 5:18; 9:7; Luk 12:19; 1 Korin 15:32. 25Sapos God hemi no givim olketa samting ya long yumi, bae yumi no garem kaikai an yumi no save hapi. 26Oltaem God hemi givim waes an save long olketa hu i obeim hem, an hemi mekem olketa i hapi tu. Bat God hemi mekem olketa nogud pipol wakahad tumas fo kasem olketa gudfala samting, an hipimap fo givim go long olketa ya hu i mekem God hapi. Hem tu hemi no fitim tingting blong yumi. Hemi olsem wea olketa aftarem nomoa win.#Job 32:8; Provebs 2:6.
Currently Selected:
Eklesiastes 2: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.